តិចនិកកុំឲ្យកូនខាំក្បាលដោះ ពេលបំបៅកូន ម៉ាក់ៗគួរដឹង!

បំបៅដោះកូន គឺជាពេលវេលាមួយដែលម៉ាក់ៗបង្កើនភាពស្និទ្ធស្នាលជាមួយនឹងកូន និងជាពេល​សម្រាក​សម្រាប់ម៉ាក់ៗដែរ។ ពេល​បៅ​ដោះមាន​អូនតូចមួយចំនួនអាច​ខាំក្បាលដោះម៉ាក់ៗ​បាន និងបង្កឱ្យ​មានការឈឺចាប់ អាច​ធ្វើ​ឱ្យ​ម៉ាក់ៗខ្លាចលែងចង់បំបៅដោះកូន​ទៀត​ក៏​មាន​។​ ហេតុអ្វី​បានជាកូន​ខាំក្បាលដោះអំឡុងពេលបំបៅ? ម៉ាក់ៗ​គួរបំបៅបែបណា​ទើបអាអូនមិនខាំ​ក្បាល​ដោះ?

១. បញ្ឈប់ការបំបៅពេលកូនឆ្អែត

ជាទូទៅ កូន​អាចខាំក្បាលដោះនៅពេលបៅឆ្អែត ឬធុញនឹងការបៅ ដូច្នេះម៉ាក់ៗត្រូវ​សង្កេត​មើល ប្រសិនបើកូន​លែងចង់បៅហើយ ម៉ាក់ៗត្រូវឈប់ការ​បៅភ្លាមដែរ​។

២. ម៉ាស្សាសុដន់ និងចុងសុដន់

អាអូនអាចខំាក្បាលដោះនៅពេលបៅដំបូងដោយសារទឹកដោះមិនចេញ ដូច្នេះមុនពេលបំបៅដោះ ម៉ាក់ៗអាចម៉ាស្សាសុដន់ និងចុងសុដន់សិនដើម្បីជំរុញឱ្យទឹកដោះចេញ។ បន្ថែមពីនេះទៅទៀត ម៉ាក់ៗ​អាចច្របាច់សុដន់បន្តិចដើម្បីចេញទឹកដោះ ចៀសវាងអាអូនបៅមិនចេញទឹកដោះ ហើយ​ខាំ​ក្បាលដោះ។

៣. ដាក់ក្បាលដោះឱ្យដល់មាត់កូន

ដាក់ក្បាលដោះឱ្យដល់មាត់កូន​អាចជំរុញឱ្យកូន​បើកមាត់ធំៗបៅ។ ម៉ាក់ៗ​ក៏អាច​ទាញ​ចង្កា​របស់​អាអូនថ្នមៗដើម្បីឱ្យបើកមាត់ធំៗ​បៅដែរ។ ដូច្នេះ​ក្បាលដោះ​នឹងចូលជ្រៅ​ក្នុងមាត់​​ដែលមិនធ្វើ​ឱ្យ​អាអូន​ខាំក្បាលដោះពេលកំពុងបៅ។

៤. ឱ្យកូន​ខាំជ័រលេង

ក្នុងអំឡុងពេលដុះធ្មេញ អាអូននឹងរមាស់ ហើយឈឺអញ្ចាញធ្មេញ​ដែលធ្វើឱ្យកូន​​ខាំក្បាល​ដោះ​ដើម្បីបន្ធូរអាការៈឈឺចាប់ និងរមាស់។ ដូច្នេះមុននឹងបំបៅដោះ ម៉ាក់ៗអាចឱ្យកូន​ខាំជ័រ​លេង​ដែលក្លាសេត្រជាក់ៗដើម្បីបន្ធូរអាការៈឈឺចាប់ និងរមាស់អញ្ចាញធ្មេញរបស់កូន​ និងការពារ​​មិនឱ្យខាំក្បាលដោះ។

ចង់គណនាថ្ងៃមេជីវិតញីទុំធ្លាក់ ចុចទីនេះ!

ចង់គណនាថ្ងៃសម្រាលកូន ចុចទីនេះ!

