ជំងឺឆ្លង

ស្ថានភាព​ជំងឺកូវីដ ១៩ នៅថ្ងៃ១៥ ឧសភា​ ២០២១ នេះ មាន​អ្នក​ជា​សះស្បើយ​ចំនួន  ១ ៣៨០នាក់ ខណៈ​អ្នក​ឆ្លង​ថ្មីមាន ៣៥០ករណី និង​ស្លាប់ ៣នាក់ នេះ​បើ​តាម​សេចក្តី​ជូនព័ត៌មាន​សង្ខេប​របស់​ក្រសួង​សុខាភិបាល។ - សរុបអ្នកឆ្លងកូវីដ៖ ២២ ១៨៤នាក់ - ជាសះស្បើយ៖ ១២ ១២០នាក់ - ស្លាប់៖ ១៥០នាក់

ក្នុង​រយៈពេល ១សប្តាហ៍ ចាប់ពីថ្ងៃទី៦ ដល់ថ្ងៃទី១២ ខែឧសភា ឆ្នាំ២០២១ កន្លង​មក​នេះ បើ​តាម​ទិន្នន័យ​របស់​អនុ​គណៈកម្មការ​ស្រាវជ្រាវ និង​តាមដាន​បុគ្គល​សង្ស័យ​ថា​មានផ្ទុក​ជំងឺ​កូវីដ ១៩ បញ្ជាក់ថា ​ពលរដ្ឋនៅរាជធានីភ្នំពេញក្នុងតំបន់លឿងឆ្លងកូវីដ ១៩ ច្រើន​ជាង​គេ។  - តំបន់លឿង​ មានអ្នកឆ្លង ៥០.០៧%  -តំបន់ក្រហម មានអ្នកឆ្លង ៣២.១៩%  -តំបន់លឿងទុំ មានអ្នកឆ្លង ១៤.៣៤%  - តំបន់ផ្សេងទៀត មានអ្នកឆ្លង ៣.៤% គណៈ​កម្មការ​ស្រាវជ្រាវ និង​​តាមដាន​​បុគ្គល​​សង្ស័យ​​ថា​​មាន​ផ្ទុក​​ជំងឺ​កូវីដ ១៩ បាន​សំណូមពរ​ឲ្យបងប្អូន​ទោះរស់នៅ​តំបន់​ណា​ក៏ដោយ ត្រូវ​រួមគ្នា​ពាក់​ម៉ាស រក្សា​គម្លាត និងឧស្សាហ៍​លាង​ដៃគ្រប់ពេល និង​គ្រប់កន្លែង ដើម្បី​បង្ការខ្លួន​ពី​ការ​ឆ្លងកូវិដ ១៩។ ស្ថានភាពជំងឺកូវីដ ១៩ គិតត្រឹមព្រឹកថ្ងៃទី ១៤ ឧសភា ២០២១ នេះ តួលេខឆ្លងកូវីដ ១៩ សរុបកើនដល់ ២១ ៤៩៩នាក់ ក្នុងនោះព្យាបាលជាសះស្បើយ ៩ ៨៦៧នាក់ និងមានអ្នកស្លាប់ ១៤៧នាក់

សេចក្តីជូនព័ត៌មានសង្ខេប ស្តីពី ស្ថានភាពជំងឺកូវីដ-១៩ របស់ក្រសួងសុខាភិបាល សម្រាប់ថ្ងៃទី១៣ ខែឧសភា ឆ្នាំ២០២១ មានករណីវិជ្ជមានកូវីដ ៣៥៨ករណី ជាសះស្បើយ ៣៤៨នាក់ និងស្លាប់ ៥នាក់។ - សរុបតួលេខឆ្លងកូវីដ ១៩៖ ២១ ៤៩៩នាក់ - ព្យាបាលជាសះស្បើយ៖ ៩ ៨៦៧នាក់ - ស្លាប់៖ ១៤៧នាក់

