ការថែទាំទារក

ទារកទើបកើតចំណាយពេលច្រើនលើការគេង ប្រសិនបើអូនតូចយំ​ មានន័យថាអូនតូចត្រូវការ​ការយកចិត្តទុកដាក់ពីមនុស្សធំហើយ។ ដោយ​សារ​អូនតូចមិនទាន់ចេះនិយាយ ឬប្រើកាយវិការ អូន​តូច​ប្រើការយំដើម្បីទំនាក់ទំនងជាមួយប៉ាម៉ាក់ ឬអ្នកនៅជុំវិញខ្លួន។ ប៉ាម៉ាក់​ថ្មីថ្មោង​អាចពិបាក​​ក្នុងការ​ដឹងពីតម្រូវការរបស់អូនតូច ខាងក្រោមនេះជាតិចនិចដោះស្រាយពេលអូនតូចយំ។ មានមូលហេតុជាច្រើនដែលបណ្តាលឱ្យអូនតូចយំ ១. អូនតូចឃ្លាន៖ នេះជាមូលហេតុទូទៅបំផុតដែលធ្វើឱ្យអូនតូចយំ។ ដោយសារ​​ក្រពះររបស់ទារក​ទើប​កើតនៅតូច អូនតូចមិនអាចបៅម្តងបាន​ច្រើនទេ ដូច្នេះអូនតូចត្រូវការបៅញឹកញាប់។  ម៉ាក់ៗ​គួរ​បំបៅអាអូនរៀងរាល់ ១-៣ ម៉ោងម្តង និង ៨-១២ ដង/ថ្ងៃ។ ២. អូនតូចឈឺ ឬហើមពោះ៖ ម៉ាក់ប៉ាអាចសម្គាល់ដោយឃើញអូនតូចក្តាប់​ដៃ បត់ជង្គង់ ឬអែនខ្នង មុខ​ឡើងក្រហម ទោះលួងយ៉ាងម៉េចក៏មិនបាត់​យំ។ វាអាចបណ្តាលមក​ពីបញ្ហា​ប្រព័ន្ធរំលាយអាហារ​របស់អូនតូច ឬអូនតូច​អាលែកហ្ស៊ីជាមួយអ្វីមួយនៅក្នុងទឹកដោះម្តាយ ឬម្សៅទឹកដោះគោ ឬក្បាល​ដបទឹកដោះគោដែលអូនតូចបៅមិនជួយរាំងទប់ខ្យល់ក្នុងដប ដែលធ្វើឱ្យ​អូនតូចបឺត​ខ្យល់ច្រើន​ចូលពោះ។ ម៉ាក់ប៉ាអាច​ម៉ាស្សាពោះអាអូនតាម​​ទិសដៅទ្រនិចនាឡិកា ឬរឺតខ្នងអូនតូចថ្នមៗ។ ប៉ា​ម៉ាក់​ត្រូវ​បញ្ឈរ​អា​អូនទប់នឹងទ្រូង។ ត្រូវដាក់​ចង្កា​អាអូនលើ​ស្មា​ និងយកដៃទប់ក្បាលអាអូន យកបាត​ដៃម្ខាងទៀតរឺតខ្នងអូនតូចថ្នមៗពីចង្កេះឡើងលើ។ ការរឺតខ្នងនេះ​តម្រូវឱ្យម៉ាក់ប៉ាកោងបាតដៃ ព្រោះ​ការ​ធ្វើបែបនេះនឹងបន្ថយសម្ពាធ​លើ​ខ្នងអាអូន។ កាលវិភាគចាក់ថ្នាំបង្ការ មើលនៅទីនេះ ៣. អូនតូចត្រូវការដូរខោទឹកនោម៖ អូនតូចក៏យំដែរ ប្រសិនបើខោទឹក​នោម​សើម ប្រឡាក់លាមក ឬរោលជាមួយខោទឹកនោម។ ៤. អូនតូចរងា ឬស្អុះពេក៖ ប៉ាម៉ាក់អាចដឹងថាអាអូនរងា ឬស្អុះពេកដោយយកដៃស្ទាបពោះ ឬកញ្ចឹង​ក​អាអូន។ កុំស្ទាបបាតដៃ ឬប្រអប់ជើងអាអូន ព្រោះជាមធ្មតាបាតដៃ ឬប្រអប់ជើង​តែងតែត្រជាក់​ជាង​រាងកាយ។ […]

លាមកព្រៃគឺជាលាមកដំបូងរបស់ទារកទើបនឹងកើត មានសភាពខាប់ ស្អិត​​ និងមានពណ៌បៃតងចាស់។ ជាធម្មតាទារកនឹងជុះលាមកព្រៃក្នុងរយៈពេល ២៤ ម៉ោងដំបូងបន្ទាប់ពីកើត និងយូរបំផុត មិន​លើសពី ៤៨ ម៉ោង។ ចុះមានបញ្ហាអត់ បើទារកមិនជុះលាមកព្រៃ? លាមកព្រៃកើតឡើងពីកោសិកាពោះវៀនរបស់ទារក កាកសំណល់ដែលបញ្ចេញ​ដោយ​ប្រព័ន្ធ​រំលាយ​អាហារ​របស់​ទារក និងទឹកភ្លោះដែលទារកលេបចូលក្នុងពោះពេលនៅក្នុងផ្ទៃ។ ទារកចាប់​ផ្តើម​មានលាមកព្រៃនៅដើមត្រីមាសទី ២ នៃការមានផ្ទៃពោះរហូតដល់ពេលសម្រាល។ អត្ថន័យពណ៌ និងរូបរាងលាមកទារក ចុចទីនេះ ប្រសិនបើទារកទើបកើតមិនជុះលាមកព្រៃក្នុងអំឡុងពេល ៤៨ ម៉ោងទេ ទារកអាចប៉ោងពោះ និង​ក្អួត។ វាអាចបណ្តាលមកពី៖ – លាកមកព្រៃស្អិតខ្លាំង – ជំងឺក្រពេញទីរ៉ូអ៊ីត – ជំងឺសួត និងប្រព័ន្ធរំលាយអាហារស្ទះដោយសារស្លេស្ម – ស្ទះ ឬបាត់ផ្នែកណាមួយនៃពោះវៀន – ពោះវៀនរួមតូច – ទារកគ្មានរន្ធគូទ ប្រសិនបើទារកទើបកើតមិនជុះលាមកព្រៃទេ ប៉ាម៉ាក់ត្រូវប្រាប់ពេទ្យជាបន្ទាន់ ការយឺតយ៉ាវក្នុងការព្យាបាលអាចធ្វើឱ្យទារកមានគ្រោះថ្នាក់។

ទារក​ទើប​កើត​ពក​ក្បាល អាច​បណ្ដាល​មក​ពី​មាន​ការ​ហូរ​ឈាម​នៅ​ក្រោម​ស្បែក​ក្បាល​អា​អូន បង្ក​ឡើង​ដោយ​ការ​ប៉ះ​ទង្គិច​ក្បាល​ជាមួយ​នឹង​អាង​ត្រគាក​ម្ដាយ​តាម​រយៈ​ការ​សម្រាល​ដោយ​ធម្មជាតិ។ នេះ​បើ​តាម​ការ​ពន្យល់​ឲ្យ​ដឹង​ពី​លោក​ស្រី​វេជ្ជបណ្ឌិត កុសល កណិការ ឯកទេស​ជំងឺ​កុមារ។ ការ​ហូរ​ឈាម​បណ្ដាល​ឲ្យ​ទារក​ទើប​កើត​ពក​ក្បាល (Cephalohematoma) ស្ថិត​នៅ​ចន្លោះ​ឆ្អឹង​លលាដ៍​ក្បាល និង​ស្បែក​ក្បាល​ដែល​មិន​មាន​ប៉ះពាល់​ដល់​សាច់​ខួរ​ក្បាល​ឡើយ។ ហេតុ​ដូច្នេះ​ហើយ​កុមារ​ដែល​មាន​បញ្ហា​នេះ​មាន​ការ​លូតលាស់​ខួរក្បាល​ធម្មតា។ Cephalohematoma ដំបូង​មាន​លក្ខណៈ​ទន់ៗ បន្ទាប់​មក​វា​វិវត្ត​ទៅ​ជា​រឹង​បន្តិច​ម្ដង​ៗ និង​ត្រូវ​ការ​ប្រើ​រយៈ​ពេល​យូរ ដើម្បី​ឲ្យ​ដុំ​រឹង​នោះ​រលាយ​បាត់ (អាច​ច្រើន​ខែ)។ លោក​ស្រី​បន្ត​ថា ចំពោះ​បញ្ហា​ទារក​ទើប​កើត​ពក​ក្បាល ដោយ​សារ​ប៉ះ​ទង្គិច​នឹង​អាង​ត្រគាក​ម្ដាយ​មាន​ប្រហែល ១-២% កើត​លើ​ទារក​សម្រាល​តាម​ធម្មជាតិ​ដោយ​ឯក​ឯង និង​៣-៤% សម្រាល​ដោយ​ធម្មជាតិ​ដែល​មាន​ការ​ប្រើ​ឧបករណ៍​ជំនួយ​ក្នុង​ការ​ទាញ​ក្បាល​ទារក។ បញ្ហា​ទារក​ទើប​កើត​ពក​ក្បាល​នេះ​ដែរ ក៏​មាន​ផ្ដល់​ផល​វិបាក​ដូច​ជា៖ ធ្វើ​ឲ្យ​កុមារ​មាន​ស្បែក​លឿង​រយៈ​ពេល​យូរ ពី​ព្រោះ​ឈាម​ដែល​ហូរ​នៅ​ក្រោម​ស្បែក​នោះ​នឹង​បំប្លែងទៅ​ជា​សារជាតិ​លឿង ធ្វើ​ឲ្យ​កុមារ​មាន​សញ្ញា​ស្លេក​ស្លាំង​ក្នុង​ករណី​ដែល​ឈាម​ហូរ​ច្រើន​ ធ្វើ​ឲ្យ​មាន​ការ​បង្ក​រោគ​ដែល​បណ្ដាល​ទារក​ក្ដៅ​ខ្លួន វេជ្ជបណ្ឌិត​សញ្ញា​ប័ត្រ​ពី​ប្រទេស​បារាំង​រូប​នេះ​បន្ថែម​ឲ្យ​ដឹង​ថា ប្រសិន​បើ​ទារក​ទើប​កើត​ពក​ក្បាល ហើយ​មាន​ស្បែក​លឿង ស្លេក​ស្លាំង និង​ក្ដៅ​ខ្លួន (​កម្ដៅ​លើស​ពី ៣៧.៥) ម៉ាក់​ប៉ា​ត្រូវ​ប្រញាប់​យក​កូន​ទៅ​ពិគ្រោះ​យោបល់​ជា​មួយ​នឹង​គ្រូពេទ្យ។ ទោះ​បី​ជា Cephalohematoma មិន​មាន​ផល​ប៉ះពាល់​ដល់​ខួរ​ក្បាល​ទារក ប៉ុន្តែ​វា​អាច​មាន​ការ​ភាន់​ច្រឡំ​ជាមួយ​នឹង​បញ្ហា​ផ្សេង​ជា​ជំងឺ​នៅ​តំបន់​ក្បាល​ទារក។

