ជំងឺទឹកនោមផ្អែមប្រភេទ ២ មិនមែនកើតតែលើមនុស្សចាស់ទេ មនុស្សញវ័យ ក្មេងជំទង់ និងកុមារក៏អាចកើតជំងឺនេះដែរ។ ការកើនឡើងនៃចំនួនកុមារកើតជំងឺទឹកនោមផ្អែមប្រភេទ ២ គឺបណ្តាលមកពីជំងឺធាត់។ ការញុំាជាតិស្ករច្រើនអាចបណ្តាលឱ្យកុមាធាត់លើសគីឡូដែលជា មូលហេតុចម្បងបង្កឱ្យកុមារកើតជំងឺទឹកនោមផ្អែមប្រភេទ ២។ តើក្នុងមួយថ្ងៃកុមារអាចញុំាជាតិស្ករប៉ុន្មាន ទើបមិនប្រឈមហានិភ័យកើតជំងឺទឹកនោមផ្អែមប្រភេទ ២?
លោកស្រីសាស្រ្តាចារ្យ វេជ្ជបណ្ឌិតអុីវ ម៉ាឡែន អនុប្រធានមន្ទីរពេទ្យគន្ធបុប្ជាភ្នំពេញបានលើកឡើងថា ក្នុងឆ្នាំ២០២៤ មន្ទីរពេទ្យគន្ធបុប្ជាភ្នំពេញបានធ្វើរោគវិនិច្ឆ័យថ្មី និងទទួលព្យាបាលជំងឺទឹកនោមផ្អែមថ្មីចំនួន ៦១ ករណី ដែលក្នុងនោះមានកុមារកើតជំងឺទឹកនោមផ្អែមប្រភេទ ២ មានចំនួន ៥%។ កុមារកើតជំងឺទឹកនោមផ្អែមប្រភេទ ២ គឺពពួកធាត់ ដែលពាក់ព័ន្ធនឹងការញុំារបបអាហារមិនល្អ ជាពិសេសភេសជ្ជៈផ្អែម ឬភេសជ្ជៈប៉ូវកម្លាំង។
សមាគមបេះដូងអាមេរិក (AHA) បានណែនាំថា ក្នុងមួយថ្ងៃកុមារអាយុពី ២ ទៅ ១៨ ឆ្នាំអាចញុំាជាតិស្ករតិចជាង ២៥ ក្រាម (៦ ស្លាបព្រាកាហ្វេ) ហើយក្នុងមួយសប្តាហ៍អាចញុំាភេសជ្ជៈផ្អែមត្រឹម ២៣៧ មីល្លីលីត្រ ព្រោះការញុំាជាតិស្ករលើសកម្រិតអាចបណ្តាលឱ្យកុមារធាត់ដែល បង្កហានិភ័យកើតជំងឺទឹកនោមផ្អែមប្រភេទ ២។
ធ្វើម៉េចដឹងថាក្នុងភេសជ្ជៈណាមានជាតិស្ករប៉ុន្មានស្លាបព្រាកាហ្វេ?
