សម្រាប់ម៉ាក់ៗមានផ្ទៃពោះពេទ្យនឹងណែនាំឲ្យលេបថ្នាំជាតិដែក និងអាស៊ីដហ្វូលិក ដើម្បីជាជំនួយដល់កូន និងខ្លួនឯង។ ចំពោះថ្នាំអាស៊ីដហ្វូលិកលោកវេជ្ជបណ្ឌិត ច័ន្ទ រស្មី បានផ្ដល់យោបល់ឲ្យស្រីៗត្រៀមខ្លួនយកកូន លេបតាំងពីមុនមានគភ៌ទៅទៀត។
កុំចាំមានកូនទើបលេបថ្នាំអាស៊ីដហ្វូលិក មុនយកកូន ៣ ខែលេបឲ្យហើយទៅ ដើម្បីប្រយោជន៍ទាំងនេះ
ចំពោះហេតុផលវេជ្ជបណ្ឌិតឯកទេសសម្ភព និងរោគស្ត្រីរូបនោះបញ្ជាក់ថា ស្ត្រីមានគភ៌នៅត្រីមាសដំបូងត្រូវលេបថ្នាំនេះ ១ គ្រាប់ក្នុងមួយថ្ងៃ ជាមួយថ្នាំជាតិដែករយៈពេល ៩០ ថ្ងៃ ដើម្បីការពារកង្វះគ្រាប់ឈាមក្រហម និងការលូតលាស់របស់ទារកក្នុងផ្ទៃឲ្យបានពេញលក្ខណៈ ព្រមទាំងមិនស្លេកស្លាំង។
ចំណែកឯការលេបថ្នាំអាស៊ីដហ្វូលិក ស្ត្រីដែលមានបំណងចង់មានកូនត្រូវលេបវា ១ គ្រាប់ក្នុងមួយថ្ងៃរយៈពេលយ៉ាងហោច ៣ ខែ មុនពេលមានកូន វាអាចជួយឲ្យគភ៌លូតលាស់គ្រប់លក្ខណ: ជាពិសេសអាចការពារបានពីជំងឺឆ្អឹងខ្នងបិទមិនជិត (Spina Bifida) និងទារកឥតលលាដ៍ក្បាល (Anencephaly)។
លោកបានបន្ថែមទៀតថា ក្រៅពីបំពេញអវយវៈឲ្យកូនហើយអាស៊ីដហ្វូលិកនៅមានសារៈសំខាន់ច្រើនយ៉ាងទៀតចាប់ពីការបង្កើត និងជួសជុល DNA ផលិតកោសិកាគ្រាប់ឈាមក្រហមរហូតដល់បំពេញមុខងារដល់ខួរក្បាល។ ជាទូទៅស្ត្រីត្រូវការអាស៊ីដហ្វូលិកប្រហែល ៤០០ មីក្រូក្រាម/ថ្ងៃ ខណៈស្ត្រីមានផ្ទៃពោះត្រូវការ ៤០០-៨០០ មីក្រូក្រាមជាប្រចាំ។
ស្ត្រីមានផ្ទៃពោះគួរតែប្រើថ្នាំបំប៉នអាស៊ីដហ្វូលិកនេះជាពិសេស បើសិនជាមិនអាចទទួលបានជីវជាតិមួយនេះគ្រប់គ្រាន់ពីរបបអាហារ ដើម្បីកុំឲ្យកូនកើតមកពិការអវយវៈ។ ដូចនេះក្រៅពីលេបថ្នាំ យើងអាចញ៉ាំចំណីអាហារបន្លែផ្លែឈើមួយចំនួនដូចជា ពពួកគ្រាប់ធញ្ញជាតិ ក្រូច ឪឡឹក ចេក ការ៉ុត ផ្សិត ត្រសក់។ រីឯសាច់វិញមាននៅក្នុងត្រីធូណា សាច់មាន់ ជ្រូក គោ ជាដើម។
ស្ត្រីមានផ្ទៃពោះងាយនឹងកង្វះជីវជាតិមួយនេះណាស់ ហើយនៅពេលខ្វះមិនត្រឹមតែកូនទេ ម៉ាក់ក៏អាចជួយបញ្ហាជាច្រើនដូចជា ខ្សោយ អស់កម្លាំង ឆេវឆាវ ភ្លេចភ្លាំងច្រើន មិនឃ្លានអាហារ និងស្រកទម្ងន់។
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម