រឿងឡើងឋានសួគ៌ អាចជួយគ្នាយើងគេចផុតពីបញ្ហាស្ត្រេស តប់ប្រមល់ ឈឺក្បាល ក៏ពិតមែន ប៉ុន្តែពេលខ្លះ អំឡុងពេល ឬក្រោយរួមភេទរួច ក៏អាចធ្វើឲ្យមានអារម្មណ៍ថាឈឺក្បាលបានដូចគ្នា ដោយករណីនេះ គេហៅថា ឈឺក្បាលពេលរួមភេទ។ ខាងក្រោមនេះ “Hello គ្រូពេទ្យ” នឹងប្រាប់គ្នាយើងឲ្យបានដឹងច្បាស់ ក៏ដូចជាដំណោះស្រាយ បើមានជួបប្រទះបញ្ហាឈឺក្បាលពេលរួមភេទ។
រួមភេទសុខៗស្រាប់តែឈឺក្បាល អាចបណ្តាលមកពីមូលហេតុទាំងនេះ
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១- អ្វីទៅជាបញ្ហាឈឺក្បាលពេលរួមភេទ?
ឈឺក្បាលពេលរួមភេទ (Sex headaches) កើតឡើងដោយសារការរួមភេទ ពិសេស នៅពេលយើងឈានដល់ចំណុចកំពូល។ អំឡុងពេលកំពុងប្រយុទ្ធ ស្រើបស្រាលខ្លាំង អារម្មណ៍រំភើបញាប់ញ័រ យើងក៏ប្រហែលជាចាប់អារម្មណ៍ មានតឹងកញ្ចឹងក ឬឈឺក្នុងក្បាលកើត មកជាមួយគ្នា ដោយពេលខ្លះ អាចមានអាការៈឈឺក្បាលខ្លាំងភ្លាមៗ នៅមុន ឬក្រោយពេលឈានដល់ចំណុចកំពូល ហើយអាការៈនេះ ភាគច្រើនកើតឡើង អាចមានរយៈពេលច្រើននាទី ច្រើនម៉ោង ឬអាចឈឺដល់ទៅ ២-៣ ថ្ងៃក៏មាន។
ជាទូទៅ ឈឺក្បាលពេលរួមភេទ មិនបង្កគ្រោះថ្នាក់អ្វីឡើយ ក៏មិនបង្កឲ្យមានផលវិបាកទៅថ្ងៃមុខដែរ។ ប៉ុន្តែយើង ក៏មិនត្រូវធ្វើមិនដឹងមិនឮពីបញ្ហានេះដូចគ្នា ព្រោះពេលខ្លះ ឈឺក្បាលនៅពេលរួមភេទ អាចជាសញ្ញាប្រាប់យើងឲ្យដឹងថា កំពុងមានបញ្ហាគ្រោះថ្នាក់ណាមួយរួចទៅហើយ ដូចជា បញ្ហាសរសៃឈាម ជាដើម ទាមទារទៅជួបគ្រូពេទ្យ ដើម្បីដោះសា្រយបញ្ហាទាំងអស់នោះ។
២- មូលហេតុធ្វើឲ្យមានឈឺក្បាលពេលរួមភេទ
រហូតមកដល់ពេលនេះ គេមិនទាន់អាចកំណត់ពីមូលហេតុឲ្យបានច្បាស់នៅឡើយទេ។ ប៉ុន្តែក្រុមគ្រូពេទ្យជាច្រើនជឿថា អាការៈឈឺក្បាលពេលរួមភេទ បណ្ដាលមកពីការកើនឡើងសម្ពាធឈាម អាចកើនឡើងនៅពេលរួមភេទ ពិសេស នៅពេលយើងឈានដល់ចំណុចកំពូល។ ហើយមួយវិញទៀត យើងក៏មិនអាចនិយាយបានថា អាការៈឈឺក្បាលមួយនេះ កើតឡើងតែលើគ្នាយើងអ្នកជំងឺលើសឈាមនោះដែរ ព្រោះមិនទាន់មានភស្តុតាងបញ្ជាក់ពីទំនាក់ទំនងឲ្យបានច្បាស់នៅឡើយទេ។
