បរិក្ខារវេជ្ជសាស្រ្តតូច សម្រាប់បិទលើស្បែក ដើម្បីប្រឆាំងនឹងដុំសាច់មហារីក ពេលនេះ អ្នកវិទ្យាសាស្រ្តបានពិសោធន៍ឃើញ ដោយលទ្ធផលជោគជ័យតាមការរំពឹងទុក។
តាមសារព័ត៌មាន CNBC របស់សហរដ្ឋអាមេរិក ឧបករណ៍វេជ្ជសាស្រ្តនេះ ជាបន្ទះតូចខាងលើ បានពិសោធ និងបង្កើតឡើងដោយ ក្រុមអ្នកស្រាវជ្រាវ នៃវិទ្យាស្ថានបច្ចេកវិទ្យា Massachusetts។ ចំពោះដំណើរការបន្ទះតូចខាងលើ ត្រូវគេអះអាងថា ត្រឹមតែ ១នាទី គឺអាចបញ្ចេញសារធាតុថ្នាំ (វ៉ាក់សាំង) និងជាតិថ្នាំ ទៅភ្ញោចកោសិកាស្បែក ឲ្យបំបាត់ដុំសាច់មហារីកបាន ជាពិសេសប្រភេទជំងឺមហារីកស្បែក (Melanoma)។
ឧបករណ៍នេះ កើតឡើងក្រោយពីការពិសោធលើសត្វកណ្តុរ ដោយប្រៀបធៀបការចាក់បញ្ចូលជាតិថ្នាំប្រឆាំងមហារីកក្នុងខ្លួន តាមរយៈម្ជុលខ្នាតតូចៗ ឆាប់ជ្រាបជាង ការបញ្ចូលជាតិថ្នាំធម្មតា។
លោក Yanpu He ស្រាវជ្រាវម្នាក់នៃក្រុមស្រាវជ្រាវខាងលើ បាននិយាយថា៖ “ឧបករណ៍បន្ទះតូចនេះ មានសារធាតុថ្នាំជាអាវុធ និងបច្ចេកវិទ្យាភ្ញោច អាចឲ្យស្បែកទទួលយកជាតិថ្នាំបានរហ័ស និងមានប្រសិទ្ធិភាព”។