ថ្ងៃនៅថ្ងៃទី ១២ ឧសភា ២០២១ មាន​អ្នក​ជា​សះ​ស្បើយពីជំងឺ​កូវីដ ១៩ ចំនួន ៩៨០នាក់ ឆ្លង​ថ្មី ៤៤៦នាក់ និង​ស្លាប់ ៦នាក់ នេះ​បើ​តាម​សេចក្តី​ជូនព័ត៌មាន​សង្ខេប​របស់​ក្រសួង​សុខាភិបាល។​ សរុប​តួលេខ​ឆ្លង​កូវីដ ១៩ ទូទាំង​ប្រទេស​វិញ​កើន​ឡើងដល់ ២១ ១៤១នាក់ ក្នុងនោះមានស្លាប់ ១៤២នាក់ និងព្យាបាលជាសះស្បើយ ៩ ៥១៩នាក់។

នៅ​រសៀល​ថ្ងៃទី១២ ឧសភា ២០២១ ក្រោយ​ពី​ទទួល​ការ​ព្យាបាលយ៉ាង​យក​ចិត្តទុកដាក់ខ្ពស់​ពី​សំណាក់​ក្រុមគ្រូពេទ្យ នៅ​មណ្ឌលព្យាបាលជំងឺ​កូវីដ-១៩ កម្រិតស្រាល កោះពេជ្រ អ្នកជំងឺកូវីដ១៩ ចំនួន ៣៣៣នាក់ បានជាះស្បើយ ​និងអនុញ្ញាតឲ្យត្រលប់ទៅផ្ទះវិញ។ នេះបើតាមការផ្សព្វផ្សាយ​នៅ​លើ​ផេក​គ្រូពេទ្យ​ស្ម័គ្រចិត្ត​យុវជន​សម្តេចតេជោ។ ទោះ​​បី​​​ជាសះស្បើយ​​ពីកូវីដ ១៩ ត្រលប់​​ទៅ​​ផ្ទះ​​វិញ​ក្តី អ្នក​ទាំង​នោះ​ត្រូវ​ធ្វើ​ចត្តាឡីស័ក​ខ្លួន​ឯង​ដាច់​ដោយ​ឡែក​រយៈពេល ១៤ ថ្ងៃ​បន្ត​ទៀត ដើម្បីតាមដាន​សុខភាព។

កាល​ពី​ប៉ុន្មាន​ថ្ងៃ​កន្លង​ទៅ​នេះ អង្គការ​សុខភាព​ពិភព​លោក (WHO) បាន​ផ្ដល់​ការ​ទទួល​ស្គាល់​​វ៉ាក់សាំង​កូវីដ-១៩​ Sinopharm របស់​ប្រទេស​ចិន។ វ៉ាក់សាំង​កូវីដ-១៩ Sinopharm ជា​វ៉ាក់សាំង​ដំបូង​គេ​បំផុត​ ដែលមិន​មែន​ជា​វ៉ាក់សាំង​ផលិត​នៅ​ក្នុង​ប្រទេស​លោក​ខាង​លិច​ដែល​ត្រូវ​បាន​ទទួល​ស្គាល់​ដោយ​ WHO។ នៅ​ក្នុង​ប្រទេស​កម្ពុជា​យើង ក៏​ត្រូវ​បាន​ដាក់​ឲ្យ​ប្រើប្រាស់​វ៉ាក់សាំង​ Sinopharm ចាប់​តាំង​ពី​ខែ​កុម្ភៈ ឆ្នាំ២០២១​​ មក​ម៉្លេះ។ ខាង​ក្រោម​នេះ ជា​ចំណេះ​ដឹង​ល្អ​ៗ​អំពី​វ៉ាក់សាំង​ការពារ​ជំងឺ​កូវីដ-១៩ Sinopharm យើង​គួរ​ដឹង។ តើ​អ្នក​ណា​ខ្លះ​អាច​ចាក់​វ៉ាក់សាំង ​Sinopharm ​បាន? ចម្លើយ៖ វ៉ាក់សាំង​នេះ​អាច​ចាក់​បាន​ចាប់​ពី​មនុស្ស​អាយុ​១៨​ឆ្នាំ​ឡើង​ទៅ (ក្រោម​អាយុ​១៨​ឆ្នាំ​មិន​អាច​ចាក់​បាន​ទេ) ហើយ​អ្នក​ដែល​មាន​ប្រវត្តិ​ឆ្លង​កូវីដ-១៩ ​ពី​មុន​ក៏​អាច​ចាក់​វ៉ាក់សាំង​នេះ​បាន​ដែរ។ ស្ត្រី​បំបៅ​ដោះ​កូន​អាច​ចាក់​វ៉ាក់សាំង​ Sinopharm​ នេះ និង​ទទួល​បាន​ប្រសិទ្ធភាព​ការពារ​ខ្លួន​ពី​ជំងឺ​កូវីដ-១៩​ ដូច​មនុស្ស​ទូទៅ ហើយ​ WHO បាន​ណែនាំ​ឲ្យ​ម៉ាក់​ៗ​បន្ត​បំបៅ​ដោះ​កូន ក្រោយ​ចាក់​វ៉ាក់សាំង​កូវីដ-១៩​ ដូច​ធម្មតា។ ចំណែក​ការ​ប្រើប្រាស់​វ៉ាក់សាំង​នេះ​លើ​ស្ត្រី​ពពោះ អាច​ធ្វើ​ទៅ​បាន​ក្នុង​ករណី​ចាំ​បាច់​បំផុត ព្រោះ​បច្ចុប្បន្ន មាន​ការ​សិក្សា​តិចតួច​ពី​ការ​ចាក់​វ៉ាក់សាំង​នេះ​លើ​ស្ត្រី​ពពោះ​ដែល​មិន​ទាន់​អាច​បញ្ជាក់​ច្បាស់​ថា ​តើ​វា​អាច​បង្ក​គ្រោះ​ថ្នាក់​ដល់​ដំណើរ​ការ​ពពោះ​ដែរ ឬ​អត់។ តើ​អ្នក​ណា​ខ្លះ​មិន​អាច​ចាក់​វ៉ាក់សាំង​ Sinopharm​ បាន? ចម្លើយ៖ ក្រុម​មនុស្ស​ដែល​មិន​អាច​ចាក់​វ៉ាក់សាំង​នេះ​បាន​គឺ​បុគ្គល​ដែល​ប្រតិកម្ម​ជាមួយ​សារធាតុ​មាន​ក្នុង​វ៉ាក់សាំង ឬ​បុគ្គល​ដែល​មាន​កម្ដៅ​ខ្លួន​ឡើង​ដល់​៣៨.៥ អង្សារសេ ត្រូវ​ពន្យារ​ពេល​ចាក់​វ៉ាក់សាំង​រហូត​ដល់​សីតុណ្ហភាព​រាងកាយ​ធម្មតា​វិញ។ តើ​វ៉ាក់សាំង​ Sinopharm ប្រៀប​ធៀប​នឹង​វ៉ាក់សាំង​ដទៃ​ទៀត​កំពុង​ប្រើ​យ៉ាង​ម៉េច​ដែរ? ចម្លើយ៖ យើង​មិន​អាច​ប្រៀបធៀប​វ៉ាក់សាំង​នីមួយ​ៗ​ប្រជែង​នឹង​គ្នា​ទេ ដោយសារ​តែ​វា​ត្រូវ​បាន​ធ្វើ​ឡើង​នៅ​ក្នុង​ការ​សិក្សា​រៀង​ៗ​ខ្លួន ប៉ុន្តែ​សរុប​មក​គ្រប់​វ៉ាក់សាំង​ទាំង​អស់​ដែល​ទទួល​ស្គាល់​ដោយ​អង្គការ​សុខភាព​ពិភព​លោក​សុទ្ធតែ​មាន​ប្រសិទ្ធភាព​ទាំង​អស់​ក្នុង​ការ​ការពារ​ការ​ឆ្លង​ជំងឺ​កូវីដ-១៩។ តើ​វ៉ាក់សាំង​នេះ​មាន​ប្រសិទ្ធភាព​កម្រិត​ណា? ចម្លើយ៖ តាម​ការ​សិក្សា​បង្ហាញ​ថា […]