ពេលយើងទៅហាងបេប៊ីរកមើលទិញដបទឹកដោះគោកូន ចម្ងល់ជាច្រើននឹងលេចឡើងមកថាដបទឹកដោះគោប្រភេទណាគួរទិញមកប្រើ? គួរឲ្យអាអូនប្រើទំហំប៉ុនណា? ឬក្បាលដោះជ័រប៉ុនណាទើបស័ក្ដិសមនឹងកូនយើង? កុំបារម្ភ! ម៉ាក់ប៉ាអាចស្វែងយល់ពីប្រភេទដបទឹកដោះគោដែលស័ក្ដិសមសម្រាប់ទារក តាមប៉ុន្មានចំណុចខាងក្រោមនេះ ដើម្បីកាន់តែងាយស្រួលជ្រើសរើសពេលទៅទិញនៅហាងម្ដងៗ។ ប្រភេទនៃដបទឹកដោះគោ ដបទឹកដោះគោទារកមានច្រើនទំហំ រូបរាង និងវត្ថុធាតុដើម។ ដបទឹកដោះគោខ្លះរាងវែងធម្មតា ខ្លះទៀតវៀចក (ការពារទារកមិនឲ្យលេបខ្យល់) និងដបខ្លះទៀតមានកទូលាយ (ដបកទូលាយងាយស្រួលលាងសម្អាត)។ ដបទឹកដោះគោភាគច្រើនមានដបទឹកដោះគោថ្ម ប្លាស្ទិច silicone ឬដបដែក។ល។ ប្រភេទនៃក្បាលដោះជ័រ ក្បាលដោះជ័រមានកម្រិតសម្រាប់លំហូរទឹកដោះគោខុសៗគ្នា។ ក្បាលដោះជ័រដែលមានលំហូរយឺតបំផុតគឺស័ក្ដិសមសម្រាប់ទារកទើបនឹងកើត។ ម៉ាក់ប៉ាអាចជ្រើសរើសយកក្បាលដោះជ័រជាប្រភេទsilicone (មាំ និងប្រើបានយូរ) ឬក៏ជ័រ latex(ទន់ និងប្រើបានរយៈពេលខ្លី)។ យើងគួរចំណាំផងដែរថា ទារកមួយចំនួនអាលែកហ្ស៊ីនឹងជាតិ latex របស់ក្បាលដោះជ័រ។ ម៉្យាងវិញទៀត យើងត្រូវមានក្បាលដោះជ័របម្រុងទុកផ្លាស់ប្ដូរ ពិសេសគួរប្ដូរនៅពេលដែលក្បាលដោះជ័រកំពុងប្រើបែក ឡើងពណ៌លឿង ស្លេកពណ៌ ឬចាប់ផ្ដើមស្ដើង។ យើងគួរជ្រើសរើសដបទឹកដោះគោប្រភេទណាទើបស័ក្ដិសមនឹងកូន? តាមពិតទៅ ដើម្បីដឹងថា ប្រភេទណាសមនឹងកូនប្រើ ដំបូងយើងគួរទិញ១-៣ដបខុសៗគ្នា សាកប្រើ និងតាមដានថា អាអូនប្រើបានមួយណាជាងគេ។ លើសពីនេះ ម៉ាក់ប៉ាអាចជ្រើសរើសដបទឹកដោះគោបានដោយ៖ ទិញដបធំ៖ ការទិញទឹកដោះគោទំហំធំស្រាប់ អាចជួយម៉ាក់ប៉ាសន្សំសំចៃលុយបានខ្លះ ព្រោះអាចប្រើបានដល់អាអូនធំបន្តិច។ បន្ថែមពីនេះ យើងអាចទិញដបទឹកដោះគោដែលមានលក្ខណៈពិសេសដូចជា វៀចក ឬដបដែលខ្យល់មិនសូវចូលបាន ដើម្បីជួយកុំឲ្យមានខ្យល់ចូលពោះកូនពេលបៅទឹកដោះគោ។ គិតជាមុនបើម៉ាក់ៗមានគម្រោងប៉ូមទឹកដោះ៖ សម្រាប់ម៉ាក់ៗដែលចង់ប៉ូមទឹកដោះខ្លួនទុកសម្រាប់ឲ្យអាអូន គួរទិញដបទឹកដោះគោម៉ាក់ដូចគ្នានឹងប្រដាប់ប៉ូមទឹកដោះដែរ ព្រោះវាផ្ដល់ភាពងាយស្រួល […]

