ការសិក្សាមួយចំនួនបានលើកឡើងថាស្រីៗមានកម្រិតវីតាមីនD ក្នុងរាងកាយទាបប្រឈមនឹងហានិភ័យខ្ពស់ក្នុងការកើតជំងឺមហារីកសុដន់។ ក្រុមអ្នកស្រាវជ្រាវយល់ថាវីតាមីន D អាចដើរតួជាអ្នកគ្រប់គ្រងភាពប្រក្រតីរបស់កោសិកាសុដន់ ហើយក៏ប្រហែលជាអាចបញ្ឈប់កោសិកាមហារីកមិនឲ្យលូតលាស់ក្នុងសុដន់ដែរ។
១. វីតាមីនD និងជំងឺមហារីកសុដន់
ការសិក្សារកឃើញថាការធ្លាក់ចុះនៃវីតាមីនD ក្នុងរាងកាយធ្វើស្រីៗជិតអស់រដូវ និងក្រោយអស់រដូវប្រឈមខ្ពស់នឹងការកើតជំងឺមហារីកសុដន់។ ការសិក្សានេះធ្វើឡើងលើអ្នកទើបរកឃើញថាមានជំងឺមហារីកសុដន់ ហើយអ្នកទាំងនោះមានកម្រិតវីតាមីនD ទាបបំផុត។ ការសិក្សាបានរកឃើញថា ស្រ្តីកើតជំងឺមហារីកសុដន់សុទ្ធតែមានកម្រិតវីតាមីនDទាបជាងស្រ្តីដែលគ្មានជំងឺនេះ។
ការសិក្សាខ្លះទៀតបញ្ជាក់ប្រហាក់ប្រហែលគ្នាដែរថា ស្រ្តីមានដែលកម្រិតវីតាមីនDក្នុងឈាមខ្ពស់ អាចបន្ថយហានិភ័យកើតជំងឺមហារីកសុដន់បាន៤៥ភាគរយ បើធៀបទៅនឹងស្រ្តីផ្សេងទៀតដែលមានវីតាមីនD ក្នុងឈាមទាប។ ទោះយ៉ាងណា ក្រុមអ្នកស្រាវជ្រាវមិនទាន់ដឹងនៅឡើងថាកម្រិតវីតាមីនD ក្នុងឈាមប៉ុនណាទើបអាចបង្ការជំងឺមហារីកសុដន់បាន ដោយគ្រាន់ណែនាំឲ្យស្រ្តីគ្រប់រូបត្រូវរក្សាកម្រិតវីតាមីនD ឲ្យបានក្នុងកម្រិតធម្មតាដែលរាងកាយត្រូវការ។
វីតាមីនD មិនត្រឹមតែជួយពង្រឹងសុខភាពឆ្អឹងប៉ុណ្ណោះទេ តែវាក៏មានសមត្ថភាពក្នុងការផ្លាស់ប្ដូរលក្ខណៈសម្បត្តិរបស់ជំងឺមហារីកមួយចំនួនផងដែរ។ ការសិក្សាលើកោសិកាមហារីក និងដុំសាច់នៅលើសត្វកណ្ដុរ បានរកឃើញថាវីតាមីនD បានបញ្ចេញសកម្មភាពជាច្រើនដែលពន្យឺត ឬការពារការវិវត្តជាជំងឺមហារីក រួមទាំងជំរុញភាពខុសគ្នានៃកោសិកា បន្ថយការលូតលាស់កោសិកាមហារីក និងភ្ញោចកោសិកាងាប់ និងកាត់បន្ថយការកកើតដុំសាច់ក្នុងសរសៃឈាម។
គណនា BMI
គណនា BMR
កម្មវិធីពិនិត្យជំងឺបម្រុងទឹកនោមផ្អែមអនឡាញ
កម្មវិធីពិនិត្យបញ្ហាលិង្គមិនឡើងរឹងអនឡាញ
![ពិនិត្យសុដន់](https://cdn.hellokrupet.com/wp-content/uploads/2021/05/6de23149--300x200.jpg)
២. ប្រភព និងប្រយោជន៍វីតាមីនD
វីតាមីន D ក្រៅពីជួយស្រីៗកាត់បន្ថយហានិភ័យកើតជំងឺមហារីកសុដន់ ក៏ត្រូវបានអ្នកស្រាវជ្រាវរកឃើញថាមានប្រយោជន៍កាត់បន្ថយបញ្ហាសុខភាពមួយចំនួនទៀតដូចជា ជំងឺទឹកនោមផ្អែម បញ្ហាដំណេក ខ្សោយសាច់ដុំ និងខ្សោយងាយដួល ជាដើម។
វីតាមីន D ជួយរាងកាយស្រូបយកកាល់ស្យូម ដែលជារ៉ែសំខាន់សម្រាប់សុខភាពឆ្អឹង។ វីតាមីនD ក៏ជួយឲ្យប្រព័ន្ធភាពស៊ាំ សាច់ដុំ និងប្រព័ន្ធប្រសាទធ្វើការបានត្រឹមត្រូវ។ វីតាមីន D ភាគច្រើន ទទួលបាននៅពេលស្បែករបស់មនុស្សយើងត្រូវពន្លឺព្រះអាទិត្យ និងមួយចំនួនទៀតអាចទទួលបានពីអាហារ ដូចជាទឹកដោះគោ យ៉ាអួរ ត្រី និងស៊ុត ជាដើម។
ដោយសារមនុស្សយើងមួយចំនួនមិនសូវបានត្រូវពន្លឺថ្ងៃ និងអ្នកខ្លះបានប្រើក្រែមការពារកម្ដៅថ្ងៃទៀត ការទទួលបានវីតាមីន D ក៏មានកម្រិតតិចតួចដែរ។ ជាការណែនាំ មនុស្សយើងគួរត្រូវពន្លឺព្រះអាទិត្យឲ្យបានយ៉ាងតិច១៥នាទី និងបានបីដងក្នុងមួយសប្ដាហ៍។ ដូចគ្នាដែរ ការត្រូវពន្លឺថ្ងៃខ្លាំង និងច្រើនពេក ក៏អាចធ្វើឲ្យយើងប្រឈមនឹងបញ្ហាជំងឺមហារីកស្បែកដែរ។ ដូចនេះ ត្រូវកម្រិត និងកំណត់ពេលវេលាក្នុងការទទួលបានពន្លឺថ្ងៃរបស់យើង។