ការតជែលក្រចកមានការពេញនិយមខ្លាំងសម្រាប់ស្រីៗយើងនៅពេលបច្ចុប្បន្ននេះ។ យ៉ាងណាមិញ ថ្វីត្បិតតែការតជែលមានភាពស្រស់ស្អាត និងអាចរក្សាទុកបានយូរក៏ពិតមែន ប៉ុន្តែវាត្រូវការជំនួយពីកាំរស្មីUV ដើម្បីធ្វើឲ្យជែលឆាប់ស្ងួតល្អ ដែលដំណើរការនេះអាចបង្កើនហានិភ័យនៃការកើតជំងឺមហារីកស្បែក ប្រសិនបើយើងតជែលជារៀងរាល់ពីរបីសប្ដាហ៍ម្ដង។
មានកាំរស្មីUV មានចំនួន៣ប្រភេទ ដែលកាំរស្មីទាំងនេះសុទ្ធតែបំផ្លាញស្បែក ប៉ុន្តែមានតែកាំរស្មីUVA និងUVB ប៉ុណ្ណោះដែលអាចមកដល់ផ្ទៃផែនដី។ ពិតណាស់ កាំរស្មីUVកើតចេញពីព្រះអាទិត្យ អាចជួយស្បែកផលិតវីតាមីនD តែវាក៏អាចបង្កឲ្យមានការរលាកប្រសិនបើយើងប៉ះពាល់រយៈពេលយូរ។ លើសពីនេះ កាំរស្មីUVក៏អាចបង្កគ្រោះថ្នាក់ និងធ្វើឲ្យស្បែករបស់យើងឆាប់ចាស់មុនវ័យ និងលេចចេញស្នាមជ្រីវជ្រួញ។ កាំរស្មីទាំងនេះ អាចជ្រាបចូលទៅក្នុងស្រទាប់ស្បែកយ៉ាងជ្រៅ ដោយបំផ្លាញDNAនៅក្នុងកោសិកាស្បែក និងធ្វើឲ្យប្រព័ន្ធភាពស៊ាំចុះខ្សោយ ក៏ដូចជាធ្វើឲ្យរាងកាយពិបាកទប់ទល់នឹងការឆ្លងមេរោគ និងបង្កើនហានិភ័យនៃជំងឺមហារីកស្បែក។
ម៉ាស៊ីនសម្ងួតក្រចកប៉ះពាល់ស្បែកយ៉ាងម៉េចខ្លះ?
ម៉ាស៊ីនសម្ងួតក្រចកដែលប្រើប្រាស់ក្នុងអំឡុងពេលតជែល បញ្ចេញកាំរស្មីUVក្នុងបរិមាណខុសៗគ្នា ព្រោះវាមានកម្រិតពន្លឺខុសៗគ្នា ហើយកម្លាំងក៏អាស្រ័យលើថាមពលចំនួនវ៉ាត់របស់ម៉ាស៊ីនដូចគ្នា។ ដូច្នេះហើយ ម៉ាស៊ីនដែលមានចំនួនវ៉ាត់ខ្ពស់ បញ្ចេញកាំរស្មីកាន់តែច្រើន។
![តក្រចក](https://cdn.hellokrupet.com/wp-content/uploads/2021/12/តក្រចក២.jpg)
ជំងឺមហារីកស្បែកអាចកើតនៅលើដៃ ជើង និងក្រោមក្រចក
មហារីកស្បែកអាចវិវត្តនៅក្រោមក្រចក និងដៃទាំងពីរ ក៏ដូចជាម្រាមដៃ និងម្រាមជើង។ ចំណែកឯជំងឺមហារីកស្បែកដែលកើតនៅក្រោមក្រចក អាចមានពណ៌ត្នោតខ្ចី ឬចាស់នៅលើក្រចក និងមានលក្ខណៈបញ្ឈរ។ ដូចនេះ គ្នាយើងគប្បីពិគ្រោះជាមួយនឹងគ្រូពេទ្យជំនាញ ប្រសិនបើក្រចកមានពណ៌ក្រមៅ និងកាន់តែធំទៅៗ ព្រមទាំងគ្របដណ្ដប់នៅលើផ្ទៃក្រចក។ ម្យ៉ាងវិញទៀត យើងក៏ត្រូវប្រុងប្រយ័ត្ន ប្រសិនបើដៃ ឬជើងរបស់យើងមានដំបៅក្រហម ស្នាមអុជៗ ឬឫសដែលក្រជាសះស្បើយ។