គ្នា​យើង​មួយ​ចំនួន​ច្បាស់​ជា​យល់​ឃើញ​ថា អាការៈ​ត្អើក ជា​អាការៈ​ដ៏​រំខាន​មួយ ពិសេស​ពេល​យើង​កំពុង​ញ៉ាំ​អាហារ​ហើយ​ត្អើក​កើត​ឡើង។ ស្រប​គ្នា​នេះ ទារក​ក៏​អាច​ត្អើក​ដូច​មនុស្ស​ធំ​ដែរ ប៉ុន្តែ​ម៉ាក់​ប៉ា​មួយ​ចំនួន​បែរ​ជា​កើត​ក្ដី​បារម្ភ​ទាក់ទង​នឹង​បញ្ហា​ទារក​ត្អើក​ញឹក​ញាប់។ តែ​កុំ​បារម្ភ! អត្ថបទ​នេះ​នឹង​បក​ស្រាយ​ពី​មូល​ហេតុ​ទារក​ត្អើក​ញឹកញាប់ និង​ដំណោះ​ស្រាយ​សម្រាប់​ម៉ាក់​ប៉ា​ជួយ​អា​អូន។ ​មូល​ហេតុ​ទារក​ត្អើក​ញឹកញាប់ អាច​បណ្ដាល​មកពី​យើង​ព្យាយាម​​ឲ្យ​កូន​ម៉ឹម​លឿន ម៉ឹម​ឆ្អែត​ពេក ញ៉ាំ​ច្រើន​ពេក ផឹក​ច្រើន ឬ​លឿន​ព្រោះ​វា​បណ្ដាល​ឲ្យ​ឈ្លក់ កូន​លេប​ខ្យល់​ចូល​ក្នុង​ពោះ ហើយ​កត្តា​ផ្លាស់ប្ដូរ​អាកាសធាតុ​​ក៏​អាច​បណ្ដាល​ឲ្យ​ទារក​ជួប​បញ្ហា​នេះ​ច្រើន​​ដែរ។ នេះ​បើ​តាម​ការ​ឲ្យ​ដឹង​ពី​លោក​វេជ្ជបណ្ឌិត ចាន់ ស៊ីណេត ឯកទេស​ជំងឺ​ទូទៅ។ លោក​បន្ថែម​ឲ្យ​ដឹង​ថា មូល​ហេតុ​ទារក​ត្អើក​ញឹកញាប់ ក៏​អាច​កើត​ឡើង​ដោយសារ​សាច់​ដុំ​សន្ទះ​ទ្រូង នៅ​សុខ​ៗ​ស្រាប់​តែ​កន្ត្រាក់​ភ្លាម​ៗ។ ក្រៅ​ពី​ការ​ត្អើក​ដោយ​សារ​ម៉ឹម​ដោះ​ម៉ាក់ៗ ឬ​ម៉ឹម​ទឹក​ដោះ​គោ អា​អូន​ក៏​អាច​ត្អើក​ព្រោះ​តែ​ការ​ច្រាល​ក្រពះ​ពោះវៀនដែរ។ ក្នុង​ករណី​ទារក​ច្រាល​ក្រពះ​ពោះ​វៀន ត្អើក​មិន​មែន​ជា​រោគ​សញ្ញា​តែ​មួយ​ទេ នៅ​មាន​សញ្ញា​មួយ​ចំនួន​រួម​ផ្សំ​ទៀត​ដូច​ជា៖ ក្អក ក្អែ មួម៉ៅ យំ ពើង​ទ្រូង (ពិសេស​ពេល​កំពុង​បៅ ឬ​ក្រោយ​បៅ​រួច)។ ទោះ​ជាង​យ៉ាង​ណា​ក៏​ដោយ មូល​ហេតុ​ទារក​ត្អើក​ញឹក​ញាប់ មិន​មែន​ជា​រឿង​ធំ​ដុំ​របស់​ទារក​ដែល​ម៉ាក់​ប៉ា​គួរ​បារម្ភ​ពេក​ទេ។ យើង​អាច​ដោះ​ស្រាយ​អាការៈ​ត្អើក​លើ​ទារក​បាន​ជា​មួយ​តិចនិក​ដូច​ជា៖ ព្យាយាម​ឲ្យ​កូន​បៅ​បន្ថែម​តិច​ៗ លើក​កូន​ឲ្យ​ផ្កាប់​លើ​ស្មា​យើង និង​រឹត​ខ្នង​កូន​តិចៗ អាច​ពញ្ញាក់​កូន បើ​កូន​មាន​ភាព​រំញោច។ ចំណាំ៖ បើ​ទារក​ត្អើក​យូរ​ដល់​២​ម៉ោង ម៉ាក់​ប៉ា​ត្រូវ​នាំ​កូន​ទៅ​ពិគ្រោះ និង​ពិនិត្យ​ជាមួយ​គ្រូពេទ្យ​ឲ្យ​បាន​លឿន។

ទារក​ពុល​ឡាន អាច​ជា​បញ្ហា​មួយ​ដែល​ម៉ាក់​ប៉ា​មិន​សូវ​ឮ​ញឹក​ញាប់​ប៉ុន្មាន​ទេ ប៉ុន្តែ​ទារក​មួយ​ចំនួន​អាច​ពុល​ ពេល​កំពុង​ជិះ​ឡាន​មើល​ទេសភាព​ខាង​ក្រៅ​។ រាល់​ពេល​ពុល​ឡាន ទារក​ខ្លះ​ចេញ​សញ្ញា​ឲ្យ​ម៉ាក់​ប៉ា​ដឹង ខ្លះ​ទៀត​មិន​មាន​សញ្ញា​ថា​អា​អូន​កំពុង​ពុល​ឡាន​ទេ ហេតុ​នេះ​ហើយ ម៉ាក់​ប៉ា​ត្រូវ​ចេះ​តាម​ដាន​សម្គាល់​មើល​សញ្ញា​ដោយ​ខ្លួន​ឯង