backup og meta
មាតិកា
ឧបករណ៍សុខភាព
រក្សាទុក

ចេះ ៦តិចនិកនេះ អាចជួយបង្ការជំងឺខ្សោយបេះដូង

ត្រួតពិនិត្យដោយ វេជ្ជ. ចាន់ ស៊ីណេត · ឯកទេសសម្ភព និងរោគស្ត្រី · ម​ន្ទីរពេទ្យបង្អែកមិត្តភាពកម្ពុជា-ចិន សែនសុខ


អត្ថបទ​ដោយ សុខ វណ្ណ · កែ Apr 05, 2022

ចេះ ៦តិចនិកនេះ អាចជួយបង្ការជំងឺខ្សោយបេះដូង

ជំងឺខ្សោយបេះដូងកើតឡើងនៅពេលសាច់ដុំបេះដូងមិនអាចច្របាច់​ឈាមគ្រប់គ្រាន់ដើម្បីបញ្ជូនអុកស៊ីសែនទៅចិញ្ចឹមរាងកាយដែលបណ្តាល​ឱ្យយើង ហត់ ហើមជើង និងអស់កម្លាំងជាដើម ហើយ​ប៉ះពាល់ដល់សុខភាពយើងយ៉ាងខ្លាំង។ យើងគួរធ្វើម៉េចដើម្បីបង្ការកុំឱ្យខ្សោយ​បេះដូង?

លោកស្រីវេជ្ជបណ្ឌិត Uzma Iqbal ឯកទេសជំងឺបេះដូងនៅ Sands-Constellation Center for Critical Care បានណែនាំថា ដើម្បីបញ្ជៀសជំងឺខ្សោយបេះដូង យើងគួរ៖

១. ញ៉ាំអាហារល្អចំពោះសុខភាព

យើងគួរកាត់បន្ថយការញុំាសាច់ និងអាហារដែលមានជាតិខ្លាញ់ និងប្រៃខ្លាំង ហើយត្រូវញុំាបន្លែ និងផ្លែឈើស្រស់​ឱ្យបានច្រើន។

២. កាត់បន្ថយគ្រឿងស្រវឹង

ការញុំាគ្រឿងស្រវឹងច្រើនអាចបង្កើនហានិភ័យកើតជំងឺខ្សោយបេះដូង និងខូចថ្លើម ដូច្នេះយើងគួរ​កាត់បន្ថយ ឬចៀសវាងញុំាគ្រឿងស្រវឹងតាមដែលអាចធ្វើទៅបាន។

៣. ចៀសវាងជក់បារី

អ្នកជក់បារីមានហានិភ័យខ្ពស់ក្នុងការកើតជំងឺខ្សោយបេះដូង និងជំងឺ​បេះដូងផ្សេងៗទៀត ​ព្រោះ​សារធាតុ​ពុលក្នុងបារីធ្វើឱ្យសរសៃឈាម​បេះដូង​​យើងស្ទះ និងឡើងរឹង។

សុខភាពបេះដូង១

ចង់គណនា BMI ចុចទីនេះ!

ចង់គណនា BMR ចុចទីនេះ!

ចង់គណនារង្វាស់ចង្វាក់បេះដូង ចុចទីនេះ!

ចង់ពិនិត្យសុខភាពប្រព័ន្ធរំលាយអាហារ ចុចទីនេះ!

៤. គ្រប់គ្រងទម្ងន់

ភាពធាត់ជះឥទ្ធិពលយ៉ាងខ្លាំងដល់សុខភាពទូទៅរបស់យើង និងបណ្តាល​​ឱ្យយើងមានជំងឺ​ជាច្រើន​ដូចជា ជំងឺទឹកនោមផ្អែម ឬលើស​សម្ពាធ​ឈាម​ដែលបង្កើនហានិភ័យ​ឱ្យយើង​កើតជំងឺ​ខ្សោយ​បេះដូង។

៥. ហាត់ប្រាណ

ការហាត់ប្រាណជួយឱ្យយើងមានសុខភាពល្អ ដូច្នេះយើងគួរហាត់ប្រាណ​រយៈ​ពេល ៣០ ទៅ ៦០ នាទីជារៀងរាល់ថ្ងៃដើម្បីទទួលបានប្រសិទ្ធភាពខ្ពស់។

