ពិតណាស់ ដៃរបស់ទារកអាចត្រជាក់ជាងផ្នែកផ្សេងៗទៀតនៃរាងកាយ។ យ៉ាងណាមិញ ទោះបីជាវាអាចកើតឡើងដោយសារតែកត្តាសីតុណ្ហភាពខាងក្រៅ ប៉ុន្តែអាការៈនេះក៏អាចជាបញ្ហាសុខភាពផងដែរ។ ដៃត្រជាក់ម្ដងម្កាលមិនមែនជាបញ្ហាគួរឲ្យបារម្ភឡើយ ប៉ុន្តែប្រសិនបើដៃអាអូនត្រជាក់ញឹកញាប់ ម៉ាក់ៗគប្បីតាមដានឲ្យបានដិតដល់ ដើម្បីស្វែងរកមូលហេតុបង្ក និងដំណោះស្រាយឲ្យបានទាន់ពេលវេលា។ មូលហេតុដែលទារកមានដៃត្រជាក់?
១. មិនទាន់ពេញវ័យក្នុងការរក្សាកម្ដៅ
ទារកទើបកើតមិនអាចរក្សាសីតុណ្ហភាពស្នូលនៃរាងកាយ ដោយមិនមានការការពារកម្ដៅពីខាងក្រៅឡើយ។ ដោយសារតែហេតុនេះហើយ ទើបដៃ និងជើងរបស់ពួកគេត្រជាក់ជាងផ្នែកដទៃទៀត។ ដូច្នេះហើយ ទើបម៉ាក់ៗគប្បីរុំក្បាល ជើង និងដៃរបស់ទារកឲ្យបានច្រើនជាន់ ដើម្បីការពារការបាត់បង់កម្ដៅពីរាងកាយដោយសាររំហួត។
២. ចរន្តឈាមមិនទាន់លូតលាស់
ដោយសារតែប្រព័ន្ធឈាមរត់របស់ទារកមិនទាន់អភិវឌ្ឍពេញលេញ ឈាមមិនអាចដឹកនាំអុកស៊ីសែនទៅដល់ដៃ និងជើងប្រកបដោយប្រសិទ្ធភាពឡើយ។ បញ្ហាកង្វះអុកស៊ីសែននេះក៏អាចបណ្ដាលឲ្យដៃអាអូនត្រជាក់ ហើយវាក៏អាចបង្ហាញតាមរយៈការប្រែពណ៌ស្បែកទៅជាពណ៌ស្វាយ។ ផ្នែកដទៃទៀតមានដូចជាត្រចៀក ច្រមុះ បបូរមាត់ និងចុងដោះ។
[embed-health-tool-baby-poop-tool]
៣. ការបង្ករោគក្នុងឈាម
ជាមួយគ្នានេះដែរ ការបង្ករោគក្នុងឈាម គឺជាការឆ្លើយតបចុងក្រោយរបស់រាងកាយចំពោះការឆ្លងមេរោគ។ ការកំណត់ពីការបង្ករោគក្នុងឈាមនៅដំណាក់កាលដំបូង គឺជារឿងសំខាន់បំផុត ដើម្បីបញ្ចៀសផលវិបាកធ្ងន់ធ្ងរ។ ជាក់ស្ដែង ជំងឺនេះកើតឡើងនៅពេលដែលមានការឆ្លងមេរោគណាមួយ ដូចជា ការឆ្លងមេរោគលើផ្លូវទឹកនោម ឬការឆ្លងមេរោគនៅស្បែក ឬឆ្អឹង។
ជាមួយនឹងដៃជើងត្រជាក់ ការបង្ករោគក្នុងឈាម ក៏អាចសម្គាល់ដោយអាការៈគ្រុនក្ដៅតិចតួច ចង្វាក់បេះដូងលោតញាប់ ដកដង្ហើមញាប់ ស្បែកស្លេកស្លាំង ចង្អោរ ខោទឹកនោមស្ងួតលើសពីរយៈពេល១២ម៉ោង។ ប្រសិនបើម៉ាក់ៗសង្កេតឃើញសញ្ញាខាងលើ ចូរប្រញាប់នាំចូលទៅជួបជាមួយនឹងគ្រូពេទ្យភ្លាមៗ។
៤. គ្រុនក្ដៅ
ត្រជាក់ដៃក៏អាចជាសញ្ញានៃជំងឺគ្រុនក្ដៅដូចគ្នា។ ប្រសិនបើទារកមានសីតុណ្ហភាពចាប់ពី៣៨អង្សាសេ ពួកគេអាចមានអាការៈគ្រុនក្ដៅ។ ជាទូទៅ គ្រុនក្ដៅគឺជាសញ្ញាមួយដែលរាងកាយទារកកំពុងព្យាយាមប្រយុទ្ធនឹងការឆ្លងបាក់តេរី ឬមេរោគ។ ប្រសិនបើថ្ងាសអាអូនក្ដៅ ប៉ុន្តែដៃពួកគេត្រជាក់ វាគ្រាន់តែជារោគសញ្ញាធម្មតានៃជំងឺគ្រុនក្ដៅប៉ុណ្ណោះ។
