បង្កើតទម្លាប់រស់នៅជាមួយធម្មជាតិ ៥នាទីក្នុង១ថ្ងៃដើម្បីសុខភាពផ្លូវចិត្ដ

ព្រៃឈើគឺជាកំណប់ទ្រព្យយ៉ាងមហាសាលសម្រាប់ជីវិតរស់នៅលើភពផែនដី មិនថាមនុស្ស សត្វនោះទេ គឺតែង​តែ​ពឹងផ្អែកលើជីវិតធម្មជាតិមួយនេះ។ តួយ៉ាងក្នុងពេលថ្មីៗនេះ មានការសិក្សាមួយបង្ហាញលទ្ធផលពីអត្ថប្រយោជន៍របស់ព្រៃឈើ គឺជាឱសថព្យាបាល កែលម្អសុខភាពផ្លូវចិត្ត និងរាងកាយ។

យោងតាមការបង្ហាញរបស់អ្នកស្រីសាស្ដ្រាចារ្យ Kirsten McEwan ឯកទេសផ្នែកសុខភាពផ្លូវចិត្ដ នៅសាក​​ល​វិទ្យា​ល័យ Derby ក្នុងចក្រភពអង់គ្លេស បានបង្ហាញថា ការប្រើប្រាស់ជីវិតរស់នៅជាមួយព្រៃឈើយ៉ាងហោចណាស់ឲ្យបាន ៥ ទៅ ១៥នាទីប្រចាំថ្ងៃ ឬ ១២០នាទីក្នុងមួយសប្ដាហ៍ គឺផ្ដល់អត្ថប្រយោជន៍យ៉ាងច្រើន ដល់សុខភាពផ្លូវចិត្ដ និងរាងកាយ។ ការចំណាយពេលវេលាបន្ដិចបន្ដួចតែអាចផ្ដល់មកវិញនូវគុណសម្បត្ដិយ៉ាងមហាសាល មកដល់សុខភាពរបស់យើង។

អត្ថបទគួរអាន៖ 

• ចូលចិត្ត​ដើរលេងបោះតង់ ​ត្រូវ​ចេះ​តិចនិក​ទាំង​នេះ ចៀសវាង​គ្រោះ​ថ្នាក់​ដោយ​សារ​​ពស់
• ចូល​ចិត្ត​ដើរ​ព្រៃ​ គួរ​ប្រយ័ត្ន! ​ស្លាប់​ និង​ពិការ​រាប់​សែន​នាក់​ដោយ​ពស់​ចឹក
• ចំណាយ ២០​នាទី ជាមួយ​ធម្មជាតិ ជួយបន្ថយ​បញ្ហា​ស្ត្រេសយ៉ាងល្អ
• ទទួល​បាន​វីតាមីន N ពី​ធម្មជាតិ​បៃតង ស្មើ​នឹង​ថ្នាំ​ទិព្វជួយ​សុខភាព​ផ្លូវចិត្ត​
• នៅក្នុងផ្ទះយូរពេកអាចប្រឈមបញ្ហាផ្លូវចិត្ត សាកវិធីនេះអាចជួយដោះស្រាយបាន
• ស្ត្រេសនឹងការងារ ធ្វើឲ្យប៉ះពាល់ដល់សុខភាពបេះដូង

ការលើកឡើងរបស់អ្នកស្រី ស្រដៀងគ្នាទៅនឹងលទ្ធផលរបស់ក្រុមស្រាវជ្រាវ នៃសាកលវិទ្យាល័យ Stanford របស់អាមេរិក ដឹកនាំដោយលោកសាស្រ្តាចារ្យ Greg Bratman បានធ្វើពិសោធន៍ទៅលើមនុស្សមួយក្រុមធ្វើដំណើរទៅកាន់តំបន់ធម្មជាតិ ព្រៃភ្នំ ដែលមានដើមឈើធំៗ ទឹកជ្រោះ ក្នុងរយៈពេល៩០នាទី។ លទ្ធផលបានបង្ហាញថា ពួកគេមិនត្រឹមតែអាចធ្វើឲ្យអារម្មណ៍តានតឹងធ្លាក់ចុះទាបប៉ុណ្ណោះទេ ថែមទាំងថយនូវអារម្មណ៍ក្រៀមក្រំ សោកស្តាយ និងតប់​ប្រមល់ ព្រមទាំងឃើញថាខួរក្បាលមានភាពស្រស់ថ្លាឡើងវិញ។

