កូននិយាយច្រើនពេលក្ដៅខ្លួន មកពីប៉ះពាល់ខួរក្បាល ឬយ៉ាងម៉េច?

    កូននិយាយច្រើនពេលក្ដៅខ្លួន មកពីប៉ះពាល់ខួរក្បាល ឬយ៉ាងម៉េច?

    កូន​និយាយ​ច្រើនពេលក្ដៅ​ខ្លួន​ អាចជាបញ្ហាមួយម៉ាក់ប៉ាខ្លះជួបប្រទះ បើ​ទោះ​ជា​កម្ដៅ​ក្នុង​ខ្លួន​មិន​ដល់ ៣៩ អង្សាសេ​ក៏​ដោយ តើ​នោះ​បណ្ដាល​មកពី​អ្វី? ឬមកពីប៉ះពាល់ខួរក្បាល ឬយ៉ាងមេច? ចម្ងល់​នេះ​ត្រូវ​លោក​វេជ្ជបណ្ឌិត ហ៊ាង រតនា បកស្រាយ​ថា មក​ពី​គេជាក្មេង​​រឹងមាំ ហើយ​ការ​និយាយ​បន្លប់​ព្រោះ​ភ័យ រងា និង​ពិបាក​ក្នុង​ខ្លួន។

    លោក​បាន​បន្ថែម​ថា ក្មេង​ខ្លះ​ពេល​ក្ដៅ​ខ្លួន​មិន​និយាយ​អ្វី​ទាំងអស់ គិត​តែ​ពី​យំ ឬ​សឺ​ៗ​ចង់​តែ​គេង​រហូត តែ​ក្មេង​និយាយ​ច្រើន​ពេល​ក្ដៅ​ខ្លួន ព្រោះ​គេជា​កូន​ស្និទ្ធ​ជាមួយ​ម៉ាក់ប៉ា និង​ដឹង​ថា​យើង​បាន​ផ្ដល់​ភាព​កក់​ក្ដៅ​ដល់​គេ​បាន​ច្រើន ទើប​ចង់​រាយរាប់​ប្រាប់ តែ​ដោយសារ​តែ​នៅ​តូច​ពេក​ទើប​មិន​ដឹង​ប្រាប់​ថា​ឈឺ ឬ​ពិបាក​បែប​ណា។ ពេល​ពិបាកក្នុងខ្លួន មនុស្សធំខ្លះក៏មួរម៉ៅ ហើយ​ក្មេង​ចង់​បង្ហាញ​អារម្មណ៍​ប្រាប់​យើង ដោយ​ការ​និយាយ​នេះ​និយាយ​នោះ​មិន​ឈប់ ហើយ​បើ​សួរ​ថា​ឈឺ​ត្រង់​នេះ​មែន គេ​អាច​ងក់ក្បាល​ប្រាប់​ថា​ឈឺ​ត្រង់​នេះ ត្រង់​នោះ​បាន​ខ្លះ​ៗ តែ​មិន​អស់​សេចក្ដី។

    ចង់គណនាថ្ងៃសម្រាលកូន ចុចទីនេះ!
    ចង់គណនាទម្ងន់ស្រ្តីពពោះ ចុចទីនេះ!
    ចង់គណនាថ្ងៃមេជីវិតញីទុំធ្លាក់ ចុចទីនេះ!
    ចង់ដឹងអត្ថន័យពណ៌ និងរូបរាងលាមកទារក ចុចទីនេះ!

    វេជ្ជបណ្ឌិត​ជំនាញ​ជំងឺ​ទូទៅ និង​កុមារ​រូប​នោះ​បន្ថែម​ថា ហេតុផល​មួយ​ទៀត​គេ​អាច​ជា​ក្មេង​ឆ្លាត និយាយ​ច្រើន សួរដេញដោល​មិន​ឈប់ ទើប​ពេល​ក្ដៅ​ខ្លួន​ក៏​រហូត​ទៅ ឲ្យ​យើង​ស្ដាប់​ឮ​កាន់តែ​ច្រើន ហើយ​ក្មេង​បែប​នេះ​ទោះ​មិន​ឈឺ​ក៏​និយាយ​ច្រើន និង​រវៀសរវៃ​ជាង​ក្មេង​ដទៃ​ដែរ ចំពោះ​ក្មេង​បែបនេះ​ក៏​មិន​ងាយ​ឈឺ​គេង​ស្ទិក​នៅ​មួយ​កន្លែង​ដែរ។

    កូន​និយាយ​ច្រើនពេលក្ដៅ​ខ្លួន​

    លោក​បញ្ជាក់​ទៀត​ថា ក្មេង​ដែល​ក្ដៅ​ខ្លួន​ដោយសារ​រលាក​បំពង់ក ផ្ដាសាយ គ្រុន​ក្ដៅ​អី​អស់​នោះ ទោះ​ជា​ក្ដៅ​ខ្លាំង​ដល់ ៤០ អស្សាសេ ក៏​មិន​ប៉ះពាល់​ដល់​ខួរក្បាល​ដែរ ហើយ​កម្ដៅ​ក្ដៅ​ខ្លួន​ខ្លាំង​ក៏​មិន​បណ្ដាល​ឲ្យ​រលាក​ខួរក្បាល​ដែរ។ ស្ថិត​ក្នុង​អាកាសធាតុ​ត្រជាក់បែបនេះ​ទៀត ក្មេង​ៗ​ងាយឈឺ ​ក្ដៅ​ខ្លួន ផ្ដាសាយ រលាក​បំពង់​ណាស់ ដូច្នេះ​ត្រូវ​ថែទាំ​ឲ្យ​បាន​ដិតដល់។