រដ្ឋបាល​រាជធានី​ភ្នំពេញ​សម្រេច​បន្ត​វិធានការ​រដ្ឋបាល ដើម្បី​ទប់ស្កាត់​ការ​ឆ្លង​រាល​ដាល​ជំងឺ​កូវីដ១៩ បែង​ចែក​ជា តំបន់ក្រហម តំបន់លឿងទុំ និង តំបន់លឿង ១សប្តាហ៍ទៀត ចាប់ពីម៉ោងសូន្យ ថ្ងៃទី១៣ ដល់ ថ្ងៃទី១៩ ខែឧសភា ឆ្នាំ២០២១។ តំបន់​លឿង​សំដៅ​លើ​ភូមិសាស្ត្រ​ដែល​មាន​ការ​ឆ្លង​ជំងឺកូវីដ ១៩ កម្រិតស្រាល ឯ​លឿងទុំ កម្រិត​មធ្យម និង​ក្រហម ធ្ងន់ធ្ង។ ខាងក្រោមនេះជាតំបន់ក្រហម ដែលបានកំណត់ដោយរដ្ឋបាលរាជធានីភ្នំពេញ៖ -សង្កាត់បឹងកក់ (ភូមិ២៣) - សង្កាត់បឹងសាឡាង (ភូមិ១០) - សង្កាត់ចោមចៅទី១ (ភូមិត្រពាំងថ្លឹង១ និងភូមិត្រពាំងថ្លឹង២) - សង្កាត់ទួលសង្កែទី១ (ផ្នែកខ្លះនៃភូមិទួលសង្កែ ផ្នែកខ្លះនៃភូមិចុងខ្សាច់ និងផ្នែកខ្លះនៃភូមិបាក់ទូក) - សង្កាត់ស្ទឹងមានជ័យទី២ (ផ្នែកខ្លះនៃភូមិ៥) - សង្កាត់ស្ទឹងមានជ័យទី៣ (ផ្នែកខ្លះនៃភូមិទ្រា៤ ផ្នែកខ្លះនៃភូមិដំណាក់ធំ២ និងផ្នែកខ្លះនៃភូមិដំណាក់ធំ៣)

មក​ដល់​ថ្ងៃ​នេះ គ្នា​យើង​មួយ​ចំនួន​ច្បាស់​ជា​ទទួល​បាន​វ៉ាក់សាំង​កូវីដ-១៩ ការពារ​ខ្លួន​យើង​ពី​ការ​ឆ្លង​ជំងឺ​ផ្លូវ​ដង្ហើម​សាហាវ​នេះហើយ។ បន្ទាប់​ពី​ចាក់​គ្រប់​ដូស ​(២ដូស) ​រួច​ហើយ ប្រព័ន្ធ​ការពារ​រាង​កាយ​នឹង​ចាប់​ផ្ដើម​បង្កើត​អង់ទីករ​កាន់តែ​ខ្លាំង​ប្រឆាំង​ជំងឺ​កូវីដ-១៩។ ប៉ុន្តែ វ៉ាក់សាំង​កូវីដ-១៩ អាច​ការពារ​ខ្លួន​យើង​ពី​ជំងឺ​កូវីដ-១៩​ បំប្លែងខ្លួនបាន​ដែរ​ទេ? ឆ្លើយ​តប​នឹង​ចម្ងល់​មួយ​នេះ លោក​ស្រី​វេជ្ជបណ្ឌិត Katharine O'brien បម្រើ​ការ​នៅ​អង្គការ​សុខភាព​ពិភព (WHO) បាន​ឲ្យ​ដឹង​ថា តាម​សង្កេត​មើល​ពី​វ៉ាក់សាំង​កូវីដ-១៩​ ដែល​កំពុង​ដាក់​ឲ្យ​ប្រើប្រាស់​នៅ​ទូទាំង​ពិភពលោក​នេះ​ឃើញ​ថា