តើមានស្ត្រីប៉ុន្មានភាគរយ ក្នុងចំណោមស្ត្រីសរុបលើពិភពលោកដែលគ្រប់អាយុ បម្រើការងារក្នុងវិស័យសុខាភិបាល? ឬក្ដោបតួនាទីធំៗផ្នែកសុខាភិបាល? មានចំណេះដឹងផ្នែកសុខភាពទូលំទូលាយដើម្បីឈរនៅទីតាំងមួយផុតពីទីរងគ្រោះបញ្ហាសុខភាពទាំងឡាយណាដែលអាចការពារបាន? ឬអាចព្យាបាលបាន? តើអ្នកបានចូលរួមការយកចិត្តទុកដាក់ទាំងសុខភាពខ្លួនឯង និងអ្នកឯទៀតកម្រិតណាដែរ?
ខ្ញុំបានធ្វើ បន្តធ្វើ និងនៅតែធ្វើទៀតពីបញ្ហាសុខភាពស្ត្រី ក្នុងតួនាទីជាអ្នកសារព័ត៌មានឌីជីថលអាជីព ខ្ញុំបានមើលឃើញពីចន្លោះខ្វះខាតក្នុងការច្របាច់បញ្ចូលគ្នារវាងអាជីពសារព័ត៌មាន ជាមួយអាជីពវេជ្ជសាស្ត្រ។ បន្ទាប់ពីចំណាយពេលវេលារៀនសូត្រពីសារព័ត៌មានធំបំផុតមួយនៅកម្ពុជាជិត ១០ឆ្នាំ ខ្ញុំក៏បានទាក់ទងឲ្យសិក្សាស្វែងយល់ពីវត្តមានរបស់ “Hello គ្រូពេទ្យ” ដែលចង់បោះទុនវិនិយោគក្នុងការសាបព្រោះ ផ្សព្វផ្សាយពីសារសំខាន់នៃចំណេះដឹងយ៉ាងស៊ីជម្រៅផ្នែកសុខភាព។ ក្រៅពីការងារមួយដែលយើងស្រលាញ់ គឺការប្រើប្រាស់វិជ្ជាជីវៈក្នុងកម្រិតទទួលខុសត្រូវខ្ពស់បំផុតដើម្បីជាប្រយោជន៍សង្គមជាតិ និងបងប្អូនខ្មែរយើងឲ្យទទួលបានអ្វី ដែលថ្មី អ្វីជាពុទ្ធិនិងគន្លឹះចំណេះដឹងសុខភាពបន្ថែមដើម្បីជាចំណែកមួយក្នុងការសម្រេចចិត្តផ្នែកវេជ្ជសាស្ត្រឲ្យបានទាន់ពេលវេលា និងត្រឹមត្រូវបំផុត ក្នុងគោលបំណងឲ្យជីវិតរស់នៅកាន់តែល្អប្រសើរទាំងសុខភាពផ្លូវចិត្តនិងផ្លូវកាយ តាមរយៈទម្រង់ឌីជីថល។ ក្រៅពីក្រុមការងារអ្នកសារព័ត៌មាន យើងមានវេជ្ជបណ្ឌិត វេជ្ជបណ្ឌិតជំនាញ(ឯកទេស) ដើម្បីត្រួតពិនិត្យរាល់មាតិកាមុនចេញផ្សាយ ឬឆ្លើយតបសំណួរបងប្អូនអ្នកអានរាប់ពាន់រាប់ម៉ឺនក្នុងមួយខែៗ លើបញ្ហាសុខភាពច្រើនរាប់មិនអស់។ ខ្ញុំក៏សប្បាយចិត្តដូចបងប្អូនអ្នកអានយើង ដែលបានការឆ្លើយតបពីវេជ្ជបណ្ឌិតរបស់យើងដើម្បីជាដំណោះស្រាយហើយបានផល។
ចង់គណនាថ្ងៃសម្រាលកូន ចុចទីនេះ!
ចង់គណនាទម្ងន់ស្រ្តីពពោះ ចុចទីនេះ!
ចង់គណនាថ្ងៃមេជីវិតញីទុំធ្លាក់ ចុចទីនេះ!
ចង់ដឹងអត្ថន័យពណ៌ និងរូបរាងលាមកទារក ចុចទីនេះ!
ពួកយើង (Hello គ្រូពេទ្យ) មិនមានតួនាទីចេញវេជ្ជបញ្ជា ឬការព្យាបាលណាមួយជូនអ្នកអានដែលមានចម្ងល់ ឬបញ្ហាសុខភាពកម្រិតណាមួយនោះទេ តែអ្វីដែលយើងអាចធ្វើបានគឺផ្ដល់មាតិកាលើបញ្ហាសុខភាពជាក់លាក់ក្នុងកម្រិតច្បាស់លាស់មួយដែលមានលំហូរត្រួតពិនិត្យដោយការីនិពន្ធ និពន្ធនាយកនិងវេជ្ជបណ្ឌិតនានាទៅតាមជំនាញ។
ប្រភព៖ ទិន្នន័យពីWHO អំពីមុខតំណែងស្ត្រីជាន់ខ្ពស់វិស័យសុខាភិបាល