នៅពេលយើងហាត់ប្រាណទៀងទាត់ សាច់ដុំបេះដូងយើងខ្លាំងជាងមុន ហើយចលនាឈាមរត់​របស់​យើង​ក៏ប្រសើរជាងមុនដែរ។ លើសពីនេះទៅ​ទៀត ការហាត់ប្រាណអាចជួយបញ្ចុះ​សម្ពាធ​ឈាម និងជួយឱ្យយើងស្រក​ទម្ងន់។

៦. កាត់បន្ថយស្រេស្ត

រឿងជាច្រើនក្នុងជីរភាពប្រចាំថ្ងៃដូចជា សម្ពាធការងារ ទំនាក់ទំនងប្តីប្រពន្ធ ការមើលថែទាំកូន វិបត្តិ​ហិរញ្ញវត្ថុ ភាពនឿយហត់ជាដើមសុទ្ធតែអាចធ្វើឱ្យយើងស្រេស្ត។

ស្រេស្តមិនត្រឹមតែប៉ះពាល់​ដល់​សុខភាពផ្លូវចិត្ត និងផ្លូវកាយរបស់យើងទេ ថែមទាំងប៉ះពាល់ដល់សុខភាពបេះដូងយើងទៀតផង។ យើងអាចកាត់បន្ថយស្រេស្តតាមរយៈការហាត់យូហ្កា ធ្វើសមាធិ ស្តាប់តន្រ្តី ឬដើរកំសាន្តជាដើម។

ជំងឺខ្សោយបេះដូងអាចធ្វើឱ្យយើងមានផលវិបាកសុខភាពជាច្រើន ដូច្នេះយើងគួរផ្លាស់ប្តូររ​បៀប​រស់​នៅ និងរបបអាហារដើម្បីបង្ការកុំឱ្យកើតជំងឺខ្សោយបេះដូង។

អត្ថបទគួរអាន៖

  • គេងបើកភ្លើងនៅពេលយប់ អាចប៉ះពាល់សុខភាពបេះដូង
  • មូលហេតុ ៨ យ៉ាងអាច​ធ្វើឱ្យបេះដូងរីកធំខុសធម្មតា
  • អាការៈគាំងបេះដូងរបស់ស្រ្តីអាចខុសពីបុរស ត្រូវកត់ចំណាំ
  • ផ្លែ​ឈើ​ទាំង​៨​មុខ​នេះ ល្អ​សម្រាប់​សុខភាពបេះដូង
  • គ្រឿងផ្សំក្នុង​អាហារ ៣មុខ អាចធ្វើឲ្យ​បេះដូងលោតខុសធម្មតា
  • តាមដាន​សុខភាព​បេះដូង ដោយ​សង្កេត​មើល​ចំណុច​ទាំង​នេះ​​​​​​​​​​​​​​​​​​​​
  • ចំណុចសំខាន់

    ដើម្បីបង្ការជំងឺខ្សោយបេះដូង យើងគួរ៖
    • ញ៉ាំអាហារដែលល្អចំពោះសុខភាព
    • កាត់បន្ថយគ្រឿងស្រវឹង
    • ចៀសវាងជក់បារី
    • គ្រប់គ្រងទម្ងន់
    • ហាត់ប្រាណ
    • កាត់បន្ថយស្រេស្ត

    បដិសេធ

    Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    ត្រួតពិនិត្យដោយ

    វេជ្ជ. ចាន់ ស៊ីណេត

    ឯកទេសសម្ភព និងរោគស្ត្រី · ម​ន្ទីរពេទ្យបង្អែកមិត្តភាពកម្ពុជា-ចិន សែនសុខ


    អត្ថបទ​ដោយ សុខ វណ្ណ · កែ Apr 05, 2022

    ad iconផ្សព្វផ្សាយពាណិជ្ជកម្ម

    តើអត្ថបទនេះមានប្រយោជន៍ដែរទេ?

    ad iconផ្សព្វផ្សាយពាណិជ្ជកម្ម
    ad iconផ្សព្វផ្សាយពាណិជ្ជកម្ម