វ៉ាក់សាំង​កូវីដ-១៩ នៅ​តែ​អាច​ការពារ​ខ្លួន​យើង​បាន​វីរុស​កូវីដ-១៩​ បំប្លែងថ្មី​មួយ​ចំនួន​។ ទោះ​បី​ជា វា​មិន​សូវ​មាន​ប្រសិទ្ធភាព​ខ្ពស់​ទប់ទល់​នឹង​វីរុស​កូវីដ-១៩ ​ធម្មតា​ក៏​ដោយ ក៏​វា​ផ្ដល់​រនាំង​ប្រឆាំង​នឹង​វីរុស​កូវីដ-១៩​ បំប្លែង​ថ្មី​បាន​ដែរ។ ក្រោយ​ចាក់​វ៉ាក់សាំង​ហើយ​អាច​ការពារ​ខ្លួន​យើង​ពី​ប្រភេទ​វីរុស​កូវីដ-១៩​ បំប្លែង​ថ្មី នៅ​ថ្ងៃ​អនាគត​បាន​អត់? លោក​ស្រី​បញ្ជាក់​ឲ្យ​ដឹង​ទៀត យើង​គួរ​តែ​រំពឹង​ទុក​នូវ​វីរុស​បំប្លែង​ខ្លួន​ថ្មី​ជា​ច្រើន​ទៀត​នៅ​ថ្ងៃ​ខាង​មុខ ពីព្រោះ​នេះ​ជា​អ្វី​ដែល​វីរុស​ធ្វើ ពោល​គឺ​ពពួក​វីរុស​ចូល​ចិត្ត​បង្កើត​ថ្មី ឬ​បំប្លែង​ខ្លួន​វា​ទៅ​ជា​វីរុស​មួយ​ប្រភេទ​ទៀត​ជា​បន្ត​បន្ទាប់។ ខណៈ​អ្នក​ផលិត​វ៉ាក់សាំង​កំពុង​ព្យាយាម​សម្រប​សម្រួល និង​បង្កើត​វ៉ាក់សាំង​ដែល​ល្អ​បំផុត​សម្រាប់​ទប់ទល់​នឹង​វីរុស​កូវីដ-១៩ ទាំង​ធម្មតា និង​ពពួកបំប្លែង​ថ្មី​ផ្សេងៗ។ វ៉ាក់សាំង​ដែល​យើង​មាន​សព្វ​ថ្ងៃ​សុទ្ធ​តែ​អាច​ការពារ​យើង​បាន​ពី​ពពួក​វីរុស​កូវីដ-១៩​ បំប្លែង​ថ្មី​ជា​ច្រើន ស្របពេល​ដែល​ខាង​អ្នក​វិទ្យាសាស្ត្រ​កំពុង​សិក្សា​ពី​ការ​ឆ្លើយ​តប​របស់​ពពួក​វីរុស​បម្លែង​ថ្មី ទៅ​នឹង​វ៉ាក់សាំង​កូវីដ-១៩។ វេជ្ជបណ្ឌិត​ដដែល​បន្ត​ថា អ្វី​ដែល​សំខាន់​នោះ គឺ​យើង​ត្រូវ​តែ​បន្ត​ការ​ពាក់​ម៉ាស់ និង​ធ្វើ​ការ​ណែនាំ​ពី​វិធាន​ការ​ទប់​ស្កាត់ការ​ឆ្លង​វីរុស​កូវីដ-១៩​ ទោះ​បី​ជា​យើង​ចាក់​វ៉ាក់​សាំង​កូវីដ-១៩ ​បាន​គ្រប់​ចំនួន​ក៏​ដោយ។ ទោះ​ជា​ពេល​នេះ យើង​ឃើញ​ថា វ៉ាក់សាំង​កូវីដ-១៩​ អាច​ការពារ​វីរុស​កូវីដ-១៩​ បំប្លែង​ថ្មី​បាន​មួយ​ចំនួន​ក៏​ដោយ តែ​យើង​នៅ​មិន​ទាន់​ដឹង​ថា​វា​អាច​ទប់​ទល់​នឹង​វីរុសបំប្លែង​ថ្មី​នៅ​ថ្ងៃ​ខាង​មុខ​បាន​ល្អ​ប៉ុនណា​នោះ​ទេ។

ស្ថានភាព​ជំងឺ​កូវីដ ១៩ នៅ​ថ្ងៃទី១០ ឧសភា ២០២១ នេះ តួលេខ​​ឆ្លង​​មាន​ការ​ថយ​ចុះ​បន្តិច គឺ​រក​ឃើញ​វិជ្ជមានចំនួន ៤៨០ករណី ខណៈ​ជា​សះស្បើយ​មាន ៣៥០ករណី និង​ស្លាប់ ៥នាក់។ ដោយ​ឡែក​សរុប​តួលេខ​ឆ្លង​ទូទាំង​ប្រទេស​វិញ កើន​ដល់ ២០ ២២៣នាក់ ក្នុង​នោះ​ព្យាបាល​ជា​សះស្បើយ​ចំនួន ៨ ១៧០នាក់ និង​ស្លាប់ ១៣១នាក់។

រដ្ឋបាល​ខេត្ត​កំពង់ចាម​បាន​ចេញ​សេចក្តី​ប្រកាស​ព័ត៌មាន​មួយ ពី​ករណី​ស្លាប់​របស់​ស្ត្រី​ជន​ជាតិខ្មែរ អាយុ ២៧ឆ្នាំ ដោយសារ​ជំងឺកូវីដ ១៩ និងមានផ្ទៃពោះ ៧ខែ។ ក្នុង​សេចក្តី​ប្រកាស​ព័ត៌មាន​នោះ​បាន​បញ្ជាក់ថា ស្រ្តី​ខាងលើ​ឈ្មោះ សាន គឹមឡេង ជា​កម្មការិនី​រោងចក្រ GNT ហៅ​អគារ ៣២ នៅព្រៃសរ រាជធានី​ភ្នំពេញ និង​មាន​ស្រុក​កំណើត​នៅ​ភូមិក្បាលកោះ ឃុំកោះ​អណ្តែត ស្រុក​ស្រីសន្ធរ ខេត្ត​កំពង់ចាម។ នៅ​ថ្ងៃទី០៦ ឧសភា ២០២១ កម្មការិនី​រោងចក្រ​រូបនេះ​បាន​ធ្វើ​ដំណើរ​ជាមួយ​ប្តី​មក​ស្រុក​កំណើត ហើយ​ត្រូវ​បញ្ចូន​មក​យក​សំណាក និង​ដាក់ធ្វើ​ចត្តាឡីស័ក​នៅ​មណ្ឌលចត្តាឡីស័ក​រដ្ឋបាលខេត្ត ដោយសារ​សង្ស័យ​មាន​ជំងឺកូវីដ ១៩ និង​​មក​ពី​តំបន់​ក្រហម រាជធានីភ្នំពេញ។ នៅ​ពេល​ល្ងាច​ថ្ងៃដដែល​នោះ ស្រ្តីរូបនេះ​ចេញ​អាការៈក្តៅខ្លួន ក្អក ហត់ ក្រុម​គ្រូពេទ្យ​ក៏​បញ្ជូន​មក​មន្ទីរពេទ្យខេត្ត និង​បាន​ធ្វើ​តេស្ត​រហ័ស​រក​ជំងឺ​កូវីដ ១៩ ក៏​ទទួល​បានលទ្ធផល​វិជ្ជមាន។​ ជា​អកុសល​ការ​វិវត្ត​នៃ​ជំងឺ​ចេះ​តែ​ធ្ងន់ធ្ងរ ក្រុម​គ្រូពេទ្យ​មិន​អាច​ជួយ​សង្គ្រោះ​បាន កម្មការិនី​ វ័យ ២៧ឆ្នាំរូបនេះ បាត់បង់​ជីវិត​នៅ​ថ្ងៃទី១០ ឧសភា ម៉ោង ៦៖០៥នាទី ដោយសារ​វីរុសកូវីដ ១៩ និង​មាន​ផ្ទៃពោះ ៧ខែ។