ទំនាក់ទំនងរវាងជាតិដែក និងខួរក្បាលកុមារ
ការសិក្សានាពេលថ្មីៗនេះបានរកឃើញថាស្រ្តីកំពុងពពោះដែលមានជាតិដែកគ្រប់គ្រាន់ ជួយឲ្យកូនក្នុងផ្ទៃមានការលូតលាស់ខួរក្បាលបានល្អ ហើយក្មេងដែលកើតពីម្ដាយមានបញ្ហាស្លេកស្លាំងដោយខ្វះជាតិដែកពេលកំពុងពពោះវិញ គឺប្រឈមនឹងបញ្ហាអភិវឌ្ឍផ្នែកប្រព័ន្ធប្រសាទ។
ជាតិដែកត្រូវបានគេរកឃើញថាមានសារសំខាន់សម្រាប់ដំណើរការកោសិកា និងសរីរាង្គផ្សេងទៀត និងសំខាន់បំផុតសម្រាប់ការលូតលាស់ខួរក្បាល ក្នុងដំណាក់កាលមូលដ្ឋានគ្រឹះនៃការផលិតសម្បកណឺរ៉ូន និងការធ្វើមេតាប៉ូលិសលើថាមពល និងតំណភ្ជាប់ប្រព័ន្ធប្រសាទ។ កង្វះជាតិដែកលើកុមារ ពិសេស ១ ០០០ថ្ងៃដំបូង គិតតាំងពីចាប់កំណើតក្នុងផ្ទៃ នឹងអាចធ្វើឲ្យកុមារមានផលវិបាករយៈពេលវែង ដូចជាជួបបញ្ហាធ្លាក់ចុះបញ្ញាស្មារតី និងបញ្ហាអាកប្បកិរិយា ជាដើម។ បញ្ហាទាំងនេះបើសិនជាកើតលើកុមារ នោះនឹងធ្វើឲ្យពិបាកក្នុងការសិក្សារៀនសូត្រ ឬរៀនសូត្រមិនបានល្អដូចក្មេងដទៃនិងខ្សោយការផ្ចង់អារម្មណ៍ជាដើម។

បង្ការបញ្ហាខ្វះជាតិដែក
សម្រាប់ស្រ្តីមានផ្ទៃពោះ និងកុមារតូចជាក្រុមមនុស្សដែលងាយប្រឈមនឹងបញ្ហាខ្វះជាតិដែក ព្រោះថា ក្នុងដំណាក់កាលនេះទាំងស្រ្តីមានផ្ទៃពោះ និងកុមារតូចត្រូវការជាតិដែកខ្ពស់ដើម្បីទ្រទ្រង់ដល់ការលូតលាស់។