៥. ជំងឺរលាកស្រោមខួរ
ជំងឺរលាកស្រោមខួរ គឺជាការរលាកស្រទាប់ជុំវិញខួរក្បាល និងខួរឆ្អឹងខ្នង ដែលបណ្ដាលមកពីការឆ្លងមេរោគ ឬបាក់តេរី។ អាការៈត្រជាក់ដៃជើងគឺជារោគសញ្ញាដំបូងមួយ ហើយការធ្វើរោគវិនិច្ឆ័យជំងឺនេះគឺមានការពិបាក ដោយសារតែវាស្រដៀងទៅនឹងគ្រុនផ្ដាសាយ ឬគ្រុនក្ដៅធម្មតា។ ប្រសិនបើម៉ាក់ៗសង្កេតឃើញអាអូនមានរោគសញ្ញាដូចជា ក្ដៅខ្លួន ងងុយគេងខ្លាំង ពិបាកដកដង្ហើម ស្រៀវស្រាញខ្លាំង ចង្អោរ មិនញ៉ាំអាហារ និងឈឺសាច់ដុំ ចូរនាំកូនទៅជួបជាមួយនឹងគ្រូពេទ្យជាបន្ទាន់។
ម៉ាក់ៗគួរដោះស្រាយបែបណា?
ដើម្បីដោះស្រាយបញ្ហាដៃអាអូនត្រជាក់ ម៉ាក់ៗគប្បីអនុវត្តវិធីសាស្ត្រទូទៅ ខាងក្រោមនេះ។
- ពិនិត្យដងខ្លួន និងបរិវេណពោះឲ្យបានដិតដល់ ពីព្រោះនៅពេលដែលផ្នែកកណ្ដាលនៃរាងកាយមានកម្ដៅ ម៉ាក់ៗមិនចាំបាច់បារម្ភឡើយ។ ម៉ាក់ៗគប្បីរុំក្បាល និងរាងកាយកូនឲ្យបានច្រើនជាន់ ក៏ដូចជាពាក់ស្រោមដៃ និងស្រោមជើងឲ្យអាអូន។ ចូរពិនិត្យដៃអាអូននៅរយៈពេល២០នាទីក្រោយ ដើម្បីឲ្យដឹងថាដៃរបស់ទារកមានកម្ដៅវិញហើយឬនៅ។
- ពិនិត្យសីតុណ្ហភាពក្នុងបន្ទប់មើលថែទាំកូន ។ ជាធម្មតា សីតុណ្ហភាពដែលសមល្មម គឺចាប់ពី២០ដល់២២អង្សាសេ។ បន្ទប់ដែលក្ដៅខ្លាំងក៏អាចបង្កើនហានិភ័យនៃការស្លាប់ភ្លាមៗរបស់ទារកដែរ។
- ប្រសិនបើកូនមានរោគសញ្ញាមិនប្រក្រតីដូចជា ក្អួត រាករូស ផ្នែកកណ្ដាលនៃរាងកាយមានភាពត្រជាក់ ចេញកន្ទួល បាត់បង់ចំណង់អាហារ ឬប្រកាច់ ដែលអមជាមួយនឹងអាការៈត្រជាក់ដៃនេះ ចូរនាំកូនទៅជួបជាមួយនឹងគ្រូពេទ្យភ្លាមៗ។
អត្ថបទគួរអាន៖
- ដឹងគន្លឹះទាំងនេះ ការពារកូនពីបញ្ហាស្បែកក្នុងខែរងា
- តើ Prebiotics និង Probiotics ជាអ្វី និងមានអត្ថប្រយោជន៍អ្វីខ្លះដល់កុមារ?
- ហេតុអ្វីម៉ាក់ប៉ាមិនគួរឱ្យកូនញុំាអាហារច្រើនមុនពេលចូលគេង?
- ផ្ដល់អាហារទាំងនេះឲ្យកូនញ៉ាំ ជួយកាត់បន្ថយការរលាកក្នុងខ្លួនកូន
- ពិតទេ ក្មេងៗមើលទូរស័ព្ទយូរ អាចកើតអូទីស្សឹម?មិនចង់ឱ្យកូនមានបញ្ហាអាលែកហ្ស៊ី ម៉ាក់ប៉ាគួរធ្វើម៉េច?
- បើកូនកើតអូទីស្សឹម គួរយកទៅព្យាបាលនៅពេទ្យណា?កូនញុំាហ្វាសហ្វូតញឹកញាប់ប៉ះពាល់អ្វីខ្លះ? កែខៃម៉េច?
