បើទារកមានសញ្ញា ៣ នេះ បញ្ជាក់ថាមានបញ្ហាប្រព័ន្ធរំលាយអាហារហើយ

ការញ៉ាំ ឬរំលាយអាហារ មាននាទីសំខាន់ក្នុងការអភិវឌ្ឍ និងរីកលូតលាស់សម្រាប់ទារក។ ទារក ភាគច្រើនញ៉ាំអាហារបំប៉នបែបធម្មតា និងមានសុខភាពល្អលើពោះវៀន ប៉ុន្តែពេលខ្លះ មុខងារទាំងនេះ អាចមិនដំណើរការបានដូចធម្មតា ហើយអាចជាបញ្ហាស្រាល ឬធ្ងន់ធ្ងរ ក៏មាន។ “Hello គ្រូពេទ្យ” នឹងណែនាំប៉ាម៉ាក់ទាំងអស់ឲ្យចេះប្រុងប្រយ័ត្នខ្ពស់លើការរំលាយអាហាររបស់កូន ខណៈបើទារកមានសញ្ញាណាមួយក្នុងចំណោមសញ្ញាទាំង ៣ ខាងក្រោម អាចនឹងមានបញ្ហាប្រព័ន្ធរំលាយអាហារមិនខាន។

១- ក្អួត

អាការៈក្អួតចំពោះទារក ភាគច្រើនបណ្តាលមកពីការឆ្លងមេរោគលើពោះវៀន បង្កឡើងដោយវីរុស។ រោគសញ្ញាដំបូងនៃជំងឺ ច្រើនតែជាការក្អួត និងមានរោគសញ្ញាផ្សេងទៀត ដូចជា គ្រុនក្តៅ ឬរាក អាចកើតមានក្នុងពេលតែមួយ។ ការឆ្លងមេរោគទាំងនេះ ជាទូទៅយើងឃើញថាមានរយៈពេល ២-៣ ថ្ងៃ ឯការញ៉ាំរបស់ទារក ក៏មិនគ្រប់តាមតម្រូវការដែរ។

ចង់ដឹងអត្ថន័យពណ៌ និងរូបរាងលាមកទារក ចុចទីនេះ !

ចង់គណនាទម្ងន់ស្រ្តីពពោះ ចុចទីនេះ !

ចង់គណនាថ្ងៃមេជីវិតញីទុំធ្លាក់ ចុចទីនេះ !

បើកន្ទបកូន មិនសើមដូចធម្មតា ឬបរិមាណហូរទឹកមាត់តិចជាងមុន នោះកូនយើងអាចនឹងមានបញ្ហាខ្វះជាតិទឹកទៀតផង។ ក្នុងស្ថានភាពនេះ បើកូនយើងមិនព្រមបៅដោះ ត្រូវឲ្យសារធាតុអេឡិចត្រូលីតទៅកូន ដូចជា Pedialyte ឬ Rehydralyte រៀងរាល់ ១៥ នាទីម្តង។

ករណីកម្រ អាការៈក្អួតរបស់កូន អាចជាសញ្ញាមិនប្រក្រតីរបស់បំពង់រំលាយអាហារ អាចមកពីសាច់ដុំនៅផ្នែកខាងចុងក្រពះឡើងក្រាស់ រារាំងទឹកដោះ មិនអាចហូរឆ្លងកាត់បាន។ ស្ថានភាពបែបនេះ គេហៅថា Stenosis Pyloric ជាទូទៅ កើតឡើងចំពោះទារកមានអាយុចន្លោះពី ៣-៥ សប្តាហ៍ ឯមូលហេតុនាំឲ្យមានបញ្ហានេះ មិនទាន់ត្រូវគេរកឃើញនៅឡើយទេ។ ការធ្វើរោគវិនិច្ឆ័យ ឃើញថាកូនយើងមានជំងឺ Stenosis មានន័យថា ទារកត្រូវធ្វើការវះកាត់ ដើម្បីបើកផ្លូវនៅផ្នែកខាងចុងក្រពះ។

