ករណី​រក​ឃើញ​វិជ្ជមាន COVID-19២ ករណី​នៅ​កម្ពុជា​ព្រឹក​នេះ​ក្រសួង​សុខាភិបាល​បាន​ប្រកាស មាន​ជនជាតិ​ខ្មែរ ១ និង​ជនជាតិ​កាហ្សាក់ស្ដង់ ១។ ក្នុង​នោះ​ក៏​មាន​អ្នក​ជា​សះស្បើយ ២ នាក់​ទៀត​ដែរ។

អ្នក​រក​ឃើញ ២ ករណី​ថ្មី​នេះ​មាន​បុរស​ជនជាតិ​ខ្មែរ​អាយុ ៣៤ ឆ្នាំ មកពី​ប្រទេស​ប៉ាគីស្ថាន រួច​បន្ត​ជើង​ហោះហើរ​នៅ​ប្រទេស​ម៉ាឡេស៊ី មាន​អាស័យដ្ឋាន​នៅ​ភូមិ​ព្រែក​ថ្មី ឃុំ​ព្រែក​ថ្មី ស្រុក​កោះ​ធំ ខេត្ត​កណ្ដាល។ បន្ទាប់​ពី​តេស្ត​វិជ្ជមាន COVID-19 រួច​ហើយ បុរស​រូប​នោះ​ត្រូវ​បញ្ជូន​ទៅ​សម្រាក​ព្យាបាល​នៅ​មណ្ឌល​សុខភាព​ចាក់​អង្រែ រាជធានី​ភ្នំពេញ។ ចំណែក​ស្រ្តី​ជនជាតិ​កាហ្សាក់ស្ដង់​វ័យ ៤២ ឆ្នាំ​បាន​ចាកចេញ​ពី​ប្រទេស​ខ្លួន រួច​បន្ត​ជើង​ហោះហើរ​នៅ​ប្រទេស​កូរ៉េ​ខាង​ត្បូង ហើយ​ក្រោយ​វិជ្ជមាន​ក្រសួង​បាន​ឲ្យ​សម្រាក​ព្យាបាល​នៅ​មន្ទីរពេទ្យ​មិត្តភាព​ខ្មែរ​សូវៀត។

ចំណែក​អ្នក​ជា​សះស្បើយ​វិញ​មាន​ស្រ្តី​ជនជាតិ​ខ្មែរ​អាយុ ៦០ ឆ្នាំ ដែល​មក​ពី​សហរដ្ឋអាមេរិក និង​កុមារី​ជនជាតិ​អាមេរិក មាន​អាស័ដ្ឋាន​នៅ​ស្ថានទូត​អាមេរិក។

សរុប​តួលេខ​អ្នក​ឆ្លង COVID-19 ទូទាំង​ប្រទេស​មាន​ចំនួន ២៤៣ នាក់​ស្ត្រី ៤៧ និង​បុរស ១៩៦ នាក់​ក្នុង​នោះ​អ្នក​ព្យាបាល​សះស្បើយ​មាន​ចំនួន ២០២ នាក់ ហើយ​កំពុង​សម្រាក​ព្យាបាល​នៅ​មន្ទីរពេទ្យ​រដ្ឋ​ចំនួន ៤០ នាក់ និង​ព្យាបាល​នៅ​បន្ទប់​ដោយ​ឡែក​ក្នុង​ស្ថានទូត​អាមេរិក ចំនួន​២នាក់។