ចៀស​វាង​ក្នុង​ខ្លួន​កូន​ធ្វើ​ទុក្ខ។ ​មិន​ច្បាស់​ទេ​ថា ​ហេតុ​អី​បាន​ជា​បញ្ហា​ពុល​ឡាន​ប៉ះពាល់​ដល់​ទារក និង​កុមារ​មួយ​ចំនួន ពិសេស​កុមារ​អាយុ​ពី ២ ទៅ ១២ ឆ្នាំ​ងាយ​នឹង​ទទួល​រង​គ្រោះ​ថ្នាក់​ខ្លាំង​ណាស់។ ខាង​ក្រោម​នេះ​ជា​រោគ​សញ្ញា​ដែល​ទារក និង​កុមារ​ពុល​ឡាន​តែង​បង្ហាញ​ដូច​ជា៖ ចង់គណនាថ្ងៃសម្រាលកូន ចុចទីនេះ! ចង់គណនាទម្ងន់ស្រ្តីពពោះ ចុចទីនេះ! ចង់គណនាថ្ងៃមេជីវិតញីទុំធ្លាក់ ចុចទីនេះ! ​ចង្អោរ ក្អួត បែក​ញើស វិល​មុខ ឈឺ​ក្បាល ល្ហិតល្ហៃ មុខ​មាត់​ស្លេក ហៀរ​ទឹក​មាត់។ល។ ដោយសារ​តែ​ទារក និង​កុមារ​ទើប​តែ​ជិះ​រថយន្ត រាងកាយ​របស់​ពួក​គេ​អាច​ស៊ាំ​នឹង​ចលនា​ឡាន​ពេល​ជិះ​យូរ​ៗទៅ ហើយ​បញ្ហា​ពុល​ឡាន​អាច​បាត់​ទៅ​វិញ​ដោយ​ឯកឯង។ យ៉ាង​ណា​មិញ ក្នុង​ករណី​ដែល​អា​អូន​មិន​ទាំ​ស៊ាំ​នឹង​ការ​ជិះ​ឡាន ម៉ាក់​ប៉ា​អាច​ដោះ​ស្រាយ​បញ្ហា​ទារក​ពុល​ឡាន​បាន​តាម​តិចនិក​ខាង​ក្រោម​នេះ៖ [embed-health-tool-baby-poop-tool] – ផ្ដល់​អាហារ​សម្រន់​ស្រាល​ៗ​ឲ្យ​កូន​ញ៉ាំ​មុន​ឡើង​ឡាន ចៀសវាង​អាហារ ឬ​ភេសជ្ជៈ​ដែល​មាន​ជាតិ​អាស៊ីដ​ខ្ពស់ (ទឹក​ផ្លែឈើ និង​ភេសជ្ជៈ​ជូរ​ៗ)។ អាហារ​ល្អ​ៗ ដែល​ត្រូវ​បរិភោគ​រួម​មាន oatmeals នំប៉័ង និង​ចេក​ជា​ដើម។ – ព្យាយាម​បង្វែរ​អារម្មណ៍​កូន​ឲ្យ​ឆ្ងាយ​ពី​អារម្មណ៍​ដ៏​មិន​ស្រួល​ខ្លួន​ដោយ​ការ​ស្ដាប់​វិទ្យុ និយាយ ឬ​ច្រៀង​លេង – ឲ្យ​កូន​សម្លឹង​មើល​ទេសភាព​ខាង​ក្រៅ​ឡាន កុំ​ឲ្យ​កូន​លេង​ហ្គេម ឬ​ឱន​មើល​ទូរស័ព្ទ​ក្នុង​ឡាន – ប្រសិន​បើ​តិចនិក​ខាង​លើ​មិន​ដំណើរ​ការ គួរ​ឈប់​ឡាន​មួយ​រយៈ​សិន ហើយ​ឲ្យ​កូន​គេង​ខ្លួន​ឲ្យ​ត្រង់ […]

បញ្ហាហើមពោះលើទារក ជាអាការៈទូទៅមួយដែលអាអូនជួបញឹកញាប់ ធ្វើឲ្យអូនៗឈឺពោះ យំច្រើនលួងមិនបាត់ បណ្ដាលឲ្យម៉ាក់ប៉ាមួយចំនួនកើតជាក្ដីបារម្ភខ្លាំង។ ប៉ុន្តែអ្នកជំនាញក្មេងថា មិនបាច់បារម្ភពេកទេ ភាគច្រើនបញ្ហាហើមពោះមិនបង្កឲ្យមានគ្រោះថ្នាក់ធ្ងន់ធ្ងរនោះទេ ហើយម៉ាក់ប៉ាក៏អាចដោះស្រាយ និងទប់ស្កាត់មិនឲ្យកូនហើមពោះបានដែរ។ បើតាមការឲ្យដឹងពីគ្រូពេទ្យជំនាញក្មេង មានកត្តាមួយចំនួនដែលជំរុញឲ្យបញ្ហាហើមពោះកើតឡើងលើកូនយើងដូចជា៖ របបអាហារម្តាយ៖ លោកស្រីវេជ្ជបណ្ឌិតឯកទេសរោគកុមារ គុជ ឆោមដាលីន ថា បើសិនជាកូនបៅដោះម្តាយ តែបែរជាឧស្សាហ៍ហើមពោះ នោះមូលហេតុច្បាស់ជាមកពីរបបអាហាររបស់ម្ដាយហើយ ពិសេសបើម៉ាក់ៗផឹកស្រា