ដើម្បីដឹងពីកម្រិតជាតិស្ករក្នុងភេសជ្ជៈនីមួយៗ យើងអាចមើលក្នុងតារាងព័ត៌មានអាហារូបត្ថម្ភ ឬជីវជាតិអាហាររបស់ភេសជ្ជៈនោះ រួចធ្វើការគណនា។ ភេសជ្ជៈផ្អែម និងភេសជ្ជៈប៉ូវកម្លាំងមួយចំនួនដាក់បរិមាណជាតិស្ករសរុបក្នុងចំណុះមួយកំប៉ុង ឬដប ប៉ុន្តែសម្រាប់ភេសជ្ជៈផ្អែម និងភេសជ្ជៈប៉ូវកម្លាំងមួយចំនួនទៀត ដាក់តែបរិមាណជាតិស្ករសរុបក្នុងចំណុះ ១០០ មីល្លីលីត្រប៉ុណ្ណោះ។
ជាទូទៅស្ករ ៤,២ ក្រាមស្មើមួយស្លាបព្រាកាហ្វេ តែដើម្បីឱ្យស្រួលគណនា គេកំណត់យកត្រឹម ៤ ក្រាមស្មើមួយស្លាបព្រាកាហ្វេ។ ខាងក្រោមជារូបមន្តសម្រាប់គណនារកចំនួនជាតិស្ករសរុប គិតជាស្លាបព្រាកាហ្វេក្នុងភេសជ្ជៈផ្អែម និងភេសជ្ជៈប៉ូវកម្លាំងក្នុងចំណុះមួយកំប៉ុង ឬដប។
បរិមាណកម្រិតជាតិស្ករក្នុងចំណុះ ១០០ មីល្លីលីត្រ * ចំណុះសរុប / ៤,២ ក្រាម ឬ ៤ ក្រាម
ឧទាហណ៍៖ ទឹកក្រូចចំណុះ ១០០ មីល្លីលីត្រមានជាតិស្ករ ១០,៥ ក្រាម ចឹងក្នុងទឹកក្រូចមួយកំប៉ុងចំណុះ ៣៣០ មីល្លីលីត្រមានជាតិស្ករសរុបប្រហែល ៨ ស្លាបព្រាកាហ្វេ។
ក្រៅពីភេសជ្ជៈផ្អែម និងភេសជ្ជៈប៉ូវកម្លាំង អាហារមួយចំនួនដូចជា ស្ករគ្រាប់ បង្អែម នំផ្អែម ការ៉េម ដំណាប់ផ្លែឈើ យ៉ាអួរ ទឹកកកឈូស ទឹកប៉េងប៉ោះ ទឹកជ្រលក់បាប៊ីឃ្យូជាដើមក៏មានជាតិស្ករខ្ពស់ដែរ។ ក្រៅពីភេសជ្ជៈកំប៉ុង ឬដប ភេសជ្ជៈដូចជា តែបៃតង តែគុជ ទឹកផ្លែឈើកៀប ទឹកអំពៅ កាហ្វេទឹកដោះគោ ទឹកក្រឡុក ទឹកស៊ីរ៉ូជាដើមក៏មានជាតិស្ករខ្ពស់ដូចគ្នា។
ជំនួសឱ្យកូនញុំាភេសជ្ជៈ និងអាហារផ្អែមៗ ម៉ាក់ប៉ាអាចឱ្យកូនញុំាផ្លែឈើជំនួសវិញ ព្រោះសម្បូរវីតាមីន សារធាតុរ៉ែ និងជាតិសរសៃដែលល្អចំពោះសុខភាពកូន។
អត្ថបទគួរអាន៖
- កើតទឹកនោមផ្អែម ផឹកភេសជ្ជៈកំប៉ុងគ្មានជាតិស្ករច្រើនបានមែនទេ?
- កុំចូលចិត្តពេក! ភេសជ្ជៈគ្មានជាតិស្ករក៏អាចធ្វើឲ្យកើតទឹកនោមផ្អែមបានដែរ
- ១០ ចំណុច អ្នកកើតទឹកនោមផ្អែមធ្វើជាប្រចាំ ធានាថែទាំសុខភាពបានល្អ
- មូលហេតុបង្កជំងឺទឹកនោមផ្អែម គួរដឹង និងការពារ
- តិចនិកញ៉ាំបាយស កាត់បន្ថយហានិភ័យកើតជំងឺទឹកនោមផ្អែម
- ហេតុអ្វីអ្នកមានជំងឺទឹកនោមផ្អែមមិនគួររំលងម៉ោងពេលញុំាអាហារ?
ចំណុចសំខាន់
- ញុំាជាតិស្ករតិចជាង ២៥ ក្រាម (៦ ស្លាបព្រាកាហ្វេ)
- ក្នុងមួយសប្តាហ៍អាចញុំាភេសជ្ជៈផ្អែមត្រឹម ២៣៧ មីល្លីលីត្រ
[embed-health-tool-bmi]
