ពេលចាប់ផ្ដើមពពោះ ម៉ាក់ៗនឹងត្រូវចាស់ៗ ឬមិត្តភ័ក្ដិជុំវិញខ្លួនណែនាំគ្រប់សព្វបែបយ៉ាងតាំងពីរបបអាហារ សកម្មភាពប្រចាំ និងជំនឿខ្មែរបុរាណមួយចំនួនទៀត ដើម្បីថែទាំខ្លួន និងកូនក្នុងផ្ទៃបានល្អ កុំឲ្យថ្លោះធ្លោយ។ ក្នុងនោះដែរ ក៏មានការហាមឃាត់ម៉ាក់ៗពពោះមិនឲ្យនៅជិតសត្វឆ្មាដែរ។
ហេតុអ្វីស្ត្រីពពោះនៅជិតសត្វឆ្មាអត់បាន?
តាមពិតទៅ មិនមែនស្ត្រីពពោះនៅជិតសត្វឆ្មាមិនបាននោះទេ គ្រាន់តែថាម៉ាក់ៗមិនគួរប៉ះពាល់នឹងកាកសំណល់ឆ្មា (លាមក ឬទឹកនោម) ព្រោះម៉ាក់ៗងាយប្រឈមឆ្លងមេរោគ តុកសូប្លាស្មូស៊ីស (Toxoplasmosis)។ តុកសូប្លាស្មូស៊ីស ជាប៉ារ៉ាស៊ីត ដែលមានក្នុងលាមក ឬទឹកនោមឆ្មា។ មិនត្រឹមតែសត្វឆ្មាប៉ុណ្ណោះទេដែលផ្ទុកប៉ារ៉ាស៊ីតនេះ សូម្បីតែសត្វមួយចំនួនទៀត ឬអាហារដូចជា សាច់ឆៅ ឬចម្អិនមិនបានល្អ ក៏អាចផ្ទុកតុកសូប្លាស្មូស៊ីសនេះដែរ។
ប៉ារ៉ាស៊ីតមួយនេះមិនបង្កឲ្យម៉ាក់ៗឈឺធ្ងន់ធ្ងរទេ ប៉ុន្តែអាចបង្កគ្រោះថ្នាក់ដល់អាអូនក្នុងផ្ទៃបានដោយបំផ្លាញសរីរាង្គទារកដូចជា ខួរក្បាល តម្រងនោម មានទឹកដក់ក្នុងពោះទារក ឬរហូតអាចបណ្ដាលឲ្យរលូតកូនក៏ថាបាន។ យ៉ាងណាមិញ ក៏ជាសំណាងល្អដែរ ព្រោះឱកាសនៃការឆ្លងជំងឺតុកសូប្លាស្មូស៊ីសអំឡុងពេលមានផ្ទៃពោះមានកម្រិតទាប។
ផ្ទុយទៅវិញ ដើម្បីសុវត្ថិភាពកូន បើក្នុងផ្ទះមានចិញ្ចឹមឆ្មា ម៉ាក់ៗគួរតែឲ្យសមាជិកគ្រួសារសម្អាតលាមក ឬទឹកនោមឆ្មា ហើយព្យាយាមកុំនៅក្បែរវា។ ក្នុងករណី ម៉ាក់ៗចាំបាច់ត្រូវសម្អាតដោយខ្លួនឯង គួរប្រើស្រោមដៃឲ្យជិត ហើយលាងសម្អាតដៃរបស់ខ្លួនឲ្យស្អាតក្រោយពេលកើប ឬជូតកាកសំណល់សត្វរួច។
ជាចុងក្រោយ ម៉ាក់ៗពពោះត្រូវទៅពិនិត្យឲ្យទៀងទាត់ជាមួយគ្រូពេទ្យជំនាញទៅតាមការណាត់ជួប ជាពិសេសបើមានចម្ងល់ទាក់ទងនឹងការថែទាំសុខភាពពេលពពោះគួរសួរគ្រូពេទ្យ។ ចំពោះរបៀបរបបរស់នៅប្រចាំថ្ងៃ ម៉ាក់ៗត្រូវញ៉ាំអាហារឲ្យបានគ្រប់គ្រាន់ មានបន្លែ ផ្លែឈើ គ្រាប់ធញ្ញជាតិ សាច់គ្រប់មុខ ដើម្បីទទួលបានសារធាតុចិញ្ចឹមគ្រប់គ្រាន់ និងព្យាយាមធ្វើសកម្មភាពរាងកាយ ឬហាត់ប្រាណសមស្របទៅតាមត្រីមាសនៃការពពោះនីមួយៗ។
អានបន្ថែម៖
- ម៉ាក់ៗកំពុងពពោះ អាចញ៉ាំសាច់អន្ទង់បានអត់?
- ផឹកស្រាថ្នាំពេលពពោះ ឬកូនខ្ចី អាចប៉ះពាល់សុខភាព
- ហានិភ័យ និងផលប៉ះពាល់គភ៌ក្នុងផ្ទៃ បើម៉ាក់ៗស្លេកស្លាំងពេលពពោះ
- កើតស្វាយពេលពពោះ ទារកក្នុងផ្ទៃប្រឈមបញ្ហាធំៗយ៉ាងតិច ៤
- ម៉ាក់ៗដឹងអត់ ចេះតាមដានចលនារើបម្រះកូនក្នុងផ្ទៃ មានសារសំខាន់ណាស់
[embed-health-tool-pregnancy-weight-gain]