ពិសេសគឺស្រាថ្នាំ ឬស្រាឫសឈើ ហើយទៅបំបៅដោះកូន ឬក៏អាចមកពីរបបអាហារម្ដាយមិនល្អ ញ៉ាំបន្លែឆៅ ឬញ៉ាំអាហារផ្អាប់ ជូរ ផ្អូម ជាដើម។ គណនា BMI គណនា BMR គណនាថ្ងៃមេជីវិតញីទម្លាក់ កូនម៉ឹមទឹកដោះគោសល់យូរ៖ លោកស្រីវេជ្ជបណ្ឌិត កុសល កណិការ ឯកទេសរោគកុមារលើកឡើងថា នៅពេលកូនម៉ឹមទឹកដោះគោហើយ មេរោគនឹងចូលទៅក្នុងទឹកដោះនៅសល់នោះ អ៊ីចឹងកាលណាយើងទុកយូរម៉ោងបន្តិច កូនយើងម៉ឹមទឹកដោះគោដែលនៅសល់នោះ អាចបង្កឲ្យកូនឈឺពោះ រាករូសដូចគ្នា។ អនាម័យកំប៉ុងទឹកដោះគោ៖ វេជ្ជបណ្ឌិត ហ៊ាង រតនា ជំនាញជំងឺទូទៅ និងកុមារ បានឲ្យដឹងថា មានទារកជាច្រើនកើតជំងឺផ្សេងៗដោយសារតែការលាងសម្អាតដបទឹកដោះគោមិនស្អាតនេះ។ ប្រព័ន្ធការពាររាងកាយក្មេងមិនទាន់រឹងមាំល្អ កាលណាតែដបលាងមិនស្អាត ធ្វើឲ្យបាក់តេរី ផ្សិត ឬវីរុសទៅបម្លែង និងបង្កជាក្លិនជូរផ្អូម ហើយយកដបនោះទៅឆុងទឹកដោះគោឲ្យម៉ឹម ទារកអាចនឹងរាករូស […]

​ពិត​ណាស់​ ​​​​​​​​ទារក​​​មាន​ការ​លូតលាស់ និង​អភិវឌ្ឍ​យ៉ាង​ឆាប់​រហ័ស។ ពួកគេ​រៀន​ និង​ធ្វើ​រឿងរ៉ាវ​ថ្មី​ៗ​ជា​រៀងរាល់​ថ្ងៃ​។ យ៉ាង​ណា​មិញ ប្រសិនបើ​អា​អូន​ស្រាប់​តែ​ទាញ​​ ឬ​ខ្វាច​ត្រចៀក​ខ្លួន​ឯង ប៉ា​ម៉ាក់​មិន​ចាំបាច់​បារម្ភ​ឡើយ​។ ជាក់​ស្ដែង មាន​ហេតុផល​ជា​ច្រើន​ដែល​​នាំ​ឲ្យ​ទារក​ចាប់ផ្ដើម​​ប៉ះពាល់​ត្រចៀក​ខ្លួន​ឯង ហើយ​វា​ក៏​មិន​មាន​គ្រោះថ្នាក់អ្វី​​ដែរ​ ប្រសិនបើ​​អា​អូន​មិន​មាន​បង្ហាញ​​រោគ​សញ្ញា​ណាមួយ​។ មូលហេតុ​ដែល​ទារក​ទាញ​ត្រចៀក​ ១. លេង​ និង​លួងលោម​ខ្លួន​ឯង កូន​តូច​​ភាគ​ច្រើន​ទាញ​ត្រចៀក​ខ្លួន​ឯង នៅ​ពេល​ដែល​ពួក​គេ​លេង ឬ​ទើប​ដឹង​ពី​វត្តមាន​ផ្នែក​នៃ​រាងកាយ​របស់​ខ្លួន។​ វា​គឺ​ជា​ការ​លេង​ នៅ​អំឡុង​ពេល​ដែល​អា​អូន​អាយុ​បាន​ប៉ុន្មាន​ខែ​ដំបូង​។​ មួយ​វិញ​ទៀត ទារក​ខ្លះ​អាច​ទាញ​ត្រចៀក​ដើម្បី​លួងលោម​ខ្លួន​ឯង នៅ​ពេល​ដែល​ពួក​គេ​មិន​សប្បាយ​ចិត្ត រញ៉ាំរញ៉ូវ​ ឬ​ព្យាយាម​គេង​។ ការ​ទាញ​ត្រចៀក​ ដើម្បី​លេង​ ឬ​លួងលោម​ខ្លួន​ឯង​ចាប់ផ្ដើម​បន្ទាប់​ពី​ក្មេង​អាយុ​បាន​៤​ខែ និង​បញ្ចប់​នៅ​ពេល​ដែល​ពួក​គេ​អាយុ​បាន​១ឆ្នាំ​។ ២. ការ​ឆ្លង​មេរោគ​នៅ​ត្រចៀក​ ជាមួយ​គ្នា​នេះ​ដែរ ទារក​អាច​ទាញ​​ និង​ប៉ះ​ត្រចៀក​ ដោយ​សារ​តែ​ពួក​គេ​មាន​ការ​ឈឺ​ចាប់​ពី​ការ​ឆ្លង​មេរោគ​នៅ​ត្រចៀក​។​ ការ​ឆ្លង​មេរោគ​នៅ​ត្រចៀក​កើត​ឡើង​ជា​ទូទៅ​ នៅ​ពេល​ដែល​កូន​មាន​​អាយុ​ចន្លោះ​ពី​៣​ខែ​ដល់​៣​ឆ្នាំ​។ ក្រៅ​ពី​ការ​ប៉ះ ឬ​ខ្វាច​ត្រចៀក​ រោគ​សញ្ញា​ដទៃ​ទៀត​ដែល​បញ្ជាក់​ថា​កូន​​មាន​អាការៈ​ឈឺ​ត្រចៀក​ រួម​មាន យំ មិន​ចង់​ញ៉ាំ​​អាហារ ពិបាក​គេង​ គ្រុន​ក្ដៅ ហៀរ​សំបោរ​ រោគសញ្ញា​អាលែកហ្ស៊ី ​ឬ​ក្អួត។ ៣. បញ្ហា​ស្បែក​ កូន​​អាច​កំពុង​តែ​​ព្យាយាម​កម្ចាត់​បញ្ហា​រមាស់ នៅ​ពេល​ដែល​ពួក​គេ​ទាញ ឬ​ត្រដុស​ត្រចៀក​។ ជា​ទូ​ទៅ​ កូន​ជួប​ប្រទះ​​បញ្ហា​ស្បែក​ស្ងួត​ដោយ​សារ​តែ​ហេតុផល​ជា​ច្រើន​ ហើយ​​អាការៈ​រមាស់​នេះ​ នឹង​បាត់​ទៅ​វិញ​ដោយ​ខ្លួន​​ឯង​។ ទន្ទឹម​នឹង​នេះ​ដែរ​ ត្រអក​ក៏​ជា​បញ្ហា​ស្បែក​ទូទៅ​ដែល​កើត​ឡើង​ចំពោះ​ក្មេង​​ដូច​គ្នា។​ រោគ​សញ្ញា​​នៃ​ជំងឺ​ត្រអក​ដែល​កើត​មាន​ញឹកញាប់​ […]

ការផ្លាស់ប្ដូរ​ម្សៅ​ទឹកដោះគោ​ឲ្យ​ទារក​បៅ​ពី​មួយ​ម៉ាក​ទៅ​មួយ​ម៉ាក អាច​ដោយសារ​អា​អូន​បៅ​ទឹក​ដោះ​គោ​ចាស់​លែង​ត្រូវ ឬ​ក៏​អាច​​ដោយ​សារហេតុផល​​ផ្សេង​​ទៀត។ ខណៈ​​ដែល​បើ​ម៉ាក់​ប៉ា​សម្រេច​ផ្លាស់​ប្ដូរ​ម្សៅ​ទឹក​ដោះ​គោ​ច្រើន​ម៉ាក​ឲ្យ​អា​អូន​មុឹម ផល​រំខាន​មួយ​ចំនួន​អាច​កើត​ឡើង​ចំពោះ​កូន​បាន។ ផល​រំខាន​នៃ​ការ​ផ្លាស់ប្ដូរ​ម្សៅ​ទឹកដោះ​គោ​ច្រើន​ឲ្យ​កូន​បៅ ១. ហើម​ពោះ ពេល​ម៉ាក់​ប៉ា​ឮ​សំឡេង​គ្រុគៗ​ចេញ​ពី​ពោះ​កូន ឬ​ឃើញ​ពោះ​កូន​ហើម ច្បាស់​ជា​បារម្ភ​មិន​ខាន។ នេះ​អាច​ជា​ផល​រំខាន​ទូទៅ​មួយ​នៃ​ការ​ផ្លាស់​ប្ដូរ​ម្សៅ​ទឹក​ដោះ​គោ អាច​កើត​ឡើង​លើ​កូន។ ប្រព័ន្ធ​រំលាយ​អាហារ​របស់​អា​អូន​នៅ​ខ្ចី ហើយ​វា​ស៊ាំ​នឹង​ទឹក​ដោះ​គោ​​ចាស់ ដូច​នេះ បើ​យើង​ផ្លាស់​ប្ដូរ​ម្សៅ​ទឹក​ដោះ​គោ​ទៅ​ម៉ាកមួយ​ថ្មី អាច​បណ្ដាល​ឲ្យ​កូនហើម​ពោះ។ ២. អាលែកហ្ស៊ី ពេល​យើង​ផ្លាស់​ប្ដូរ​ម្សៅ​ទឹកដោះ​គោ​ឲ្យ​កូន យើង​មិន​ដឹង​ច្បាស់​ថា កូន​យើង​បៅ​ត្រូវ ឬ​ក៏​អត់​ទេ។ ការ​​ប្ដូរ​​ទៅ​​ម្សៅ​​ទឹក​ដោះ​​គោ​​ថ្មី​​នោះ​ បើអាអូន​បៅ​ទឹក​​អត់​​ត្រូវ ឬ​​អាលែកហ្ស៊ី​នឹង​ធាតុ​ផ្សំ​ណាមួយ​ក្នុង​ម្សៅ​ទឹក​ដោះ​គោ  អាច​នឹង​ចេញរោគ​សញ្ញា​នៃ​អាលែកហ្ស៊ី​ទឹកដោះគោដូចជា៖ ក្អួត រាករូស ឈឺ​ពោះ ឡើង​កន្ទួល​លើ​ស្បែក ជុះ​មក​មាន​ឈាម​លាយ​លាមក។ ៣. ខ្វះ​អាហារូបត្ថម្ភ កូន​ក្មេង​ក៏​ដូច​យើង​ដែរ បើ​បាន​អាហារ​ប្លែក ហើយ​រសជាតិ​មិន​ត្រូវ​មាត់ ច្បាស់​ជា​មិន​ព្រម​ញ៉ាំ​ឡើយ។ ការ​ដែល​មិន​ព្រម​ញ៉ាំ​នេះ អាច​បណ្ដាល​ឲ្យ​កូន​ខ្វះ​សារធាតុ​ចិញ្ចឹម​រាងកាយ​ត្រូវ​ការ​ក្នុង​មួយ​ថ្ងៃ ជា​ហេតុ​បណ្ដាល​ឲ្យ​អា​អូន​មិន​ឡើង​គីឡូ​ជាដើម។ ដូច​នេះ មុន​សម្រេច​ផ្លាស់​ប្ដូរម្សៅ​ទឹក​ដោះ​គោ​ឲ្យ​កូន ម៉ាក់​ប៉ា​ត្រូវ​គិត​ឲ្យ​បាន​ដិត​ដល់​មែន​ទែន។ ចំណាំ៖ ចំពោះ​ការ​ផ្លាស់​ប្ដូរ​ម្សៅ​ទឹក​ដោះ​គោ​ឲ្យ​កូន​បៅ ម៉ាក់​ប៉ា​មិន​គួរ​នឹក​ឃើញ​ចង់​ផ្លាស់​ប្ដូរ ហើយ​ផ្លាស់​ប្ដូរ​ភ្លាម​ៗទេ យើង​ត្រូវ​ផ្ដល់​ឲ្យ​កូន​សន្សឹម​ៗ លាយ​ជាមួយ​ម្សៅ​ទឹក​ដោះ​គោ​ចាស់​រហូត​អា​អូន​ស៊ាំ​នឹង​ម្សៅ​ទឹក​ដោះ​គោ​ថ្មី សឹម​ឈប់​ផ្ដល់​ទឹក​ដោះ​គោ​ចាស់​ឲ្យ​កូន​មុឹម។

ទារក​គេង​មិន​ស្កប់ អាច​បណ្ដាល​មក​ពី​កត្តា​ច្រើន​ដូចជា​សីតុណ្ហភាព​ក្នុង​បន្ទប់ ឬ​បរិយាកាស​រំខាន​ដល់​ការ​គេង​របស់​កូន។ ក្នុង​នោះ​ដែរ ទម្លាប់​ដែល​ម៉ាក់​ៗ​ធ្វើ​មួយ​ចំនួន​ដោយ​គិត​ថា នឹង​ធ្វើ​ឲ្យ​អា​អូន​គេង​លក់​ស្រួល បែរ​ក្លាយ​ជា​ផល​រំខាន​ដល់​ការ​គេង​របស់​អា​អូន​វិញ។ តាម​លោក​វេជ្ជបណ្ឌិត ចាន់ ស៊ីណេត ឯកទេស​ជំងឺ​ទូទៅ បាន​ឲ្យ​ដឹង​ថា ចំពោះ​ម៉ាក់​ៗ​មួយ​ចំនួន មាន​ទម្លាប់​រុំ​កន្សែង ឬ​កំណាត់​ទារក ដើម្បី​ឲ្យ​កូន​គេង​បាន​លក់​ស្រួល មិន​ឆាប់​ភ្ញាក់ ព្រោះ​ទារក​ទើប​នឹង​កើត​មួយ​ចំនួន​កន្ត្រាក់​ដៃ​ជើង​ញឹក ជា​ហេតុ​ធ្វើ​ឲ្យ​អា​អូន​ភ្ញាក់​ពី​គេង ឬ​គេង​មិន​ស្កប់​ស្កល់។ ដូច​គ្នា​នេះ ក្រៅ​ពី​រុំ​ខ្លួន​កូន​ជិត​ឈឹង​ហើយ ពេល​កូន​កំពុង​គេង​លក់​នោះ ក៏​យក​ខ្នើយ ឬ​ភួយ មក​ដាក់​សង្កត់​លើ​ពោះ​អា​អូន​បន្ថែម​ទៀត។ វេជ្ជបណ្ឌិត​រូប​នេះ​បន្ត​ថា ការ​រុំ​ទារក គឺ​រុំ​កូន​ឲ្យ​មាន​ផាសុកភាព មិន​មែន​រុំ​ជិត​ឈឹង​កូន​រើ​ទៅ​ណា​មិន​រួច​នោះ​ទេ ទារក​ក៏​ត្រូវ​បរិយាកាស​ខ្យល់​ចេញ​ចូល ហើយ​ទារក​ក៏​ចេះ​ស្អុះ​ស្អាប់ ធុញ​ថប់​ដូច​យើង​មនុស្ស​ធំ​ដែរ។ ម្យ៉ាង​វិញ​ទៀត បើ​ម៉ាក់​ៗ​យក​ភួយ​ក្រាស់ ឬ​វត្ថុ​ធ្ងន់ សង្កត់​អា​អូន​រើ​មិន​រួច អាច​បង្ក​គ្រោះ​ថ្នាក់​ឲ្យ​ថប់​ដង្ហើម​បាន​ដោយ​ប្រការ​ណាមួយ។ ប្រសិន​បើ​វត្ថុ​នោះ​ក្រាស់ ឬ​ធ្ងន់​ពេក អាច​បណ្ដាល​ឲ្យ​កូន​ហប់ ហើយ​បើ​ចៃដន្យ​ធ្លាក់​មក​គ្រប​មុខ​កូន ជា​ហេតុ​បណ្ដាល​ឲ្យ​អា​អូន​កិកកុក រក​រឿង​មិន​ព្រម​គេង​។ ហេតុ​នេះ​ហើយ ដើម្បី​ឲ្យ​កូន​គេង​លក់​ស្កប់ស្កល់ ម៉ាក់​ៗ​គួរ​ដាក់​ឲ្យ​ទារក​គេង​ក្នុង​បរិយាកាសស្ងប់ស្ងាត់ មិន​ចាំង​ពន្លឺ មាន​ខ្យល់​អាកាស​ចេញ​ចូល​ល្អ។ ចៀសវាង​ស្លៀក​ពាក់​ឲ្យ​កូន​ចង្អៀត​ពេក ឬ​រុំ​អា​អូន​តឹង​ពេក ពិសេស​មិនត្រូវ​ដាក់​ឲ្យ​ទារក​គេង​ក្នុង​បន្ទប់​ត្រជាក់​ពេក ឬ​គេង​នៅ​មុខ​កង្ហារ។