ថ្វីត្បិតតែការចិញ្ចឹមកូនតែឯង មានការពិបាក ព្រមទាំងប្រឈមនឹងបញ្ហាផ្សេងៗជាច្រើនក៏ពិតមែន ប៉ុន្តែយើងនៅតែចាំបាច់រក្សាទំនាក់ទំនងល្អជាមួយកូនជានិច្ច។ ជាទូទៅ កុមារចាប់ផ្ដើមរៀនពីបរិយាកាសជុំវិញតាមទំនាក់ទំនងជាមួយនឹងប៉ា ឬម៉ាក់ ហើយការយកចិត្តទុកដាក់ និងក្ដីស្រលាញ់ពីប៉ា ឬម៉ាក់ គឺជាអ្វីដែលកូនចង់បាន។ ហើយអ្វីទាំងនេះក៏គ្រឹះនៃទំនាក់ទំនងនៅថ្ងៃអនាគតរវាងប៉ា ឬម៉ាក់ និងកូនផងដែរ។ ហេតុនេះហើយ ប៉ា ឬម៉ាក់អាចសាកល្បងតិចនិកមួយចំនួនខាងក្រោមនេះ។
មាតិកា
ប៉ាឬម៉ាក់ចិញ្ចឹមកូនតែឯង អាចសាកតិចនិកទាំង៥បង្កើតទំនាក់ទំនងល្អជាមួយកូន
១. បង្ហាញក្ដីស្រលាញ់ដល់កូន
យើងរាល់គ្នាតែងតែត្រូវការក្ដីស្រលាញ់ និងការយកចិត្តទុកដាក់ពីមនុស្សជុំវិញខ្លួន ហើយកូនៗក៏មិនខុសគ្នាដែរ ពួកគេចង់បានភាពទន់ភ្លន់ ពាក្យពេចន៍ល្អៗ និងការឱបដ៏កក់ក្តៅពីប៉ាម៉ាក់។ ដូច្នេះហើយ ចូរព្យាយាមភ្ជាប់ទំនាក់ទំនងឲ្យបានច្រើន ដោយការមើលភ្នែក និងញញឹមដាក់កូន ដើម្បីឲ្យកូនទទួលអារម្មណ៍ល្អៗ និងការយកចិត្តទុកដាក់។
២. ចំណាយពេលស្ដាប់កូននិយាយ
ជារឿយៗ កូនដែលត្រូវចិញ្ចឹមបីបាច់ដោយប៉ា ឬម៉ាក់តែឯង តែងជួបការពិបាកដូចគ្នា។ ដូច្នេះហើយ យើងចាំបាច់កសាងទំនាក់ទំនងរឹងមាំ ដោយការជជែកជាមួយកូន និងឲ្យកូនបង្ហាញពីអារម្មណ៍របស់ខ្លួន។ មិនតែប៉ុណ្ណោះ ប៉ា ឬម៉ាក់គួរតែឲ្យកូនដឹងថា យើងនៅចាំជួយដោះស្រាយបញ្ហារបស់កូន រាល់ពេលដែលពួកគេត្រូវការ។
៣. លេង និងញ៉ាំអាហារជាមួយគ្នា
ការលេងមានសារៈសំខាន់ណាស់ ចំពោះការអភិវឌ្ឍរបស់ក្មេង។ លើសពីនេះ ការលេងក៏ជាវិធីដ៏ល្អមួយ ដើម្បីរឹតចំណងទំនាក់ទំនងជាមួយនឹងកូនដែរ។ រីឯការញ៉ាំអាហារជាមួយកូន អាចជួយឲ្យការសន្ទនាកាន់តែមានភាពស្និទ្ធស្នាលទ្វេដង ក៏ដូចជាអាចជួយពង្រឹងទាំងសុខុមាលភាពទាំងផ្លូវចិត្ត និងផ្លូវកាយថែមមួយកម្រិតទៀត។
អត្ថបទគួរអាន៖
- ៥ តិចនិក ម៉ាក់ប៉ាលែងល្វីងមុខ ពេលអាអូនចាប់ផ្ដើមក្បាលខូច
- កុមារ ឬក្មេងជំទង់មានចរិតហិង្សា អាចមកពីកត្តាទាំងនេះ
- ប៉ុន្មានហេតុផលនេះ ប៉ាម៉ាក់ល្មមឈប់ដាក់ទណ្ឌកម្មកូនទៀតទៅ
- ម៉ាក់ប៉ាមករៀនតិចនិកទប់ស្កាត់ កូនៗឈ្លោះគ្នាជាមួយបងប្អូន
- មិនចង់ឲ្យកូនធំឡើងកោងកាច ម៉ាក់ប៉ាកុំធ្វើរឿងទាំងនេះនៅមុខកូន
- បើមិនចង់ឲ្យក្លាយជាក្មេងទម្រើស សាកប៉ុន្មានរបៀបនេះ
៤. កសាងទំនុកចិត្ត និងការគោរពគ្នាទៅវិញទៅមក
ទំនុកចិត្ត និងការគោរពគ្នាទៅវិញទៅមក អាចជួយឲ្យទំនាក់ទំនងរវាងប៉ាម៉ាក់ និងកូនកាន់តែល្អប្រសើរ។ ជាក់ស្ដែង ការអភិវឌ្ឍទំនុកចិត្តជួយឲ្យកូនមានអារម្មណ៍សុវត្ថិភាព និងអាចចែករំលែកគំនិតផ្ទាល់ខ្លួនរបស់គេមកកាន់យើងដោយមិនរួញរា។ ជាងនេះទៅទៀត កូនៗក៏មានទំនុកចិត្តចំពោះខ្លួនឯងកាន់តែច្រើន ព្រមទាំងរៀនស្វែងយល់ពីពិភពខាងក្រៅដោយភាពជឿជាក់ថែមទៀតផង។
៥. ផ្ដល់អាទិភាពដល់កូន
ចំណុចដ៏សំខាន់មួយទៀត នៃការកសាងទំនាក់ទំនងជាវិជ្ជមានរវាងប៉ា ឬម៉ាក់ និងកូន គឺការចំណាយពេលនៅជាមួយកូនឲ្យបានច្រើនតាមដែលអាចធ្វើបាន។ ទោះបីមិនមែនជារឿងងាយស្រួលក៏ពិតមែន ប៉ុន្តែយើងគួរតែព្យាយាមឲ្យអស់ពីសមត្ថភាព ដើម្បីរួមចំណែកជួយឲ្យកូនក្លាយជាមនុស្សល្អទៅថ្ងៃអនាគត ទោះបីជាយើងចិញ្ចឹមបីបាច់កូនតែឯងក៏ពិតមែន។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
7 Tips for Single Parents
https://blog.ochsner.org/articles/7-tips-for-single-parents
Single parents and positive single parenting
https://raisingchildren.net.au/grown-ups/family-diversity/parenting-after-separation-divorce/single-parenting
8 Ways to Strengthen a Parent-Child Relationship
https://www.familyservicesnew.org/news/8-ways-to-strengthen-a-parent-child-relationship/
កំណែប្រែបច្ចុប្បន្ន
05/09/2022
អត្ថបទដោយ នូ សោភ័ណ្ឌ
ត្រួតពិនិត្យដោយ វេជ្ជ. ចាន់ ស៊ីណេត
បច្ចុប្បន្នភាពដោយ៖ ទូច សុខា
ត្រួតពិនិត្យដោយ
វេជ្ជ. ចាន់ ស៊ីណេត
ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម