ម៉េចបានប៉ាម៉ាក់គួរនាំកូនតូចទៅចាក់វ៉ាក់សាំងប្រឆាំងជំងឺគ្រុនពោះវៀន?

វ៉ាក់សាំងប្រឆាំងជំងឺគ្រុនពោះវៀនមានសារៈសំខាន់ណាស់ ដើម្បីការពារកូនតូចពីជំងឺដ៏កាចសាហាវមួយនេះ។ ទោះជាយើងរក្សាអនាម័យ ញ៉ាំស្អាត និងផឹកស្អាត ក៏មិនទាន់គ្រប់គ្រាន់ដែរ ជាពិសេសនៅពេលដែលប៉ាម៉ាក់នាំកូនទៅកាន់តំបន់ដែលមានការរាលដាលនៃជំងឺគ្រុនពោះវៀន អ៊ីចឹងហើយ! ទើបការចាក់វ៉ាក់សាំងប្រឆាំងនឹងជំងឺគ្រុនពោះវៀន ជាជម្រើសដ៏ឈ្លាសវៃ ដើម្បីជួយឱ្យប្រព័ន្ធភាពស៊ាំរបស់កូនស្គាល់ និងប្រឆាំងទៅនឹងបាក់តេរីដែលបណ្តាលឱ្យកើតជំងឺនេះ។

ចង់ដឹងអត្ថន័យពណ៌ និងរូបរាងលាមកទារក ចុចទីនេះ!

ប្រភេទនៃវ៉ាក់សាំងប្រឆាំងនឹងជំងឺគ្រុនពោះវៀនសម្រាប់កុមារតូចៗ

ចំពោះវ៉ាក់សាំងប្រឆាំងនឹងជំងឺគុ្រនពោះវៀន គឺមានចំនួន២ប្រភេទសំខាន់ៗ ដែលរួមមានប្រភេទចាក់ និងលេប ដែលសុទ្ធសឹងតែមានប្រសិទ្ធភាព ប៉ុន្តែជម្រើសនៃការចាក់វ៉ាក់សាំងនេះគឺអាស្រ័យទៅលើអាយុកុមារ និងស្ថានភាពសុខភាពរបស់ក្មេង។

នៅពេលណាដែលកូនតូចត្រូវចាក់វ៉ាក់សាំងនេះ?

ជាទូទៅ វ៉ាក់សាំងប្រឆាំងជំងឺគ្រុនពោះវៀនត្រូវបានណែនាំសម្រាប់កុមារអាយុ ២ ឆ្នាំ ជាពិសេសប្រសិនបើអាអូនត្រូវធ្វើដំណើរទៅកាន់តំបន់ដែលផ្ទុះជំងឺគ្រុនពោះវៀន។ ប៉ាម៉ាក់អាចសម្កាល់រោគសញ្ញានៃជំងឺគ្រុនពោះវៀនចំពោះកុមារតូចៗដូចខាងក្រោម៖

• ក្តៅខ្លួនខ្លាំងភ្លាមៗ រហូតដល់ ៤០អង្សាសេ

• អស់កម្លាំង

• ឈឺពោះ និងមានរាករូស ឬទល់លាមក

• មិនឃ្លានអាហារ

• ឈឺក្បាល

ក្នុងករណីដែលសង្កេតឃើញអាអូនមានរោគសញ្ញាដូចរៀបរាប់ខាងលើ ប៉ាម៉ាក់គួរនាំកូនទៅជួបជាមួយគ្រូពេទ្យជាបន្ទាន់។

វ៉ាក់សាំងប្រឆាំងជំងឺគ្រុនពោះវៀនមានអត្ថប្រយោជន៍ម៉េចខ្លះ?

ការចាក់វ៉ាក់សាំង គឺជាវិធីសាស្រ្តដ៏មានប្រសិទ្ធភាពក្នុងការការពារកូនតូចពីជំងឺគ្រុនពោះវៀន ដោយមិនត្រឹមតែអាចជួយបង្ការជំងឺនោះទេ ប៉ុន្តែវាថែទាំកាត់បន្ថយរោគសញ្ញាធ្ងន់ធ្ងរថែមទៀតផង។ ដូច្នេះហើយ ប៉ាម៉ាក់គួរនាំកូនទៅចាក់វ៉ាក់សាំងប្រឆាំងជំងឺគ្រុនពោះវៀនតាមការណែនាំរបស់គ្រូពេទ្យ។ បន្ថែមពីនេះ យើងក៏អាចណែនាំឱ្យកូនអនុវត្តន៍វិធានសុវត្ថិភាពដូចខាងក្រោម

• ញ៉ាំទឹកស្អាត
• ញ៉ាំអាហារដែលឆ្អិនល្អ
• លាងសម្អាតដៃឱ្យបានញឹកញាប់ ជាពិសេសមុនពេលញ៉ាំចំណីអាហារ
• តាមដានសុខភាពរបស់កូនឱ្យបានដិតដល់ និងពិគ្រោះជាមួយគ្រូពេទ្យជំនាញ បើអាអូនមានរោគសញ្ញាមិនប្រក្រតីណាមួយ។