    ប៉ុន្តែ​បើ​ក្ដៅ​ខ្លួន​ដោយសារ​មាន​មេរោគ ទៅ​ប៉ះពាល់​ដល់​ខួរក្បាល​ទើប​រលាក​ខួរក្បាល។ ភាគច្រើន​មេរោគ​ទៅ​ប៉ះពាល់​ខួរក្បាល​ទើប​បណ្ដាល​ឲ្យ​ក្ដៅខ្លួន​ខ្លាំង មិនមែន​ក្ដៅ​ខ្លួន​ខ្លាំង​ធ្វើឲ្យ​ប៉ះពាល់​ខួរក្បាល​ឡើយ។ ក្មេង​ខ្លះ​ក្ដៅ​ខ្លួន​ខ្លាំង​រ៉ាំរ៉ៃ ធ្វើឲ្យ​ខ្សោះ​ជាតិ​ទឹក បង្ក​ឲ្យ​ឈាម​មាន​មេរោគ​ច្រើន ជា​ហេតុ​នាំ​ឲ្យ​អុកស៊ីហ្សែន​ទៅ​ចិញ្ចឹម​ខួរក្បាល​មិន​បាន​ល្អ ទើប​ជា​ហេតុ​បង្ក​ឲ្យ​ប៉ះពាល់​ខួរក្បាល។

    វេជ្ជបណ្ឌិត​បញ្ជាក់​ទៀត​ថា បើ​រលាក​ខួរក្បាល​ទើប​ក្ដៅខ្លួន​រហូត​ដល់​ប្រកាច់ ប៉ុន្តែ​បើ​ក្ដៅ​ព្រោះ​ជំងឺ​ដូច​បាន​រៀបរាប់​នោះ​មិន​បណ្ដាល​ឲ្យ​ប្រកាច់​ឡើយ លើកលែង​តែ​យើង​ទុក​ឲ្យ​កូន​ក្ដៅ​យូរ​ម៉ោង ដោយ​មិន​បាន​បញ្ចុះ​កម្ដៅ​តាម​រយៈ​ការ​ជូត​សម្អាត​ខ្លួន​ជាមួយ​ទឹក​ត្រជាក់ និង​ឲ្យ​ថ្នាំ​កូន​តាម​កម្រិត​ដូស​ត្រឹមត្រូវ។

    ដូចនេះ​ប្រសិនបើ​កូន​មាន​សីតុណ្ហភាព​លើស​ពី ៣៨ អស្សាសេ ត្រូវ​បញ្ចុះ​កម្ដៅ​ដោយ​ជូត​ខ្លួន បន្ទាប់​មក​ឲ្យ​ថ្នាំ​ប៉ារ៉ាសេតាមុល ហើយ ៤ ឬ ៦ ម៉ោង​ក្រោយ​បើ​នៅតែ​មិន​ទាន់​ត្រជាក់​ត្រូវ​ប្រញាប់​នាំ​កូន​ទៅ​ជួប​គ្រូពេទ្យ ហើយ​នៅ​ផ្ទះ​គួរតែ​មាន​ថ្នាំ​បញ្ចុះ​កម្ដៅ​ត្រៀម​ទុក​ដែរ។

    ចំណុចសំខាន់

    • និយាយច្រើនពេលក្ដៅខ្លួន គឺក្មេង​​រឹងមាំ ហើយ​ការ​និយាយ​បន្លប់​ព្រោះ​ភ័យ រងា និង​ពិបាក​ក្នុង​ខ្លួន។
    • ក្មេងក្ដៅខ្លួនមិនងាយធ្វើឲ្យប៉ះពាល់ដល់ខួរក្បាលទេ ទោះកម្ដៅឡើងដល់ ៤០អង្សារសេក៏ដោយ។
    • យ៉ាងណា ម៉ាក់ប៉ាមិនត្រូវទុកកូនក្ដៅខ្លួនរហូតដល់ប្រកាច់ឡើយ ត្រូវនាំកូនទៅពេទ្យឲ្យទាន់ពេល។

    អត្ថបទគួរអាន៖

    Hello Health Group និង “Hello គ្រូពេទ្យ” មិន​ចេញ​វេជ្ជបញ្ជា មិន​ធ្វើ​រោគវិនិច្ឆ័យ ឬ​ព្យាបាល​ជូន​ទេ៕

    រូបថត​របស់​អ្នក​និពន្ធbadge
    ដោយ Try Ravi កែសម្រួល​ចុងក្រោយ 28/07/2022
    ត្រួតពិនិត្យដោយ វេជ្ជ. ចាន់ ស៊ីណេត