ខ្ញុំសុំបញ្ជាក់ពីតួនាទីរបស់វិបសាយសុខភាព Hello គ្រូពេទ្យ ប៉ុណ្ណេះចុះ។ ខ្ញុំចូលរួមយុទ្ធនាការបង្កើត Hello គ្រូពេទ្យតាំងពីក្រុមហ៊ុននេះបោះជំហានក្នុងទីផ្សារកម្ពុជាចុងឆ្នាំ ២០១៨។ ចូល ២០១៩ យើងបន្តពង្រីកក្រុមកាងារ ពង្រីកវិសាលភាពមាតិកាលើឌីជីថលពីម្នាក់ដល់ពេញរចនាសម្ព័ន្ធទាំងមូល។ ជិត ៤ឆ្នាំនេះ បើងាកទៅមើលតួលេខអ្នកអានវិញ យើងទទួលបានការគាំទ្ររាប់លាននាក់នៅកម្ពុជា រាល់មាតិកាទាំងឡាយ មិនថាទម្រង់ណាទេ។ បើគិតតែអ្នកឆ្លើយឆ្លងតាមហ្វេសបុកវិញ មួយខែៗ រាប់ម៉ឺនសំណួរ ដែលខ្ញុំខ្លួនឯងក៏មិននឹកស្មានថា នេះជាចំនួនដែលយើងត្រូវរ៉ាប់រងឆ្លើយឆ្លងដល់បងប្អូនយើងដែរ។ ទិន្នន័យមួយទៀតគឺ ចំនួនអ្នកបានឃើញមាតិកាទាំងអស់របស់យើងមានលើស ៥០% នៃអ្នកប្រើប្រាស់អ៊ិនធឺណិតក្នុងស្រុកសឹងមិនគួរឲ្យជឿ។ សឹងមិនគួរឲ្យជឿត្រង់ថា យើងមិនមែនជាមាតិកាកម្សាន្តអីទេ តែជាមាតិកាសុខភាព អាចថាគួរឲ្យធុញទ្រាន់ ប៉ុន្តែបែរជាមានការតាមដាននិងការគាំទ្រលើសលប់បែបនេះទៅវិញ។ ពិតហើយមុខងារហ្វេសបុកសំខាន់ក្នុងការប្រាស្រ័យទាក់ទងឆ្លើយឆ្លងជាមួយអ្នកអាន។ បញ្ហាសុខភាពពិតជាសំខាន់ ទោះអ្នកអានអ្នកលេងហ្វេសបុកជាច្រើនមិនបង្ហាញ ឬមិន Engage ផ្ទាល់ក៏ដោយ។ មាតិកាសុខភាពអាជីពដែលមានការចូលរួមពីក្រុមគ្រូពេទ្យ បើគិតទៅមិនធំទេ បើធៀបទៅនឹងវិស័យនានាដូចជាកម្សាន្ត នយោបាយ បច្ចេកវិទ្យា កីឡា ឬយានយន្តក្ដី ប៉ុន្តែ អ្នកមានចំណាប់អារម្មណ៍លើផ្នែកធំៗទាំងនោះ ទោះមានច្រើនផេកបញ្ចូលគ្នាក៏មិនប្រាកដថា ទទួលបានសំណួរដូចរឿងភាគឆ្លើយឆ្លងរាប់ពាន់រាប់ម៉ឺនដូច្នេះដែរ។ នេះបើតាមបទពិសោធន៍ខ្ញុំផ្ទាល់។
ត្រូវហើយ! សំណួរនានាជាច្រើនពីហ្វេសបុកភាគច្រើនជាមនុស្សស្រី ជាស្ត្រី ហើយអ្នកអានយើងសរុបក៏ជាស្ត្រីដែរភាគច្រើន។ ខ្ញុំបញ្ជាក់ខាងលើថា ពេលមានអ្នកចូលមើលយើងលើស ៥០ភាគរយនៃអ្នកប្រើប្រាស់អ៊ិនធឺណិតក្នុងស្រុកសរុប ក៏ភាគរយច្រើនជាមនុស្សស្រីដែរ។ ក្នុងនាមខ្ញុំជាក្រុមការងារ និងតាងនាមឲ្យថ្នាក់ដឹកនាំស្ថាប័ន សូមសម្ដែងការអរគុណយ៉ាងជ្រាលជ្រៅបំផុត ហើយនេះក៏ជាទឡ្ហីករណ៍វិជ្ជមានយ៉ាងប្រាកដចំពោះអ្វីដែលយើងខិតខំហុចផ្លែផ្កាជាប្រយោជន៍ដោយប្រយោលដល់បងប្អូនជនរួមជាតិខ្ញុំ ទាំងអស់ដែលបានគាំទ្រ ហើយជាពិសេសចំពោះបងប្អូនស្រីៗ ជាប្អូន ជាក្មួយ ជាបង ជាមីង ជាអ៊ំ ឬជីដូន មិនថាការតាមដានដោយផ្ទាល់ ឬតាមរយៈមិត្តភ័ក្ដិ ឬសមាជិកក្នុងគ្រួសារ។ ទិន្នន័យទាំងនេះបង្ហាញភាពវិជ្ជមានថា បញ្ហាសុខភាពប្រសិនបើអ្នកអាន ផ្ដល់ទំនុកចិត្ត យើងផ្សាយចំៗបញ្ហាដើម្បីឆ្លើយតបទៅនឹងជំងឺ ឬស្ថានភាពសុខភាពអត់ស្រួលណាមួយ ចំណាយពេលប្រឹក្សា ឆ្លើយឆ្លង ច្បាស់ណាស់កម្រិតនៃការយកចិត្តទុកដាក់របស់ពួកគាត់កើនឡើងមិនថាសម្រាប់ខ្លួនឯង ឬដើម្បីបានចម្លើយទៅឲ្យមនុស្សស្រីជិតស្និទ្ធនឹងគាត់ផ្សេងទៀតនោះទេ។
មាតិកាធំៗយើងមានសរុប ២៩។ តែខ្ញុំលើកយកតែមាតិកាដែលបងប្អូនយើងអ្នកអានជាស្ត្រីចុចចូលអានច្រើនបំផុតលើវិបសាយ ៣ប៉ុណ្ណោះ៖
- ពពោះ ៖ ចំណេះដឹងសុខភាពច្បាស់លាស់ទាំងស្រុងរបស់ស្ត្រី រាប់ចាប់ពីការត្រៀមយកកូន បញ្ហាមានផ្ទៃពោះ ការថែទាំនិងបញ្ហាកូនក្នុងផ្ទៃ រហូតដល់សម្រាលកូន។
- ចិញ្ចឹមកូន ៖ រាប់ចាប់ពីកូនចាប់កំណើតរហូតដល់វិធីសាស្ត្រល្អបំផុត ឬគន្លឹះចិញ្ចឹមបីបាច់កូនរហូតដល់កូនធំ។
- សុខភាពស្ត្រី ៖ បញ្ហាឈាមរដូវ បញ្ហាទ្វារមាស ស្បូន និងជំងឺមួយចំនួនផ្សេងទៀត ដែលស្ត្រីមួយចំនួនព្យាយាមតាមដានមាតិកាដែលយើងចេញផ្សាយដោយយកចិត្តទុកដាក់សុទ្ធតែទទួលបានចំណេះដឹងជាក់ស្ដែងទាំងនោះ។
ក្រៅពីបានសម្ភាសន៍វាគ្មិនជាអ្នកជំនាញ គ្រូពេទ្យឯកទេសនានានៅតាមស្ថាប័ន(ពេទ្យ) ធំៗជាច្រើន លោកបានលើកសរសើរពីកម្រិតនៃការឆ្លើយតប និងជាឃ្លាំងផ្ដល់ដំណឹងសុខភាព គន្លឹះចំណេះដឹងសុខភាពដល់ស្ត្រីជាច្រើន មុនឈានដល់ការរត់ទៅរកគ្រូពេទ្យដោយផ្ទាល់។ Hello គ្រូពេទ្យ បានរួមចំណែកយ៉ាងសកម្មក្នុងការផ្ដល់ចំណេះដឹងទូទៅក្នុងកម្រិតស្រាល មិនចាំបាច់រត់ទៅពេទ្យ ព្រោះករណីខ្លះជាម៉ាក់ ជាមនុស្សស្រីអាចដោះស្រាយបញ្ហាសុខភាពមិនបង្កគ្រោះថ្នាក់ធ្ងន់ដោយខ្លួនឯងនៅផ្ទះបាន កាត់បន្ថយចំណាយ ក្នុងការធ្វើដំណើរ ឬថ្លៃថ្នាំ ថ្លៃព្យាបាលជាដើម។ ចំណុចសំខាន់មួយទៀតគឺ ទទួលបានចំណេះដឹង និងមិនភ័យតក់ស្លុតពេកប្រសិនបើខ្លួនស្ថិតក្នុងស្ថានភាពព្រួយបារម្ភ(ដោយអារម្មណ៍) ឬក៏ចំណេះដឹងពីការពពោះ បញ្ហារោគស្ត្រី បញ្ហាឈាមរដូវ ការចិញ្ចឹមកូន និងការបង្ការគ្រោះថ្នាក់ផ្សេងៗទៀត។
ត្រូវហើយយើងនិយាយដល់រាប់ពាន់រាប់ម៉ឺនសំណួរពីអ្នកអានរាល់ៗខែ ប៉ុន្តែឲ្យខ្ញុំសុំទោស ខ្ញុំមិនអាចបង្ហាញអត្តសញ្ញាណអ្នកអានយើងណាម្នាក់ជាឧទាហរណ៍នៅទីនេះបានទេ ឬបើមិនដូច្នេះទេ គ្នាយើងខ្លះមានអារម្មណ៍ថាដូចឆ្ងាយពេក។ ប៉ុន្មានឆ្នាំមកនេះ ពេលដឹងឮថាខ្ញុំ ឈរជើងនៅស្ថាប័នសុខភាពនេះ មានមិត្តភ័ក្ដិ មានបងប្អូនយើងជាស្រីខ្លះ ប្រុសខ្លះ ច្រើនណាស់ដែលពិភាក្សាគ្នា ចង់បានប្រឹក្សា សួរនាំជាដើម ទោះដឹងថាខ្ញុំមិនមែនជាពេទ្យ មិនមែនជាវេជ្ជបណ្ឌិត ប៉ុន្តែពួកគេដឹងថា យើងមានវេជ្ជបណ្ឌិតឲ្យដោះស្រាយបញ្ហាកម្រិតស្រាលៗទាំងនោះបាន។
ខ្ញុំសុំលើកឧទាហរណ៍មួយចំនួន ជាមួយអ្នកដែលខ្ញុំស្គាល់ជាក់ស្ដែង និងបែងចែកស្ថានភាពសុខភាពជា ៣គឺ៖
បញ្ហាផ្លូវចិត្ត
អ្នកមានបញ្ហាផ្លូវចិត្ត មានច្រើនទម្រង់ ឬធ្ងន់ស្រាលទៅតាមសាច់រឿងរបស់ម្នាក់ៗឆ្លងកាត់។ បើគិតដល់វិបត្តិផ្លូវចិត្តធ្ងន់ធ្ងរ ឬយើងហៅថាជំងឺថប់បារម្ភ WHO បញ្ជាក់ថា ប្រជាជនសរុបលើពិភពលោកមានបញ្ហាផ្លូវចិត្តប្រមាណ ៥%នៃប្រជាជនជាង ៧ពាន់លាន(៧ប៊ីលាន)នាក់ ដែលវាជាដើមចមឈានទៅរកការធ្វើអត្តឃាត ហើយក្នុងនោះ ស្ត្រីជាអ្នកងាយរងគ្រោះជាងមនុស្សប្រុស។ អ្នកខ្លះរកស៊ីខាតបង់អស់ពីខ្លួន ជួបបញ្ហាអគ្គីភ័យ ជួបរឿងចាញ់បោកគេ ជួបវិបត្តិក្នុងគ្រួសារ លែងលះ បែកបាក់ស្នេហា បាត់បង់មនុស្សជាទីស្រលាញ់ទាំងព្រាត់ប្រាសស្លាប់និងរស់ បញ្ហាការងារ បញ្ហាសុខភាពផ្ទាល់ខ្លួន មិនអាចមានកូនបាន។ល។ សុទ្ធតែជាអ្នកស្ថិតក្នុងបរិបទវិបត្តិផ្លូវចិត្តធ្ងន់ ហើយអ្នកខ្លះក៏មានអ្នកជម្នះឆ្លងកាត់បាន កសាងអ្វីៗល្អប្រសើរជាងពីមុនទៅទៀត។ ខ្ញុំនិយាយជារួមដូច្នេះ ក្នុងនោះក៏មានមនុស្សជុំវិញខ្លួនខ្ញុំមិនតិចទេ ដែលស្ថិតក្នុងស្ថានភាពគិតថាខ្លួនដុនដាបធ្លាក់ដល់ចំណុចសូន្យ អស់ទីពឹងដូចខាងលើ ហើយខ្ញុំជឿថា គ្នាយើង បងៗមួយចំនួនក៏អាចកំពុងមានបញ្ហាណាមួយក្នុងចំណោមខាងលើដែរ។
អ្នកមានកូនមានជំងឺអូទីស្សឹម – នេះជាអំណោយអាក្រក់បំផុតប្រសិនបើយើងជាប៉ា ជាម៉ាក់ក្មេង។ ខ្ញុំជួបបងស្រីម្នាក់ គាត់រៀបរាប់ពន្យែរពន្យល់ទាំងអួលដើមកពីអារម្មណ៍ដែលពិបាកទទួលយកបំផុត ចំពោះកូន ចំពោះអ្នកដែលគាត់ហ៊ានលះបង់សូម្បីជីវិត ដើម្បីផ្លាស់ប្ដូរសេចក្ដីសុខឲ្យកូន។ គាត់ពន្យល់ពីភាពមមាញឹករបស់យើងជាឪពុកម្ដាយ ចេញពីព្រលឹមចូលផ្ទះវិញព្រលប់ទាំងប្ដីទាំងប្រពន្ធ ក្រៅពីការងារទាំង២នាក់ នៅមានអាជីវកម្មមួយមហាសែនរវល់ទៀត។ សរុបទៅយប់ដល់ផ្ទះ មានពេលជាមួយកូនតិចតួចបំផុត បន្ទាប់ពីឆ្ងាយពីកូនបំពេញការងារមិនតិចជាង ១០ម៉ោងសឹងរាល់ថ្ងៃ។ ដូច្នេះមានតែបង្ខំចិត្តទុកកូនចោលជាមួយអ្នកផ្ទះ ហើយបណ្ដោយឲ្យគេមើលទូរស័ព្ទម៉ាងៃៗ។ ទម្លាប់បែបនេះ តាំងពីកូនជិត ១ខួប ដល់គេធំ ជាង ២ខួប បានគាត់ចាប់អារម្មណ៍។
លុះដឹងខ្លួន ដឹងថាកូនកំពុងមានបញ្ហាអូទីស្សឹម មិនខ្វល់នឹងមនុស្សជុំវិញខ្លួន មិនខ្វល់នឹងអ្នកណាទាំងអស់ មិនចង់នៅលេងជាមួយក្មេងដទៃ ចូលចិត្តនៅតែឯង គឺកូនដល់ដំណាក់កាលរាងធ្ងន់បន្តិចទៅហើយ។ អ្វីដែលគាត់បន្ទោសខ្លួនឯងបំផុតគឺទុកកូនចោលពេក ដើម្បីជីវភាព ព្រោះត្រូវរ៉ាប់រងច្រើនមួយខែៗ។ ត្រូវហើយយើងមើលទៅអ្នកខ្លះកាត់សេចក្ដីថាអាចជាកំហុសគាត់ ប៉ុន្តែយើងអត់បានស្ថិតក្នុងស្ថានភាពជីវិតដូចគាត់ជាក់ស្ដែងទេ។ ក្រោយស្វែងយល់ពីជំងឺនេះ ក្ដីសង្ឃឹមចុងក្រោយរបស់គាត់គឺ ព្យាបាលកូនឲ្យជាដូចដើម។ ស្វែងយល់ពីជំងឺ ស្វែងរកប្រឹក្សាពីមិត្តភ័ក្ដិអ្នកធ្លាប់ជួបរឿងដូច្នេះ ស្វែងរកគ្រូបង្រៀនកូន រត់ទៅរកពេទ្យ និងការរៀបចំពេលវេលាផ្ទាល់ខ្លួនឡើងវិញ នៅជាមួយកូនរាប់ឆ្នាំ ដើម្បីបង្រៀនកូន បង្ហាត់កូនឲ្យនិយាយ ឲ្យលេងជាមួយប៉ាម៉ាក់ ជាមួយបងប្អូន ឬក្មេងៗដទៃ ឲ្យថាតាម លើកសរសើរ បន្ថយការឲ្យកូនលេងជាមួយឧបករណ៍អេឡិចត្រូនិក។ បច្ចុប្បន្នកូនប្រុសច្បង ក្នុងចំណោមកូន ៣នាក់របស់គាត់ ប្រសើរឡើងខ្លាំង នឹងត្រឡប់ទៅដូចដើមដូចគ្នាធម្មតាស្ទើរតែទាំងស្រុងទៅហើយ។ ការព្យាយាមរៀបរាប់នេះ ក៏ជាការចែករំលែករបស់គាត់ ឲ្យម៉ាក់ប៉ាគ្រប់គ្នា កុំឲ្យទទួលបទពិសោធន៍ជូរចត់បំផុតសឹងមិនអាចទទួលយកបានដូចគាត់បែបនេះ។
បញ្ហាអូទីស្សឹម កើនឡើងសព្វថ្ងៃគឺស្រដៀងគ្នាភាគច្រើនដូចបញ្ហាបងស្រីខាងលើ ដូចសារតែភាពមមាញឹកខ្លាំងពេក សម័យកាលឧបករណ៍អេឡិចត្រូនិកច្រើនពេក។ មាន ២ករណីផ្សេងទៀតដែលសុទ្ធតែមានកូនប្រុស ជួបបញ្ហាកូនមានជំងឺអូទីស្សឹម ប៉ុន្តែដោយសារតាមដាន អង្កេតដឹងថា កូនទើបស្ថិតក្នុងដំណាក់កាលដំបូង ម៉ាក់ប៉ារបស់គេ បានប្រឹក្សាជាមួយគ្រូបង្រៀន ឬពេទ្យរួចជាស្រេចដើម្បីដោះស្រាយឲ្យទាន់ពេល។
ស្វែងយល់បន្ថែមពីបញ្ហាអូទីស្សឹម៖
- កត្តាសំខាន់ដែលនាំឲ្យកូនជាទីស្រឡាញ់កើតជំងឺអូទីស្សឹម
- ក្មេងកើតអូទីស្សឹមអាចព្យាបាលជាទេ?
- កុមារមានអូទីស្សឹម ពេលធំឡើង អាចជាធម្មតាដូចក្មេងដទៃទេ?
- តិចនិកសាមញ្ញ អាចជួយក្មេងៗរើបម្រះពីជំងឺអូទីស្សឹមបាន
- ប៉ាម៉ាក់ត្រូវចេះតាមដានសកម្មភាពកូនៗ តិចកូនកើតជំងឺទាំងនេះដោយមិនដឹងខ្លួន
- ក្មេងកើតអូទីស្សឹម អាចវិវត្តមានជំងឺនេះ តាំងពីម្ដាយពពោះម្ល៉េះ
- ម៉ាក់ៗមានកូនកើតអូទីស្សឹម ចែករំលែកវិធីជួយឲ្យកូនប្រសើរឡើង
ផ្លូវកាយ
បើនិយាយដល់ជំងឺ ឬរោគស្ត្រីមានច្រើនរាប់មិនអស់ទេ។ ខ្ញុំសូមលើកយកឧទាហរណ៍ តែប៉ុន្មានទេ មកចែករំលែក។ បញ្ហាចម្បងៗរបស់ស្ត្រីៗគឺ ការរៀបចំផែនការគ្រួសារ យកកូនតាមចំនួននិងបំណង ការពពោះ គ្រោះថ្នាក់របស់កូនក្នុងផ្ទៃ និងបញ្ហា១ ឬ ២ផ្សេងទៀត។
គ្រួសារមួយ រៀបការហើយ ចូល ៥ឆ្នាំអត់មានកូនតាមបំណង ទោះព្យាយាម ទោះជាតាមដានវដ្ដរដូវ ថ្ងៃមេជីវិតញីធ្លាក់មកបង្កកំណើតយ៉ាងណាក៏នៅតែអត់។ ៥ឆ្នាំ គិតមើលទៅ មិនមែនរលូតទេ គឺអត់មានតែម្ដង។ ទាំងប្ដីប្រពន្ធក៏សម្រេចចិត្តទៅពិនិត្យសុខភាព និងសុខភាពមេជីវិតទាំងសង្ខាង ដើម្បីរកមូលហេតុពិត ក្រៅពីការព្យាយាម។ ក្រោយពិនិត្យលទ្ធផលបង្ហាញថា មេជីវិតឈ្មោលខាងប្ដី ខ្សោយខ្លាំង ឬសឹងមិនអាចបង្កកំណើតបាន។ ដល់ចំណុចនេះ ជាកាតព្វកិច្ចរបស់ពេទ្យ បូករួមនឹងការខិតខំរបស់សាមីខ្លួន។ មកទល់ពេលនេះ គ្រួសារនេះ បានកូន ២ហើយ សុទ្ធតែស្រីៗ គួរឲ្យស្រឡាញ់។ បញ្ហាកាន់តែពិបាកប្រសិនបើម៉ោពីខាងស្រី គឺកត្តាអាយុ លើស ៣៥ឆ្នាំ។ ជនជាតិបរទេសម្នាក់ ឆាតមកទាំងក្ដុលក្ដួល មានកូនហើយមិននៅ (រលូត)។ ក្រោយមានបញ្ហានេះ គាត់ព្យាយាមមិនបោះបង់ ហើយបច្ចុប្បន្ននេះកូនជិតគ្រប់ខែហើយ។
ស្វែងយល់បន្ថែមពីបញ្ហារលូតកូន៖
- រលូតកូនមិនមែនសុទ្ធតែមកពីបញ្ហាសុខភាពស្រ្តីទេ តែអាចមកពីបញ្ហាមេជីវិតឈ្មោលដែរ
- បន្ទាប់ពីរលូតកូន ស្រីៗគួរយកកូនម្ដងទៀតនៅពេលណា?
- ស្វែងយល់លម្អិតពីហេតុផលសំខាន់ៗ អាចឲ្យស្រីៗរលូតកូន
- ធ្លាក់ឈាមដោយសាររលូតកូន អាចសម្គាល់បានយ៉ាងម៉េច?
- អាហារគួរញ៉ាំ និងមិនគួរញ៉ាំ បន្ទាប់ពីរលូតកូន
[embed-health-tool-ovulation]
មានករណីច្រើនរឿងមិនអាចមានកូននេះ ក្រោយចាប់ដៃសាងគ្រួសារ ហើយចុងក្រោយក៏សម្រេចចិត្តលែងលះ ព្រោះមិនសមបំណងតាមច្បាប់ធម្មជាតិ។ អ្នកស្គាល់មួយចំនួនទៀត ក៏ស្រុះស្រួលគ្នាសម្រេចចិត្តយកកូនចិញ្ចឹម ដើម្បីបន្តវង្សត្រកូលទៅមុខទៀត។
ឧបសគ្គមានកូន ឬបញ្ហាអាអត់កូន អាចមកពីមូលហេតុច្រើនយ៉ាង។ យោងតាមការបញ្ជាក់ពីខាងគ្រូពេទ្យបានបង្ហាញថា ស្រីៗមានបញ្ហាសុខភាព ៧មុខនេះ អាចពិបាកមានកូន មានដូចជា៖
១. អូវែបញ្ចេញមេជីវិតញីមិនទៀងទាត់
៣. ក្រពេញទីរ៉ូអ៊ីតអសកម្ម
៤. ការរលាក
៧. ជំងឺប្រព័ន្ធភាពសុំា (លម្អិត)
ផុតចប់ពីបញ្ហាអាអត់មានកូន ចូលដល់ដំណាក់កាលដំបូងបំផុតក្នុងជីវិតរបស់មនុស្សស្រីគឺ ការមានផ្ទៃពោះ។ មានកូនជាកាដូជីវិតដ៏ធំ ដែលគ្រប់គ្នាស្រមៃចង់បាន ហើយតួនាទីជាម្ដាយគឺ បីបាច់ថែទាំកូន ប៉ូវសព្វគ្រប់ឲ្យតែឮគេថាល្អ ហើយមិនប៉ះពាល់កូន តាំងពីដឹងថាមាន រហូតដល់ថ្ងៃសម្រាលកូនចេញមកឃើញផែនដី ប៉ាម៉ាក់បានឃើញមុខ។ ប៉ុន្តែតាំងពីមាន មិនស្រួលឯណា ព្រោះក្នុងពោះ មានជីវិតម្នាក់ទៀត។ ដូច្នេះរាល់សកម្មភាព រាល់ការញ៉ាំចំណីចំណុក ឥរិយាបថ បូករួមទាំងការវិវត្តពីមួយថ្ងៃទៅមួយថ្ងៃរបស់កូនក្នុងពោះមិនមែនសុទ្ធតែលូតលាស់ទៅរលូនមិនមានបញ្ហា ១០០% ទាំងអស់ទេ។ កូនក្រៅស្បូន ទងសុករំកកូន កូនខ្សោយ កូនកើតមុនខែ រលូតកូន កូនស្លាប់ក្នុងពោះ…សុទ្ធតែជាបញ្ហាគួរព្រួយបារម្ភ យកចិត្តទុកដាក់ខ្ពស់ តាមដាន ព្រោះអាចមានផលប៉ះពាល់ដល់អាយុជីវិតកូននិងម្ដាយបានគ្រប់ពេល ជាពិសេសពេលសម្រាល។ ប៉ុន្មានចំណុចខាងលើ មិនថាបងប្អូនយើងជាម្ដាយថ្មីថ្មោង កូនដំបូង ជួបផលលំបាកផ្ញើសារមកសួរនាំយើងទេ សូម្បីអ្នកក្បែរខ្លួនៗខាងក្រៅឯណេះ ក៏មានបញ្ហាទាំងនេះដូចគ្នា។ កូនក្រៅស្បូន ជាបញ្ហាធំបំផុតមួយដែលអាចគំរាមកំហែងដល់អាយុជីវិតម្ដាយ ហើយទាមទារការយកចិត្តទុកដាក់ខ្ពស់ ពិនិត្យ ពិគ្រោះនិងតាមដានរាល់ការវិវត្តន៍របស់កូន។ ករណីធ្ងន់ធ្ងរខ្លះ គ្រូពេទ្យមិនឲ្យទុកកូនទេ តែអ្នកនៅក្បែរខាងខ្ញុំស្គាល់ សម្រាលវះកាត់ដោយជោគជ័យ។
ប៉ុន្មានថ្ងៃមុននេះ រឿងទងសុករុំកកូន។ ស្ថានភាពនេះ វាអាចមានកម្រិតគ្រោះថ្នាក់ពីទាបទៅខ្ពស់ដូចគ្នាដែរ។ ដោយសារប្រវែងទងសុកវែង បើរុំមួយជាន់មិនអីទេ តែបើចាប់ពី ២ជាន់ ៣ជាន់ឡើងទៅ បូករួមជាមួយអាយុរបស់គភ៌ សុទ្ធតែទាមទារការតាមដានខ្ពស់។ ចម្លើយពីអ្នកស្គាល់គ្នាទៅផ្ញើពោះនៅសម្ភព។
ស្វែងយល់បន្ថែមពីបញ្ហាទងសុក៖
- ទងសុករុំកកូនមកពីអី? គ្រោះថ្នាក់ទេ?
- ទងសុករុំកកូន ត្រូវធ្វើម៉េច? ម៉ាក់ៗអាចសម្រាលតាមធម្មជាតិបានទេ?
- ហេតុអីបានជាគ្រប់ខែហើយ កូនមិនបង្វិលក្បាល?
រឿងជំងឺទឹកនោមផ្អែមរបស់មនុស្សចាស់ សុទ្ធតែទាមទារការថែទាំខ្ពស់។ ជំងឺទឹកនោមផ្អែមអំឡុងពេលពពោះ ក៏ជាបញ្ហាដែរ។ ការគ្រប់គ្រងជាតិស្ករ តាមរយៈចំណីចំណុកក៏យើងជាកូនត្រូវយកចិត្តទុកដាក់ខ្ពស់ចៀសវាងផលវិបាកនានាជាច្រើនដែរ ដើម្បីធ្វើយ៉ាងណារក្សាតុល្យភាពសុខភាពអ្នកជំងឺ ឲ្យរស់នៅល្អប្រក្រតីដូចអ្នកមិនមានជំងឺទឹកនោមផ្អែមអ៊ីចឹងដែរ។ គិតតែ២០១៩ កម្ពុជាចំណាយថ្លៃព្យាបាលជំងឺទឹកនោមផ្អែមជាង ១០០លានដុល្លារ (លម្អិត)។
អ្នកជំងឺមហារីកសុដន់ម្នាក់ទៀត។ គាត់អាយុស្របាលម្ដាយ ឬជីដូនខ្ញុំទៅហើយ។ ខ្ញុំក៏ទើបតែទទួលបានដំណឹងថា ស្ត្រីដែលធ្លាប់តែជជែកលេងជាមួយខ្ញុំនោះទើបទទួលបានការព្យាបាលដោយគីមី លើដំណាក់កាលទី១ ឬទី២របស់គាត់។ ខ្ញុំឃើញសក់គាត់ចាប់ផ្ដើមប្រែប្រួល ប្ដូរពណ៌ និងជ្រុះ ពេលគាត់កំពុងស្រោចផ្កា ស្រោចសួនច្បារគាត់ ក្នុងទឹកមុខស្រស់ស្រាយ មិនបាក់ទឹកចិត្ត មិនអស់សង្ឃឹម។ ខ្ញុំក៏បន្តជជែកលេងជាមួយគាត់ដូចធម្មតា ជម្រាបសួរគាត់ ទាំងដែលដៃគាត់កាន់ទុយយោទឹកស្រោចកូនឈើបណ្ដើរថា សុខសប្បាយទេអ៊ំ? យ៉ាងម៉េចហើយសុខភាពអ៊ំ? គាត់ញញឹមពព្រាយតប អ៊ំអត់អីទេ? ជជែកច្រើន ទើបខ្ញុំដឹងថាគាត់ជាមនុស្សស្រីដ៏រឹងមាំម្នាក់ មិនបាក់ស្បាត មិនចុះញ៉ម។
ករណីកោសិកាជំងឺមហារីកមួយទៀត ជាមនុស្សស្រីម្នាក់ដែលដឹងថាក្នុងគ្រួសារមានហ្សែនមហារីក ព្រោះប្រវត្តិ គ្រួសារធ្លាប់មានអ្នកឈឺជំងឺមហារីក។ ដូច្នេះស្ត្រីម្នាក់នោះដែលដើរតួជាឪពុកផង ជាម្ដាយផងមើលថែប្អូនប្រុសម្នាក់សព្វគ្រប់ ក៏បង្កើតទម្លាប់តាមការណែនាំរបស់គ្រូពេទ្យ ក្នុងការទៅពិនិត្យសុខភាពទៀងទាត់រៀងរាល់ ៦ខែម្ដង។ ជាលទ្ធផលប្អូនរបស់គាត់ពេទ្យរកឃើញដុំសាច់កាចក្នុងពោះវៀនធំ ដែលទាមទារការវះកាត់និងព្យាបាលបន្ទាន់។ ការចាត់ចែងសព្វបែបយ៉ាងមិនចាញ់មនុស្សប្រុស បញ្ជូនប្អូនប្រុសខ្លួនទៅបរទេសដើម្បីព្យាបាល រហូតជាសះស្បើយធម្មតា និងបង្កើតបាន កូនស្រី២។ លទ្ធភាព សមត្ថភាព ការរៀបចំ ចាត់ចែង ហ៊ានប្រឈមមុខ ហ៊ានដោះស្រាយ ហ៊ានទទួលយកលទ្ធផល ហ៊ានសម្រេចចិត្ត ជាអ្វីដែលខ្ញុំចង់លើកយកមកបង្ហាញជូនបងប្អូនអ្នកអាននៅទីនេះ។ ព្រោះសាកស្រមៃមើល៍ថា បើគាត់មិនបង្កើតទម្លាប់ពិនិត្យសុខភាពទៀងទាត់ ឬចាត់ចែងដូចរៀបរាប់ខាងលើ ក្រៅពីសមត្ថភាពលុយកាក់ តើអាយុជីវិតប្អូនតែម្នាក់នឹងទៅជាយ៉ាងណា?
ផ្លូវភេទ
សុខភាពផ្លូវភេទ បញ្ហាបន្តពូជ គន្លឹះសុខភាពផ្លូវភេទ ជំងឺឆ្លងតាមការរួមភេទ ជំងឺកាមរោគ ជំងឺលើប្រដាប់ភេទ ឈាមរដូវ បញ្ហាមាត់ស្បូន គីសមាត់ស្បូន ធ្លាក់ស អនាម័យ។ល។ ច្រើនណាស់ សូម្បីមាតិការបស់យើងដែលបានចេញផ្សាយពីបញ្ហាអស់នេះ មានរាប់រយរាប់ពាន់អត្ថបទ។
ឧទាហរណ៍ពេលមនុស្សស្រីចាប់ផ្ដើមពេញវ័យ មករដូវ។ តើគេបានចំណេះដឹងឯកជនបំផុតរបស់គេពីណាម៉ោ? ធ្លាប់អាន ធ្លាប់រៀនពីការអប់រំសុខភាពបន្តពូជ? បងប្អូនស្រី មិត្តភ័ក្ដិប្រាប់ ណែនាំ អប់រំ ឬក៏ម៉ាក់ក្នុងផ្ទះមានទំនាក់ទំនងល្អបានណែនាំ បានពន្យល់ឲ្យកូនស្រីបើកចិត្តហ៊ានបើកចំហនិយាយ រាយការណ៍ប្រាប់ម៉ាក់ រាល់បញ្ហាទាំងអស់នេះ។ ចាត់ទុកថាមានចុះ តើអ្នកគិតថាមានប៉ុន្មាននាក់ដែលមានការគាំទ្របែបនេះ? មានប៉ុន្មានគ្រួសារដែលកូនស្រីមិនអៀន ហ៊ានជជែកជាមួយម្ដាយបែបនេះ? អ៊ីចឹង រឿងអនាម័យ គេចឆ្ងាយពីជំងឺឆ្លង ការញ៉ាំចំណីចំណុក ការប្រើប្រាស់សំឡីអនាម័យ ផ្លាស់ប្ដូរ កាយវិការមិនសមប្រកបច្រើនទៀតពេលនេះសុទ្ធតែមិនដូចពេលផុតខែថ្ងៃ ដែលគួរចៀសវាង ឬកាត់បន្ថយ។ ឈប់អៀនខ្មាស ហើយទទួលការយល់ដឹងច្បាស់ពីរឿងសុខភាពផ្លូវភេទ ពីមនុស្សទុកចិត្តបំផុត ពីប្រព័ន្ធផ្សព្វផ្សាយគួរឲ្យទុកចិត្តបំផុត បន្តជជែកជាមួយមនុស្សស្រីដូចគ្នា ឬម៉ាក់ ពិសេសគ្រូពេទ្យជំនាញ ក៏គួរតែហ៊ានបើកចំហដែរ បើករណីចាំបាច់។
បញ្ហាផ្លូវភេទ ឬជំងឺឧស្សាហ៍កើតមានលើប្រដាប់ភេទស្ត្រីមានដូចជា៖
១- ឈឺនៅមាត់ទ្វារមាស
២- មានដុំពក ឡើងប៉ោងទ្វារមាស
៣- ឆ្លងមេរោគក្នុងទ្វារមាស
៤- ធ្លាក់សខុសធម្មតាតាមទ្វារមាស
៥- ជំងឺបង្កដោយមេរោគទ្រីកូមីណាស់ (Trichomoniasis)
៦- ជំងឺ Vaginismus (លម្អិត)
គួរដល់ពេលបើកចិត្តឲ្យទូលាយ ហើយចាប់ផ្ដើមស្រឡាញ់សុខភាពខ្លួនយើងហើយ កុំចាំដល់ពេលឈឺ បានរត់ទៅរកពេទ្យ។ ការពារតែងតែល្អជាការព្យាបាល គួរធ្វើជាអ្នកសម្រេចចិត្ត ហើយបើយើងឈឺហើយ គួរកុំបាក់ទឹកចិត្ត ធ្វើជាមនុស្សរឹងមាំបំផុតសម្រាប់ខ្លួនឯង ធ្វើដើម្បីខ្លួនឯង ស្វែងរកជំនួយគ្រប់រូបភាពពិសេសគ្រូពេទ្យជំនាញ អ្នកធ្លាប់ឆ្លងកាត់ ប្រឹក្សា ដើម្បីការសម្រេចចិត្តដ៏ល្អបំផុតដើម្បីខ្លួនឯង។
សន្សំចំណេះដឹង គន្លឹះសុខភាព ពីប្រភពព័ត៌មានគួរឲ្យទុកចិត្តបំផុត ពីស្ថាប័នឬបុគ្គលដែលយើងទទួលព័ត៌មាននានាហើយ អាចយកទៅអនុវត្តក្នុងជីវភាពជីវិតប្រចាំថ្ងៃយើងបាន។ ចូលរួមដើម្បីខ្លួនឯង និងស្ត្រីជុំវិញខ្លួនឯទៀតចាប់ពីថ្ងៃនេះ កុំចាំស្អែក៕
ជីព ចិត្ត
បង្កើត ទម្លាប់ ស្វែងយល់ បន្ថែម មិន ថា គន្លឹះ សុខភាព ដែល ពាក់ព័ន្ធ ឬ គ្រាន់ តែ ជា ចំណេះដឹង បន្ថែម
- បង្កើតទម្លាប់ស្វែងយល់បន្ថែមមិនថាគន្លឹះសុខភាពដែលពាក់ព័ន្ធឬគ្រាន់តែជាចំណេះដឹងបន្ថែម
- បង្កើតទម្លាប់ចែករំលែកចែករំលែកមិនថាទាំងលើបណ្ដាញសង្គម ឬសមាជិកជិតស្និទ្ធបំផុតដើម្បីឲ្យអ្នកទាំងនោះទទួលបានចំណេះដឹងមានប្រយោជន៍ថ្មីៗក្រៅពីការកម្សាន្ត
- ចេះវាយតម្លៃ ស្ថាប័ន គ្រូពេទ្យ ឬប្រភពផ្សព្វផ្សាយផ្លូវការ ដែលលោកអ្នកជឿជាក់បំផុត បែងចែកឲ្យដាច់ប្រភពព័ត៌មានលំៗ មិនច្បាស់ការណ៍ មុនជឿ មុនចែករំលែក មុនយកទៅអនុវត្ត
- បង្កើតទម្លាប់តាមដានសុខភាព និងយកចិត្តទុកដាក់ខ្ពស់ទាំងការតាមដានខ្លួនឯង ឬការទៅធ្វើតេស្ដសុខភាព ចៀសវាងបញ្ហាមួយចំនួនពីស្រាលទៅធ្ងន់ ពីតិចទៅជាទុំជោរ
- បង្កើតទម្លាប់ចូលចិត្តពេទ្យ ដើម្បីអាចពិភាក្សា ឬសួរសំណួរដែលខ្លួនកំពុងឆ្ងល់ កំពុងសង្ស័យបានខ្លះ
- ឈប់ខ្មាសអៀន ព្រោះរាល់ចំណេះដឹងសុខភាពជាផ្នែកមួយដ៏សំខាន់បំផុតក្នុងជីវិត ត្រូវហ៊ានសួរ ហ៊ានប្រឹក្សា ហ៊ានទៅពិនិត្យតាមដាន ដោយផ្ទាល់
- បង្កើតទម្លាប់ឈប់ស្មាន។ គ្នាយើងខ្លះ ភាគច្រើនតាមគ្នា។ យកល្អគួរកុំធ្វើបែបនេះ ព្រោះស្ថានភាពជំងឺនិមួយៗ ដាច់ខាតត្រូវតែគ្រូពេទ្យជំនាញ គ្រូពេទ្យឯកទេសជាអ្នកពិនិត្យនិងវាយតម្លៃ។ គ្រប់យ៉ាងត្រូវដែលបញ្ជាក់ដោយគ្រូពេទ្យ សូមដាក់ការជឿជាក់ទាំងស្រុងទៅលើពេទ្យ កុំសន្មត កុំសន្និដ្ឋាន ព្រោះបញ្ហាខ្លះអាចបង្កជាធ្ងន់បើអែអង់
- គួរបង្កើតទម្លាប់នៅឲ្យឆ្ងាយពីការធ្វើអីដោយគ្មានវេជ្ជបញ្ជា ពិសេសទាក់ទងការទិញថ្នាំសង្កូវមួយចំនួនដែលអាចបង្កគ្រោះថ្នាក់ ប្រសិនបើឱសថទាំងនោះទាមទារវេជ្ជបញ្ជាដាច់ខាត ដូចជា ពពួកថ្នាំផ្សះ ឬហៅឧស្សាហ៍ហៅថា ថ្នាំអង់ទីប៊ីយ៉ូទីក
- កុំបង្កើតទម្លាប់ស្ដាយលុយ។ ចំណុចនេះ លុយពិតជាសំខាន់ រាល់ការចំណាយដាច់ខាតត្រូវតែស្របទៅតាមខ្ទង់ចំណាយ ឬកម្រិតជីវភាព។ ចំណុចនេះ ខ្ញុំចង់លើកតែលទ្ធភាពមាន មិនដល់ថ្នាក់លក់របស់ទ្រព្យ ឬខ្ចីបុលទ្រង់ទ្រាយធំទេ ប៉ុន្តែបែរជាទិញថ្នាំធូរថ្លៃមិនមានស្លាក មិនមានយីហោ មិនមានកាលបរិច្ឆេទ ឬចាស់ៗមួយចំនួនពូកែទ្រាំ សុខចិត្តសម្ងំឈឺសិន ព្រោះគិតថាខ្លួនមិនធ្ងន់ ឬមិនទាន់ដំណាក់កាលត្រូវចំណាយលុយកាក់ទៅពេទ្យជាដើម
- សូមធ្វើចិត្តឲ្យនឹងន ហ៊ានប្រឈមមុខនឹងបញ្ហាសុខភាពខ្លួនប្រសិនបើមានបញ្ហាសុខភាពកម្រិតណាមួយ និងព្យាយាមស្វែងយល់បន្ថែមជុំវិញបញ្ហា កាត់បន្ថយហានិភ័យ អនុវត្តខ្ពស់បំផុតវេជ្ជបញ្ជារបស់គ្រូពេទ្យជំនាញដែលលោកទៅព្យាបាល។ កុំធ្វើតាមតែពេលឈឺ ធូរស្រាកស្រាន្តបន្តិចធ្វើហី
- ត្រូវបែងចែកឲ្យដាច់ថា តើស្ថានភាពណាធ្ងន់ មួយណាស្រាល។ ជាអ្នកជំងឺ គួរដឹងពីស្ថានភាពជំងឺ ដំណោះស្រាយ និងលទ្ធផលក្រោយការព្យាបាល។
និព្ធននាយក
ជីព ចិត្ត