ទារកក្អួត

២- ចាល់ទឹកដោះមកវិញ

បើគ្រប់ពេលបំបៅកូន កូនតែងហៀរទឹកមាត់ ឈ្លក់ ឬមិនព្រមបៅ និងក្អែទឹកដោះមកវិញ ករណីនេះកើតឡើងនៅពេលមានអាហារក្នុងក្រពះចាល់ត្រលប់ទៅក្នុងបំពង់អាហារវិញ ដែលបណ្តាលឲ្យបំពង់អាហារឡើងក្រហម និងរលាក។ ការចាល់អាហារពីក្រពះទៅបំពង់អាហារ អាចធ្វើឲ្យកូនក្អួត និងអាចឲ្យអាហារទាំងនោះ ហូរចូលក្នុងសួតបាន។

វិធីជួយដល់ទារក ពេលជួបករណីនេះ៖

– មិនត្រូវស្លៀកកន្ទបឲ្យកូនតឹងពេកទេ។

– ត្រូវបញ្ចុកអាហារដល់កូនក្នុងបរិមាណតិចៗ និងយឺតៗ ប៉ុន្តែត្រូវបញ្ចុកឲ្យបានញឹកញាប់។ អាហារតិចតួច អាចជួយសម្រួលដល់ការរំលាយអាហារ និងទប់ស្កាត់ ការចាល់អាហារមកវិញ។

៣- រាក

បញ្ហារាកចំពោះទារក ភាគច្រើនបណ្តាលមកពីមេរោគ ជាធម្មតាបង្កដោយមេរោគ Rotavirus ។ មេរោគនេះ ភាគច្រើនកើតមានក្នុងរដូវរងា ហើយច្រើនកើតលើក្មេងអាយុចាប់ពី ៦-២៤ ខែ។ អ្វីយើងត្រូវធ្វើពេលដឹងថាមានការឆ្លងមេរោគនេះ គឺត្រូវមានអនាម័យជានិច្ច។ ដើម្បីបានរោគវិនិច្ឆ័យកាន់តែច្បាស់ ពេទ្យឯកទេសខាងរោគកុមារ នឹងធ្វើការពិនិត្យលើលាមកក្មេង។

បើកូននៅតែបន្តរាករយៈពេលច្រើនជាង ២-៣ សប្តាហ៍ តែគ្មានរោគសញ្ញាជំងឺផ្តាសាយ ឬគ្រុនក្ដៅ នោះក្មេងអាចនឹងមានប្រតិកម្មជាមួយទឹកដោះគោបានបៅមិនខាន។ រោគសញ្ញាប្រតិកម្មនឹងទឹកដោះគោ គឺរាកមានលក្ខណៈជាទឹក (ជួនកាលអាចមានឈាម និងទឹករំអិល) ឈឺពោះ ពិសេសនៅពេលមានចលនាពោះវៀន និងមានកន្ទួលលើស្បែក។ ក្នុងករណីនេះ គួរទៅពិគ្រោះជាមួយគ្រូពេទ្យរោគកុមារ ដើម្បីទទួលការណែនាំល្អៗ និងបើកថ្នាំប្រឆាំងប្រតិកម្មដែលត្រឹមត្រូវ។

អត្ថបទគួរអាន៖

ត្រួតពិនិត្យដោយ

Editor HK

អត្ថបទដោយ ចាន់ សុខឡាង · កែ 04/11/2024

បើទារកមានសញ្ញា​ ៣ នេះ បញ្ជាក់ថាមានបញ្ហាប្រព័ន្ធរំលាយអាហារហើយ

១- ក្អួត

២- ចាល់ទឹក​ដោះ​មកវិញ

៣- រាក

បើទារកមានសញ្ញា ៣ នេះ បញ្ជាក់ថាមានបញ្ហាប្រព័ន្ធរំលាយអាហារហើយ

២- ចាល់ទឹកដោះមកវិញ