នៅហ្វីលីពីន ផ្ទុះជំងឺគ្រុនស្វិតដៃជើងឡើងវិញ ក្រោយបាត់ជិត ២០ឆ្នាំ

ដោយ ត្រួតពិនិត្យដោយ ជីព ចិត្ត

ជំងឺ​គ្រុនស្វិតដៃជើង បង្ក​ឲ្យ​ក្មេងៗ ប្រឈម​នឹង​ពិការភាព និង​ឆាប់ស្លាប់ ប៉ុន្ដែ​វាត្រូវបាន​លុបបំបាត់​អស់​រយៈពេល​ច្រើន​ឆ្នាំ​មក​ហើយ ដោយ​ការ​ចាក់​វ៉ាក់សាំង​បង្ការ។ ប៉ុន្ដែ ម្សិលមិញ ហ្វីលីពីន ប្រកាស​ថា ជំងឺ​គ្រុនស្វិតដៃជើង បាន​ផ្ទុះឡើង​វិញ ក្រោយ​ត្រូវ​លុប​បំបាត់​ ១៩​ឆ្នាំ​មក​។

រដ្ឋមន្រ្តី​សុខាភិបាល​ហ្វីលីពីន Francisco Duque III ថ្លែងក្នុង​សន្និសីទ​ថា ក្មេងស្រី​អាយុ ៣​ឆ្នាំម្នាក់ បាន​កើត​ជំងឺ​គ្រុនស្វិតដៃជើង នៅ​ខេត្ត Lanao del Sur ហើយ​វីរុស​ជំងឺ​គ្រុនស្វិតដៃជើង ក៏ត្រូវ​រកឃើញ​ក្នុង​លូ នៅ​ក្រុង​ម៉ានីល និង​តាម​ផ្លូវទឹក នៅ​តំបន់ Davao ផងដែរ។ ការ​រកឃើញ​នេះ គឺ​គ្រប់គ្រាន់ ដើម្បី​ប្រកាស​ពី​ការ​ផ្ទុះ​ឡើង​វិញ​នូវ​ជំងឺ​គ្រុនស្វិតដៃជើង ក្នុង​ប្រទេស​ហ្វីលីពីន។

អ្នកតំណាង​អង្គការ UNICEF ប្រចាំ​ប្រទេស​ហ្វីលីពីន Oyun Dendevnorov បញ្ជាក់​ថា បើក្មេង​ម្នាក់ បាន​ផ្ទុក​ជំងឺ​គ្រុន​ស្វិតដៃជើង​ហើយ ក្មេងៗ​ផ្សេងទៀត​នៅ​ក្នុង និង​ក្រៅប្រទេស ក៏ប្រឈម​នឹង​ការ​ឆ្លង​ជំងឺ​នេះដែរ។

ពាក់ព័ន្ធ​ករណី​នេះ អង្គការ​សុខភាព​ពិភពលោក (WHO) និង​អង្គការ UNICEF ចេញ​សេចក្តីប្រកាស​ព័ត៌មាន​រូមគ្នា​មួយ បង្ហាញ​ពី​កង្វល់ ដោយសារ​ករណី​នេះ បណ្ដាល​មកពី​វីរុស​ជំងឺ​គ្រុនស្វិតដៃជើង ដែល​កើតចេញ​ពី​វ៉ាក់សាំង ប្រភេទ ២។ ជាធម្មតា វីរុស​ដែល​ប្រើក្នុង​វ៉ាក់សាំង វា​ចូលទៅ​ក្នុង​ពោះវៀន​របស់​កុមារ​ក្នុង​រយៈពេល​ខ្លី ហើយ​ក្រោយ​មក វា​ចេញមក​វិញ​តាម​លាមក។ ប៉ុន្ដែ​ក្នុង​ករណី​កម្រ វីរុស​នេះ អាច​ពង្រឹង​ការ​វិវត្ត​ខ្លួន នៅ​តំបន់​ដែល​មាន​អនាម័យ​ខ្សោយ ហើយ​ក្មេងៗ​ដែល​ទទួល​បាន​វ៉ាក់សាំង​មិន​ត្រឹមត្រូវ ងាយ​រងគ្រោះ​ដោយសារ​វីរុស​ដែល​ប្រើ​ក្នុង​វ៉ាក់សាំង​នេះ។

ជំងឺ​គ្រុនស្វិតដៃជើង មិន​អាច​ព្យាបាល​ជាសះស្បើយ​ទេ ប៉ុន្ដែ​វា​អាច​បង្ការ​បាន​តាមរយៈ​វ៉ាក់សាំង​បង្ការ។ ពាក់ព័ន្ធ​ករណី​ខាងលើ លោក​រដ្ឋមន្រ្តី​សុខាភិបាល បញ្ជាក់​ថា ហ្វីលីពីន នឹង​បើក​យុទ្ធនាការ ផ្ដល់​វ៉ាក់សាំង​ដល់​កុមារ​អាយុ​ក្រោម ៥​ឆ្នាំ នៅ​ខែ​តុលា ខាង​មុខ នៅ​តាម​តំបន់​ដែល​រកឃើញ​វីរុស​ជំងឺ​គ្រុនស្វិតដៃជើង។

គួរបញ្ជាក់​ថា ជំងឺ​គ្រុនស្វិតដៃជើង ជាជំងឺ​ដែល​ងាយឆ្លង ដោយ​ឆ្លង​ពី​មនុស្ស​ម្នាក់ ទៅ​ម្នាក់​ទៀត តាមរយៈ​ការ​ក្អក ឬ កណ្ដាស់។

ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

ចុចស៊ែរឥឡូវនេះ

ត្រួតពិនិត្យថ្ងៃទី ខែ​កញ្ញា 20, 2019 | កែសម្រួលចុងក្រោយ ខែ​កញ្ញា 20, 2019

អ្នកអាចចូលចិត្ត