អ្នកស្រីបន្ថែមទៀតថា ការផ្សារភ្ជាប់ជីវិតជាមួយនឹងព្រៃឈើ មិនចាំបាច់ទាល់តែឡើងភ្នំ ចូលព្រៃនោះទេ យើង​អាចស្វែងរកកន្លែងណាមួយដែលមានបណ្ដុំដើមឈើអាចឲ្យយើងឆ្លងកាត់ អង្គុយលេង បន្ធូអារម្មណ៍ ដកដង្ហើមវែងៗ ផ្ដោតសំខាន់ទៅបរិយាកាសព្រៃឈើដែលជុំវិញខ្លួនយើង នោះយើងនឹងមានអារម្មណ៍ស្រស់ស្រាយ កាត់បន្ថយ​ស្ដ្រេស និង ភាពស្មុគស្មាញ។ ជាក់ស្ដែងណាស់ ធម្មជាតិ ព្រៃឈើ គឺស្ថិតនៅក្បែរខ្លួនយើង ដែលយើងគ្រាន់​តែចំណាយពេលវេលាបន្ដិចបន្ដួចតែប៉ុណ្ណោះដើម្បីបង្កើតទំនាក់ទំនង និង អាចរស់នៅជាមួយនឹងធម្មជាតិដ៏ស្រស់ស្អាតមួយនេះ។ មិនខ្វល់ថាយើងរស់នៅ ក្នុងទីក្រុងទំនើបស៊ីវិល័យណាក៏ដោយ ក៏អាចបង្កើតពេលវេលា ដើម្បី​ប្រើប្រាស់វិធីនេះជាប្រចាំបានដែរ។

មានពេលខ្លះ យើងក៏អាចបង្កើតទម្លាប់ប្រចាំថ្ងៃដូចជា ការឆ្លៀត​​ពេលធ្វើដំណើរ ទៅធ្វើការ ទៅសាលា ការហាត់ប្រាណ យើងក៏អាចដើរកាត់ កន្លែងដែលជាតំបន់​មានដើម​ឈើពណ៌បៃតង អាចនៅតាមដងវិថីដែលមានដាំដើមឈើអម និង ដើមផ្ដាចំរុះពណ៌ ក៏ជាផ្នែកមួយអាចទាក់ទាញអារម្មណ៍របស់យើងស្រស់ស្រាយបានដែរ។ បើស្ថិតក្នុងអាហារពេលល្ងាច មិនថាជាមួយគ្រួសារ ឬម្នាក់​ឯងនោះទេ ក៏អាចផ្លាស់ប្ដូរបរិយាកាស នៅទីតាំងតាមតំបន់ដែលនៅក្បែរហើយមានបរិយាកាសធម្មជាតិរួមជាមួយ។

ជារួមការចំណាយពេលវេលាជាមួយនឹងធម្មជាតិ ព្រៃឈើ គឺជារឿងដែលសំខាន់ដែលយើងអាចធ្វើបានហើយផ្ដល់អត្ថប្រយោជន៍ខ្លាំងទៅដល់សុខភាព ទាំងសា្មរតី និងរាងកាយ។ ដូច្នេះគួរតែចំណាយពេលវេលា យ៉ាងហោចឲ្យបាន ៥ ទៅ ១៥ នាទីជាមួយនឹងធម្មជាតិ ដើម្បីទទួលបានអត្ថប្រយោជន៍យ៉ាងច្រើនពីធម្មជាតិ។

កម្មវិធី​ពិនិត្យ​ជំងឺស្ទះដង្ហើមរ៉ាំរ៉ៃ​អនឡាញ

កម្មវិធីពិនិត្យជំងឺហឺតអនឡាញ

គណនា BMI

គណនា BMR