ចូលចិត្ត​អង្គុយធ្វើការយ៉ាងម៉េចនៅអហ្វីស? ទាំងនេះជារបៀបការពារឈឺនេះឈឺនោះ

ដោយ ត្រួតពិនិត្យដោយ ជីព ចិត្ត

គ្នាយើង​ខ្លះ ប្រហែល​ជាដឹង​ហើយ ការអង្គុយ​ធ្វើការ​យូរ មិនល្អ​សម្រាប់​សុខភាព​នោះទេ ហើយ​បើយើង​អង្គុយ​ក្នុង​ជំហរ ដែល​ធ្វើឲ្យ​កៀប​សរសៃឈាម ឬសន្លាក់នោះ វាងាយ​បណ្ដាល​ឲ្យយើង ឈឺចាប់​ក្នុង​សាច់ដុំ ឬសន្លាក់​ខ្លាំងណាស់។

ដើម្បី​បញ្ចៀស​បញ្ហា​សុខភាព​ទាំងនេះ អ្នកជំនាញ​បាន​ណែនាំ​ពី​របៀប​អង្គុយ​ឲ្យ​បាន​ត្រឹមត្រូវ នៅពេល​ធ្វើការ។ របៀបទាំងនោះ មាន​ដូចខាងក្រោម៖

១. ការពារ​ការ​ឈឺជើង

អំឡុងពេល​ធ្វើការ យើង​មិនគួរ​អង្គុយគង​អន្ទាក់ខ្លា ដោយ​យកជើង​ម្ខាងដាក់​លើជើង​ម្ខាងទៀត​នោះទេ ព្រោះ​ធ្វើ​ឲ្យ​កៀបសរសៃឈាម ឈាម​រត់មិន​ស្រួល និង​បណ្ដាល​ឲ្យ​ស្ពឹកជើង និង​មាន​រោគសញ្ញា​ញាក់ជើង​ឥតឈប់ (Restless Legs Syndrome)។

រឿងគួរធ្វើ យើងត្រូវ​រៀបចំ​កៅអី ដោយ​ទម្លាក់​កម្ពស់​របស់​វា ឬធ្វើយ៉ាងណា ឲ្យ​ពេល​យើង​អង្គុយទៅ ជើង​របស់​យើង​អាច​ដាក់​ដល់កម្រាល គ្មាន​ការ​ព្យួរជើង​នោះទេ។ បន្ទាប់មក​ទៀត យើង​អង្គុយ​លើ​កៅអី ហើយ​ដាក់ជើង​លើ​កម្រាល ដោយ​ឲ្យ​ជើង និង​កែងជើង មាន​មុំធំជាង ៩០​ដឺក្រេ។

អង្គុយ

២. ការពារ​ការឈឺខ្នង

ដើម្បី​ការពារ​ការឈឺខ្នង យើង​គួរជ្រើសរើស​កៅអី ដែល​ជួយ​ទប់ ឬសម្រួល​ដល់​ខ្នង និង​មាន​ទំហំ​កន្លែង​អង្គុយ ត្រូវ​ជាមួយ​ត្រគាក​របស់​យើង។ ប្រសិនបើ​កៅអីធំពេក យើង​អាច​ដាក់កូនខ្នើយ​ខាងក្រោយ​ចង្កេះ​របស់​យើង ដើម្បី​បំពេញ​លំហទំនេរ។ បើមិន​ធ្វើដូច្នេះទេ វា​ងាយ​បណ្ដាល​ឲ្យ​យើង​តឹង និង​ឈឺខ្នង ពេល​យើង​ផ្អែកទៅក្រោយ។

អង្គុយ

៣. ការពារដៃ កុំឲ្យខ្សោះថាមពល

នៅពេល​យើង​ធ្វើការ​ជាមួយ​កុំព្យូទ័រ ដៃរបស់យើង​មានចលនា​រហូត។ ដូច្នេះ បើយើង​ដាក់​ដៃ​ក្នុង​ជំហរ​មិន​ត្រឹមត្រូវ​ទេ វាអាច​បណ្ដាល​ឲ្យ​ចុក និងស្ពឹក​ដៃ។ ដើម្បី​កុំឲ្យ​កើត​បញ្ហា​នេះ យើង​ត្រូវ​ដាក់​កំភួន​ដៃ​ទាំង​ពីរ​លើតុ ឲ្យ​កែង​ជាមួយ​នឹង​កែងដៃ ក្នុង​មុំ ៩០ដឺក្រ។

អង្គុយ

៤. ការពារ​ការចុកក

ដើម្បី​ការពារ​ចុកក ឬឈឺក្បាល អ្វីដែល​យើង​ត្រូវ​ពិនិត្យ​មើល គឺ​អេក្រង់​កុំព្យុទ័រ (Moniotor)។ ប្រសិនបើ​វាទាបពេក យើង​ត្រូវ​បត់​ខ្នង ផ្អែក​ទៅខាងក្រោយ ដើម្បី​ឲ្យកម្ពស់​ភ្នែក​យើង​ទាប ងាយ​សម្លឹង​មើល​អេក្រង់​កុំព្យុទ័រ។ ប៉ុន្ដែ​ជំហរបែបនេះ អាចបណ្ដាល​ឲ្យ​កើត​ជំងឺក្លន។ ដូច្នេះ យើងត្រូវ​តម្រូវ​កម្ពស់​កុំព្យុទ័រ ឲ្យ​ត្រូវ​នឹង​កម្ពស់ភ្នែក​របស់​យើង ដោយ​ការ​កល់​កំណល់​អេក្រង់​កុំព្យុ័ទ័រ ជាដើម។

អង្គុយ

៥. ការពារ​ការឈឺភ្នែក

នៅពេល​យើង​ធ្វើការ​ជាមួយ​កុំព្យុទ័រ រយៈពេល​យូរ ភ្នែក​របស់​យើង ងាយ​ស្រវាំង ស្ងួត និង​ក្រហម។ ដើម្បី​បញ្ចៀស​បញ្ហា​ទាំង​នេះ អ្នកជំនាញ​ណែនាំ​ឲ្យ​ប្រើភ្នែក សម្លឹង​អេក្រង់​កុំព្យុទ័រ ក្នុង​ចម្ងាយ ៥០​សង់ទីម៉ែត្រ។ យើង​ក៏អាច​ប្រើ​វ៉ែនតាផងដែរ ព្រោះវា​នឹង​ជួយ​ឲ្យ​ភ្នែក មិន​សូវ​អស់ថាមពល។

អង្គុយ

ក្នុង​ករណី​មាន​សំណួរ ឬ​មន្ទិល​​សង្ស័យ​ជុំវិញ​សុខភាព​អ្នក​ ជម្រើស​ល្អ​បំផុត សូម​ពិគ្រោះ និង​ប្រឹក្សា​យោបល​ផ្ទាល់​ជាមួយ​គ្រូពេទ្យ​ជំនាញ។ Hello Health Group មិន​ចេញ​វេជ្ជបញ្ជា មិន​ធ្វើ​រោគ​វិនិច្ឆ័យ ឬ​ព្យាបាល​ជូន​ទេ៕

ចុចស៊ែរឥឡូវនេះ

ត្រួតពិនិត្យថ្ងៃទី ខែ​តុលា 18, 2019 | កែសម្រួលចុងក្រោយ ខែ​តុលា 18, 2019

អ្នកអាចចូលចិត្ត