ប៉ាម៉ាក់ដឹងអត់ថា កុមារតូចៗរៀនសូត្រពីអ្វីៗជុំវិញខ្លួនឆាប់រហ័សណាស់ គឺមុនពេលដែលអាអូនចេះដើរ និងនិយាយទៅទៀត។ ជាក់ស្តែង កោសិកាខួរក្បាលអភិវឌ្ឍតាំងពីនៅក្នុងផ្ទៃម៉ាក់ៗទៅទៀត ហើយនៅអាយុពី១ឆ្នាំ ដល់៣ឆ្នាំ ខួរក្បាលរបស់កូនមានសមត្ថភាពយល់ដឹងលឿនក្នុងការធ្វើកិច្ចការផ្សេងៗ។ ក្នុងរយៈពេលនេះដែរ សារធាតុចិញ្ចឹមដើរតួនាទីយ៉ាងសំខាន់ តែបើកូនមិនបានទទួលសារធាតុចិញ្ចឹមគ្រប់គ្រាន់វិញនោះ កុមារអាចនឹងរងការប៉ះពាល់ដល់ការអភិវឌ្ឍខួរក្បាល ការចងចាំ និងសមត្ថភាពផ្សេងៗទៀតនៅក្នុងជីវិតរបស់ពួកគេ។
សារធាតុចិញ្ចឹមចាំបាច់សម្រាប់ការអភិវឌ្ឍខួរក្បាលទារកមានអ្វីខ្លះ?
សារធាតុចិញ្ចឹមទាំងអស់ មានសារៈសំខាន់ណាស់សម្រាប់ការលូតលាស់ និងការបំពេញមុខងាររបស់ខួរក្បាលកុមារ ហើយសារធាតុចិញ្ចឹមសំខាន់ៗដែលកុមារតូចៗមិនអាចខ្វះបាន មានដូចជា៖
- កូលីន
- ហ្វូឡេត
- អ៊ីយ៉ូត
- ជាតិដែក
- អាស៊ីដខ្លាញ់អូមេហ្គា-៣
- ប្រូតេអ៊ីន
- វីតាមីន A, D, B6 និង B12
- ស័ង្កសី
របបអាហារសម្រាប់ទារក និងកុមារតូចៗសម្រាប់ការអភិវឌ្ឍខួរក្បាល
១. ស៊ុត
ស៊ុតមានសារធាតុចិញ្ចឹម និងជាអាហារដែលពេញនិយមសម្រាប់កុមារតូចៗ។ ជាមួយនឹងសារធាតុចិញ្ចឹមដែលល្អបំផុតសម្រាប់ខួរក្បាល ដូចជាកូលីន វីតាមីន B12 និងប្រូតេអ៊ីន ដែលធ្វើឱ្យស៊ុតក្លាយជាអាហារជំនួយដល់ការអភិវឌ្ឍខួរក្បាល និងបង្កើនការយល់ដឹង។
២. គ្រឿងសមុទ្រ
ត្រីមានខ្លាញ់ និងគ្រឿងសមុទ្រដទៃទៀត មានគុណប្រយោជន៍ខ្ពស់សម្រាប់ជួយដល់ការអភិវឌ្ឍខួរក្បាល ប៉ុន្តែប៉ាម៉ាក់មិនគួរឱ្យកូនតូចៗញ៉ាំគ្រឿងសមុទ្រដែលមានជាតិបារតខ្ពស់ ដូចជាត្រីធូណានោះទេ ពីព្រោះវាអាចប៉ះពាល់ដល់ការអភិវឌ្ឍរបស់ក្មេង។ ជំនួសមកវិញ យើងអាចផ្តល់អាហារមានជាតិបារតទាប ដូចជាបង្គា ត្រីសាល់ម៉ុន ឬក្តាម។ល។ ត្រឹម២ទៅ៣ដងក្នុងមួយសប្តាហ៍។
៣. បន្លែស្លឹកបៃតង
ពិតណាស់ បន្លែស្លឹកបៃតងសម្បូរទៅដោយជាតិដែក និងហ្វូឡេត ដែលជួយបង្កើនការយល់ដឹង ក៏ដូចជាជួយឱ្យកុមារតូចៗមានការចងចាំល្អ និងរៀនឆាប់ចេះ។
៤. សាច់គ្មានខ្លាញ់
សាច់គ្មានខ្លាញ់ ជាប្រភេទអាហារបំប៉នខួរក្បាល ដែលសម្បូរទៅដោយស័ង្កសី និងជាតិដែក ដែលអាចជួយឱ្យកុមារតូចៗជៀសផុតពីជំងឺស្លេកស្លាំងដោយសារកង្វះជាតិដែកបានយ៉ាងមានប្រសិទ្ធភាព។
៥. ទឹកដោះគោជូរ
ទឹកដោះគោជូរមានផ្ទុកសារធាតុចិញ្ចឹមជាច្រើនដូចជា ប្រូតេអ៊ីន ស័ង្កសី និងអ៊ីយ៉ូត ដែលកុមារត្រូវការជាចាំបាច់ ដើម្បីអភិវឌ្ឍខួរក្បាល និងការយល់ដឹង។ ផ្ទុយទៅវិញ កុមារដែលខ្វះជាតិអ៊ីយ៉ូត អាចប៉ះពាល់ដល់ការយល់ដឹង និងសមត្ថភាពក្នុងការត្រិះរិះពិចារណា ។
ចំណុចសំខាន់
របបអាហារសម្រាប់ទារក និងកុមារតូចៗសម្រាប់ការអភិវឌ្ឍខួរក្បាល
- ស៊ុត
- គ្រឿងសមុទ្រ
- បន្លែស្លឹកបៃតង
- សាច់គ្មានខ្លាញ់
- ទឹកដោះគោជូរ
អត្ថបទគួរអាន៖
- ដឹងគន្លឹះទាំងនេះ ការពារកូនពីបញ្ហាស្បែកក្នុងខែរងា
- គួរដឹង! កំហុស ៣ យ៉ាងម៉ាក់ប៉ាអាចធ្វើពេលកូនក្តៅខ្លួន
- កូនកើតជំងឺពងបែកមាត់ដៃជើងគួរថែទាំម៉េច?
- ធ្វើម៉េចទើបដឹងថា កូនអាលែកហ្ស៊ីច្រមុះ ឬផ្តាសាយ?
- កូនឧស្សាហ៍អាលែកហ្ស៊ីច្រមុះ ប៉ាម៉ាក់គួរដឹងពីវិធីបង្ការ និងថែទាំឲ្យបានត្រឹមត្រូវ
- ឃើញសញ្ញាទាំងនេះ អាចថាអូនៗកំពុងមានបញ្ហាប្រព័ន្ធរំលាយអាហារហើយ
[embed-health-tool-vaccination-tool]