ចង់គណនាទម្ងន់ស្រ្តីពពោះ ចុចទីនេះ!

ចង់ដឹងអត្ថន័យពណ៌ និងរូបរាងលាមកទារក ចុចទីនេះ!

៥. បំបៅនៅកន្លែងគ្មានសំឡេងរំខាន

ម៉ាក់ៗគួរបំបៅកូននៅក្នុងបន្ទប់ ឬកន្លែងស្ងាត់ល្អ គ្មានសំឡេងរំខាន បិទវាំងនន ឬបន្ថយ​ពន្លឺភ្លើង​ក្នុងបន្ទប់ដើម្បីឱ្យកូនយកចិត្តទុកដាក់ក្នុងការបៅ។ នៅពេលមានសំឡេងរំខាន អាអូន​អាចភ្លេច​ថា​កំពុង​បៅ ហើយអាចបិទមាត់ និងខាំត្រូវក្បាលដោះម៉ាក់ៗ។

៦. បំបៅពេលអាអូនឃ្លាន

ម៉ាក់ៗគួរបំបៅដោះនៅពេលអាអូនឃ្លាន ទើបកូន​បើកមាត់បៅ និងមិនខាំក្បាលដោះ។ ជាទូទៅ ម៉ាក់ៗអាចបំបៅអាអូនរៀងរាល់ ២-៣ ម៉ោង​ម្តង។

៧. និយាយជាមួយកូន​ពេលបំបៅ

ម៉ាក់ៗគួរនិយាយលេងជាមួយកូន ច្រៀង ឬនិយាយរឿងនិទាន​ឱ្យ​អាអូនស្តាប់ និងមើលមុខអាអូន​ក្នុង​អំឡុងពេលបំបៅដើម្បីរក្សាទំនាក់ទំនងជាមួយគ្នា​។ ពេលខ្លះកូន​អាចខាំក្បាលដោះ​ម៉ាក់ៗ​ដោយសារចង់បានចំណាប់អារម្មណ៍ក៏​មាន​។

៨. លាងច្រមុះកូនមុនបំបៅ

ប្រសិនបើអាអូនផ្តាសាយ ម៉ាក់ៗគួរចាញ់សេរ៉ូមប្រៃលាងច្រមុះអាអូន ឬបឺតសម្បោរ​ចេញពីច្រមុះ​​ឱ្យស្អាតសិន ចាំបំបៅដោះ ព្រោះពេល​អាអូនផ្តាសាយ អាចពិបាកដកដង្ហើម​ដោយសារ​មានសម្បោរក្នុងច្រមុះ ឬតឹងច្រមុះដែលបណ្តាលអាចឱ្យកូន​ខាំក្បាលដោះពេលកំពុងបៅ។

ពេលម៉ាក់ៗសង្កេតឃើញអាអូនរៀបខាំក្បាលដោះ ម៉ាក់ៗអាចយក​ម្រាម​ដៃទប់មាត់កូន រួច​ទាញ​ក្បាលដោះចេញពីមាត់ភ្លាម កុំឱ្យ​អាអូន​​​ខាំក្បាលដោះព្រោះអាចក្លាយទៅជាទម្លាប់។

អត្ថបទគួរអាន៖

• ៤ រឿង ពី​ការ​​បំបៅដោះកូន ម៉ាក់​គ្រប់រូប​គួរ​ដឹង
• សំខាន់​ណាស់! ស្រីៗពពោះ ​និង​បំបៅដោះកូន​គួរដឹង
• បំបៅដោះកូនកាត់បន្ថយហានិភ័យកើតជំងឺមហារីកសុដន់
• បំបៅដោះកូន នាំឲ្យសុដន់លែងស្អាតដូចមុន?
• ឮគេថា បំបៅដោះកូនធ្វើឲ្យសុដន់យារធ្លាក់ តែគ្រូពេទ្យលើកឡើងពីកត្តាទាំងនេះវិញ
• មូលហេតុនេះហើយ បានគេហាមស្រ្តីមាន​ផ្ទៃពោះ និង​បំបៅដោះកូនផឹកភេសជ្ជៈប៉ូវកម្លាំង