ឈឺក្បាលពេលរួមភេទ ឧស្សាហ៍កើតឡើងនៅលើបុរសវ័យចំណាស់ ច្រើនជាងក្មេងប្រុសពេញវ័យ។ ប៉ុន្តែបើមានបញ្ហាស្ត្រេស ឬអារម្មណ៍មិនល្អ ទោះនៅវ័យក្មេងក៏ដោយ នៅតែអាចប្រឈមជាមួយបញ្ហាមួយនេះដូចគ្នា។
ក្រៅពីមូលហេតុមិនច្បាស់លាស់នៃអាការៈឈឺក្បាលប្រភេទនេះ ក៏នៅមានមូលហេតុ ៤ សំខាន់ៗ អាចទាក់ទងគ្នា រួមមាន៖
– បញ្ហាសរសៃឈាមអាក់ទែ ព្រោះជញ្ជាំងសរសៃឈាមក្នុងក្បាលអាចរីក ឬប៉ោង គេហៅថា Intracranial aneurysm បញ្ហាមិនប្រក្រតីរបស់សរសៃឈាមវ៉ែនក្នុងខួរក្បាល (Arteriovenous Malformation) ក៏អាចជាបញ្ហាសរសៃឈាមអាក់ទែ មានហូរឈាមខាងក្នុង ហូរឈាមនៅជុំវិញខួរក្បាល ឬហូរចូលទៅក្នុងជញ្ជាំងសរសៃឈាម (ដាច់សរសៃឈាម) និងបញ្ហានៅសរសៃឈាមទៅចិញ្ចឹមសាច់បេះដូង ជាដើម។
– ជំងឺដាច់សរសៃឈាមខួរក្បាល
– ប្រើប្រាស់ថ្នាំមួយចំនួន ដូចជា ថ្នាំពន្យារកំណើត
– មានការរលាកដោយសារឆ្លងរោគនៅកន្លែងណាមួយក្នុងរាងកាយ។
៣- កត្តាធម្មជាតិបណ្តាលឲ្យឈឺក្បាលពេលរួមភេទ
បើអាការៈឈឺក្បាលនេះ បណ្តាលមកពីកត្តាធម្មជាតិ វាអាចនឹងមិនកើតឡើងម្ដងទៀតឡើយ ក្នុងករណីខ្លះវាអាចកើតឡើងញឹកញាប់ កើត ១-២ ដង/សប្ដាហ៍ ឬមួយខែ បន្ទាប់ពីរួមភេទ ហើយនឹងក៏បាត់ទៅវិញដោយឯកឯង។
៤- ពេលណាគួរទៅជួបគ្រូពេទ្យ?
ឈឺក្បាលពេលរួមភេទ គឺមិនមែនជាបញ្ហាគំរាមកំហែងអាយុជីវិតឡើយ មានន័យថា មិនដល់ថ្នាក់ធ្វើឲ្យយើងត្រូវបារម្ភច្រើនពេកទេ។ ប៉ុន្តែ យើងក៏គួរតែទៅជួបជាមួយគ្រូពេទ្យជំនាញ បើបញ្ហាឈឺក្បាលពេលកំពុងរួមភេទ ពិសេស ពេលប្រទះឃើញមានបញ្ហានេះលើកដំបូង ឬអ្នកចាប់ផ្ដើមឈឺក្បាលភ្លាមៗមួយរំពេច។
នៅពេលអាការៈឈឺក្បាលកើតឡើងញឹកញាប់ រហូតដល់ថ្នាក់ទ្រាំមិនបាន ឬបញ្ហាមួយនេះ ធ្វើឲ្យប៉ះពាល់ដល់ការរស់នៅប្រចាំថ្ងៃ គួរតែទៅជួបគ្រូពេទ្យជាបន្ទាន់ ព្រោះអាចជាសញ្ញាបញ្ជាក់ស្ថានភាពសុខភាពណាមួយ កំពុងកើតឡើងក្នុងខ្លួនយើង ទាមទារការព្យាបាលជាចាំបាច់ ដើម្បីទប់ស្កាត់បញ្ហាធ្ងន់ធ្ងរ ដែលនឹងអាចកើតឡើងទៅថ្ងៃមុខ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម